އަސްކަރީ ތިން ކޯހަކަށް ކުރިމަތިލުމުގެ ފުރުސަތު ހުޅުވައިފި

އަސްކަރީ ތިން ކޯހަކަށް ކުރިމަތިލުމުގެ ފުރުޞަތު މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން އާންމުކޮށް ހުޅުވައިލައިފިއެވެ.

މިއީ ޔުނައިޓެޑް ސްޓޭޓްސް މިލިޓަރީ އެކަޑެމީއާއި ޔުނައިޓެޑް ސްޓޭޓްސް ނޭވަލް އެކަޑެމީ، އަދި ޔުނައިޓެޑް ސްޓޭޓްސް ކޯސްޓްގާޑް އެކަޑެމީއިން ހިންގުމަށް ހަމަޖެހިފައިވާ ކޯސްތަކެއް ކަމަށް އެމްއެންޑީއެފް އިން ބުނެފައިވެއެވެ.

މީގެ ތެރެއިން އެއްކޯހަކީ ޔުނައިޓެޑް ސްޓޭޓްސް މިލިޓަރީ އެކަޑެމީ (ޔޫއެސްއެމްއޭ) އިން 4 އަހަރު ދުވަހުގެ މުއްދަތަށް ހިންގުމަށް ހަމަޖެހިފައިވާ ބެޗްލަރސް ޑިގްރީ ކޯހެކެވެ.

މިކޯހަށް ކުރިމަތިލެވޭނީ "އުމުރުން 17 އަހަރު ފުރިފައިވާ އަދި 2015 ވަނަ އަހަރުގެ ޖުލައި 1 ވަނަ ދުވަހުގެ ކުރިން 23 އަހަރު ފުރިފައިނުވާ މީހަކަށްވުމާއި، ޒަވާޖީ ޙަޔާތެއް ފަށާފައިވާ މީހަކަށްނުވުމާއި، ނަފްސާނީގޮތުންނާއި، ޖިސްމާނީގޮތުން ދުޅަހެޔޮ މީހެއްކަމުގައި ވުމާއި، އޭލެވެލް އިމްތިޙާނު ފުރިހަމަކޮށް ފާސްވެފައިވާ ފަރާތެއްކަމުގައިވުމާއި، އެފެންވަރު ނުވަތަ އެއަށްވުރެ މަތީ ސަނަދެއް ޙާޞިލުކޮށްފައިވާ މީހެއްކަމުގައިވުން" ކަމަށް އެމްއެންޑީއެފް އިން ބުނެފައިވެއެވެ. މީގެ އިތުރަށް، ސްކޮލާސްޓިކް އެޕްޓިޓިއުޑް ޓެސްޓާއި، ޓެސްޓް އޮފް އިންގްލިޝް އޭޒް އަ ފޮރިން ލޭންގުއޭޖް ފުރިހަމަކޮށްފައިވާ މީހަކަށް ވާންޖެހޭނެ ކަމަށްވެސް ބުނެފައިވެއެވެ. "މި ދެޓެސްޓަކީ، ކޯހަށް އެޕްލައި ކުރުމަށްފަހު ކުރިއަށް ގެންދެވޭ ޓެސްޓްތަކެކެވެ."

ދެވަނަ ކޯހާއި ތިންވަނަ ކޯހަކީ، ޔުނައިޓެޑް ސްޓޭޓްސް ކޯސްޓްގާޑް އެކަޑެމީ (ޔޫއެސްސީޖީއޭ) އާއި ޔުނައިޓެޑް ސްޓޭޓްސް ނޭވަލް އެކަޑެމީ (ޔޫއެސްއެންއޭ) އިން 4 އަހަރުދުވަހުގެ މުއްދަތަށް ހިންގުމަށް ހަމަޖެހިފައިވާ ބެޗްލަރސް ޑިގްރީ ކޯހެވެ. މި ދެކޯހަށް ކުރިމަތިލާ ފަރާތްތަކަކީ "އުމުރުން 17 އަހަރު ފުރިފައިވާ އަދި 2015 ވަނަ އަހަރުގެ ޖޫން 30 ވަނަ ދުވަހުގެ ކުރިން 23 އަހަރު ފުރިފައިނުވާ މީހަކަށްވުމާއި، ޒަވާޖީ ހަޔާތެއް ފަށާފައިވާ މީހަކަށްނުވުމާއި، ނަފްސާނީގޮތުންނާއި، ޖިސްމާނީގޮތުން ދުޅަހެޔޮ މީހެއްކަމުގައި ވުމާއި، ރަނގަޅަށް ފަތަން ދަންނަ މީހަކަށްވުމާއި، އޭލެވެލް އިމްތިޙާނު ފުރިހަމަކޮށް ފާސްވެފައިވާ ފަރާތެއްކަމުގައިވުމާއި، އެފެންވަރު ނުވަތަ އެއަށްވުރެ މަތީ ސަނަދެއް ޙާޞިލުކޮށްފައިވާ މީހެއްކަމުގައިވުން" ކަމަށް އެމްއެންޑީއެފް އިން ބުނެފައިވެއެވެ. އަދިސްކޮލާސްޓިކް އެޕްޓިޓިއުޑް ޓެސްޓާއި، ޓެސްޓް އޮފް އިންގްލިޝް އޭޒް އަ ފޮރިން ލޭންގުއޭޖް ފުރިހަމަކޮށްފައިވާ ފަރާތެއް ކަމުގައި ވާންޖެހޭ ކަމަށްވެސް ބުނެފައިވެއެވެ.

މިކޯސްތަކަށް ޝަރުތު ހަމަވާ ފަރާތްތަކުން ކޯސް އެޕްލިކޭޝަން ފޯމް ފުރުއްވުމަށްފަހު ސީވީއާއި އެޓެސްޓް ކުރެވިފައިވާ ތަޢުލީމީ ސެޓްފިކެޓްތަކުގެ ކޮޕީ އެމްއެންޑީއެފް އިންޓަގްރޭޓެޑް ހެޑްކްއޯޓަރޒްގެ ޑައިރެކްޓްރޭޓް އޮފް އޮޕަރޭޝަންސް އެންޑް ޓްރެއިނިންގ އަށް މިމަހުގެ 18 ވަނަ ދުވަހުގެ އޮފީސް ބަންދުވުމުގެ ކުރިން ހުށަހެޅުމަށް އެމްްއެންޑީއެފް އިން ވަނީ ބުނެފައެވެ.