ލޭހަދިޔާ ކުރުމުގެ ކޭމްޕެއް އެފްއެޗުއެސް އިން ބާއްވަނީ

ފެކަލްޓީ އޮފް ހެލްތު ސައިންސަސް (އެފްއެޗުއެސް) ގެ ދަރިވަރުންގެ ޖަމިއްޔާއިން އިސް ނަގައިގެން ލޭހަދިޔާ ކުރުމުގެ ކޭމްޕެއް ބާއްވަން ނިންމައިފިއެވެ.

އެފްއެޗުއެސް ގެ ދަރިވަރުންގެ ޖަމިއްޔާ " ހީނަސް" ގެ ނާއިބު ރައީސް ހުސައިން ޝަފީއު ބުނީ މި ކޭމްޕަކީ މޯލްޑިވިސް ބްލަޑް ޑޯނާސްއާ ގުޅިގެން ބާއްވާ ކޭމްޕެއް ކަމަށެވެ.

މި ކޭމްޕް ބޭއްވުމަށް ހަމަޖައްސާފައިވަނީ މިހިނގާ ސެޕްޓެމްބަރ 27 ވަނަ ދުވަހުއެވެ. ކޭމްޕު އޮންނާނީ އެދުވަހު ހެނދުނު 9:00 އިން ހަވީރު 4:00 އަށް އެފްއެޗުއެސްގެ ހޯލުގައެވެ.

ޝާފިއު ބުނީ ލޭހަދިޔާ ކުރުމުގެ ފުރުސަތު ކޮންމެ މީހަކަށްވެސް އޮންނާނެ ކަމަށެވެ. ލޭގެ ގުރޫޕް ނޭގޭ މީހުންނަން ލޭގެ ގްރޫޕް ވަގުން ބަލައިދިނުންވެސް މިކޭޕްގައި އޮންނާނެ ކަަމަށް އޭނާ ބުންޏެވެ.

"އަޅުގަނޑުމެން ފެކަލްޓީގެ ދަރިވަރިވަރުންގެ ޖަމިއްޔާގެ އެދުމަކީ ކޮންމެ މީހަކުވެސް އިޖްތިމާއީ ފަރުދީ ޒިއްމާއެއް ކަމަށް ދެކިގެން ލޭ ބޭނުންވެފައިވާ މީހުންނަން ލޭ ހަދިޔާ ކުރުމަށް ވީހާވެސް ގިނަ މީހުން މި ކޭމްޕްގައި ބައިވެރިވުން" ޝާފިއު ބުންޏެވެ.

ޝާފިއު ބުނީ މި ކޭމްގައި މަންދު ކޮލެޖާއި، ކުލިކް ކޮލެޖާއި، ކުއްލިއްޔަތުއްދިރާސާތުލް އިސްލާމިއްޔާގެ ބައިވެރިވުން ވަރަށް ބޮޑަށް ލިބޭ ކަމަށެވެ.