ރާއްޖޭގެ މަސްވެރިކަން ތަރައްގީ ކުރުމާބެހޭ ގޮތުން ޑަބްލިއު ޑަބްލިއު އެފް އާއެކު މަޝްވަރާ ކޮށްފި

ރާއްޖޭގެ ދެމެހެއްޓެނެވި މަސްވެރިކަން އިތުރަށް ފުޅާކުރުމާއި ތަރައްޤީކުރުމާއި ޕްރޮމޯޓްކުރުމުގައި ވޯރލްޑް ވައިލްޑް ލައިފް ފަންޑް(ޑަބްލިއު ޑަބްލިއު އެފް) ގެ އެހީތެރިކަން ހޯދުމަށް މިނިސްޓަރ އޮފް ފިޝަރީޒް އެންޑް އެގްރިކަލްޗަރ ޑރ. މުޙައްމަދު ޝައިނީ މަޝްވަރާ އެފަންޑާއެކު މަޝްރާ ކުރައްވައިފިއެވެ.

މިނިސްޓަރ ޝައިނީ މިމަޝްވަރާތައް ކުރެއްވީ ރލްޑް ވައިލްޑް ލައިފް، ޕާކިސްތާންގެ ދަޢުވަތަކަށް، އެގައުމަށް ކުރެއްވި ދަތުރުފުޅުގައި ކަމަށް ފިޝަރީޒް މިނިސްޓްރީން ހާމަކުރައްވާފައިވެއެވެ.

"މިމަޝްވަރާތަކުގައި މިޔަރު މަސްވެރިކަން މަނާކުރުމަށްފަހު މިޔަރުގެ ސްޓޮކަށް އަންނަ ބަދަލުތަކާއި ބެހޭގޮތުން ދިރާސާކުރުމަށް އެހީތެރިކަން ފޯރުކޮށްދިނުމާއި އަދި ޑަބްލިއު ޑަބްލިއު އެފްގެ އޮފީހެއް ރާއްޖޭގައި ޤާޢިމްކުރުމާއި ބެހޭގޮތުން މަޝްވަރާކުރެވުނެވެ." މިނިސްޓްރީން ނެރެފައިވާ ބަޔާނެއްގައި ބުނެފައިވެއެވެ.

ޑަބްލިއު ޑަބްލިއު އެފްގެ ހިލޭ އެހީގެ ދަށުން މިހާރުވެސް މެރިން ރިސަރޗް ސެންޓަރުން ދަނީ ދިވެހިރާއްޖޭގެ އެންވެރިކަމުގެ ހާލަތާއި އަދި އެންވެރިކަން އިތުރަށް ހަރުދަނާ ކުރެވޭނެ ގޮތްތައް ބަލަމުންނެވެ. އަދި ކަނޑުމަހުގެ މިންއެޅުމުގެ ޕްރޮގްރާމް އިތުރަށް ހަރުދަނާ ކުރުމުގެ މަސައްކަތްވެސް ދަނީ ކުރަމުންނެވެ.

މިނިސްޓަރުގެ މިދަތުުރުފުޅުގައިވަނީ ޑަބްލިއު ޑަބްލިއު އެފްއިން އިސްނަގައިގެން މިޔަރުގެ މެނޭޖްމަންޓް ޕްލޭން ތައްޔާރުކުރުމާއި ބެހޭގޮތުން މަސްވެރިންނާއި، ކުންފުނިތަކާއި އަދި ޕާކިސްތާނުގެ ސަރުކާރުން ބައިވެރިވި މަޝްވަރާ ބައްދަލުވުން އިފްތިތާޙް ކޮށްދެއްވާފައި ކަމަށްވެސް މިނިސްޓްރީގެ ބަޔާނުގައި ބުނެފައިވެއެވެ.

"ދުނިޔޭގައިވެސް ތިމާވެށި ރައްކާތެރިކޮށް، ދެމެހެއްޓެނެވި ގޮތެއްގައި ޤުދްރަތީ ވަޞީލަތްތައް ބޭނުންކުރުމަށް ބާރުއަޅާ ޖަމްޢިއްޔާ ޖަމާޢަތްތަކުން ދިވެހިރާއްޖޭގައި ކުރާ މަސްވެރިކަން ބަލައިގަތުމަކީ ދިވެހިރާއްޖޭގެ މަސްވެރިން ބާނާ މަހަށް އިތުރު ބާޒާރުތައް ލިބި އަދި މަހުގެ އަގު އެހެން މަސްވެރިކަމުން ބާނާ މަހާއި ތަފާތުކުރެވި، އަދި އަގުބޮޑުކޮށް ވިއްކުމަށް މަގުފަހިވެގެން ދާނެ ކަމެކެވެ. " މިނިސްޓްރީން ބުނެފައިވެއެވެ.