ހައްޖަށް މީހުން ގެންދިޔުމަށް އަލްފަތުހު ޖަމާއަތަށް ދީފައިވާ ހުއްދަ ބާތިލް ކޮށްފި

އަލްފަތުޙް ޙައްޖު އެންޑް ޢުމްރާ ގްރޫޕް ޕްރައިވެޓް ލިމިޓެޑަށް ދީފައިވާ މީހުން ހައްޖަށާއި އުމްރާއަށް ގެންދިޔުމުގެ ހުއްދަ އިސްލާމިކް އެފެއާޒު މިނިސްޓްރީން ބާތިލް ކޮށްފިއެވެ.

އެ ހުއްދަ ބާތިލް ކޮށްފައިވަނީ "ދިވެހިރާއްޖެއިން ޙައްޖަށް މީހުން ގެންދިއުމާއި ބެހޭ އުޞޫލުގެ 10 ވަނަ މާއްދާގެ (ނ) އާއި ޚިލާފަށް ބައެއް ރައްޔިތުން އަތުން ޙައްޖަށް ގެންދާނެ ކަމަށް ބުނެ ފައިސާ ނަގާފައެވެ. އަދި ޙައްޖުގެ ހުރިހާ ތައްޔާރީތައްވެ، ޙައްޖު ކާޑު ހަދައި ދިނުމަށްފަހު، ޙައްޖަށް މިއަހަރު ނުގެންދެވޭނެކަމަށް މިވަނީ އެފަރާތްތަކަށް އަންގާފައެވެ. އަދި މި މިނިސްޓްރީން، މިކަން ހިގާފައިވާގޮތް އަނގައިދިނުމަށް އެދުމުން، އެކުންފުނިން ވަނީ، ދިވެހިރާއްޖެއިން ޙައްޖަށް މީހުން ގެންދިއުމާއި ބެހޭ އުޞޫލާ ހިލާފަށް ފައިސާ ނެގިކަމަށް ލިޔުމުން މިނިސްޓްރީ އަށް ޖަވާބުދާރީ ވެފައެވެ." ހުއްދަ ބާތިލް ކުރުމާ ބެހޭ ގޮތުން މިނިސްޓްރީން ކުރައްވާފައިވާ އިޢުލާނުގައި ބުނެފައިވެއެވެ.

މިނިސްޓްރީގެ އިޢުލާނުގައި ބުނެފައިވަނީ އެ ކުނަފުންޏަށާއި އެ ކުންފުނީގެ ޑިރެކްޓަރުންގެ ބޯޑުގައި ހިމެނޭ މ.އެކްސަލް، މުސްތަފާ މުޙައްމަދާއި، ހ. ސިއްކަގޭ ހުޅަނގުބައި، މަރިޔަމް ރަޝީދާ އިބްރާހިމާއި، ދ. މީދޫ މުޝްތަރީގޭ، މުޙައްމަދު އަސްލަމާއި، މ. އެކްސަލް، އިސްމާއީލު މިއިން އެއްވެސް ބޭފުޅަކު ހިންގާ ކުންފުންޏަކަށް 2015 ވަނަ އަހަރު ފެށިގެން ދިވެހި ރާއްޖެއިން ޙައްޖަށް މީހުން ގެނދިއުމުގެ ހުއްދަ ދޫނުކުރާ ގޮތަށް ނިންމާފައިވާ ކަމަށެވެ.

އޭގެއިތުރަށް އެ ކުންފުންޏާއި، އެކުންފުނީގެ އެއްވެސް ޑިރެކްޓަރަކަށް ޢުމްރާ އަށް ރާއްޖެއިން މީހުން ގެންދިއުމުގެ މަސައްކަތް ނުކުރެވޭނެ ކަމަށްވެސް މިނިސްޓްރީން ވަނީ ބުނެފައެވެ. "ވީމާ، މި ފަރާތްތަކާ އެކު ޙައްޖަށް ނުވަތަ ޢުމްރާ އަށް ދިއުމަށް އެއްވެސް ފައިސާއެއް ނުދެއްކެވުން" އެދޭ ކަމަށްވެސް މިނިސްޓްރީން ބުނެފައިވެއެވެ. މިއަހަރު ހައްޖަށް ގެންދާނެ ކަމަށްބުނެ އެޖަމާއަތުންވަނީ 125 މީހުންގެ އަތުން ފައިސާ ނަގައިފައެވެ. އަދި ހައްޖުކާޑުވެސް ދީފައެވެ. ނަމަވެސް އެންމެ ފަހުވަގުތު ހައްޖަށް ނުގެންދެވޭނެ ކަމަށް އެންގުމުން ސަރުކާރުންވަނީ އެމީހުން ހައްޖަށް ފޮނުވާފައެވެ.

މިކަމާ ގުޅިގެން އެޖަމާއަތުގެ ވެރިޔާ މުސްތަފާ މުޙައްމަދުވަނީ ހައްޔަރުކޮށްފައެވެ.