ރައީސްނަޝީދު އިނގިރޭސި ވިލާތައް ކުރްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެންފި
13 ސެޕްޓެމްބަރ 2014 16:40
އެމްޑީޕީގެ ރައީސް މުހައްމަދު ނަޝީދު
އަމިއްލަ ދަތުރުފުޅެއްގައި އިނގިރޭސި ވިލާތަށް ވަޑައިގެންނެވުމަށްފަހު އިދިކޮޅު އެމްޑީޕީގެ ރައީސް މުހައްމަދު ނަޝީދު މިއަދު މާލޭ ވަޑައިގަންނަވައިފިއެވެ.
އެމަނިކުފާނު އިނގިރޭސި ވިލާތަށް ކުރެއްވީ އަމިއްލަ ދަތުރުފުޅެއް ނަމަވެސް، އެ ގައުމުގެ ސަރުކާރާއިއެކު ދިވެހި ރާއްޖޭގެ މަޝްރަހާ ގުޅޭގޮތުން މަޝްވަރާ ކުރައްވައިފައިވާކަމަށް އެމްޑީޕީން ބުނެއެވެ. އޭގޮތުން މިނިވަން ނޫހުގެ ނޫސްވެރިއާ އަހުމަދު ރިޟްވާން ގެއްލުނު މައްސަލައިގައި މަޝްވަރާކުރައްވައިފައިވާ ކަމަށް އެ ޕާޓީން ހާމަކުރެއެވެ.
އެމްޑީޕީން އަންނަނީ އެ ޕާޓީގެ ބޮޑު ޖަލްސާއެއް ބޭއްވުމަށް ތައްޔާރުވަމުންނެވެ. އެގޮތުން އަންނަ ބުރާސްފަތި ދުވަހުގެ ރޭ މާލޭ އަލިމަސް ކާނިވާ ސަރަހައްދުގައި އެ ޕާޓީގެ ޖަލްސާއެއް އޮންނާނެކަމަށް ވަނީ އިއުލާނުކޮށްފައިއެވެ. އެ ޖަލްސާ ބޭއްވުން ފަސްކޮށްފައިވަނީ ރައީސް ނަޝީދު މާލެގައި ނޫޅުއްވާތީއެވެ. މިއީ އެމްޑީޕީގެ އައު ލީޑަރޝިޕުން އެ ޕާޓީއާ ހަވާލުވިފަހުން ބާއްވާ މިފަދަ ފުރަތަމަ ޖަލްސާއެވެ.
ކިޔުންތެރިންގެ ހިޔާލު