އިސްލާމީ ހިލާފަތުގެ ދިދަ ޕޯސްޓުކުރި ބައެއް ދިވެހިންނާމެދު ފޭސްބުކުން ފިޔަވަޅު އަޅައިފި

އިލްސާމީ ހިލާފަތުގެ ދިދަ ފޭސްބުކްގައި ޕޯސްޓުކާރާ ބައެއް ދިވެހިންނާމެދު ފޭސްބުކުން ފިޔަވަޅުއަޅަން ފަށައިފިއެވެ.

އިސްލާމީ ހިލާފަތު ދިދައިގެ ފޮޓޯތައް ފޭކްބުކުން އަންނަނީ ނަގަމުންނެވެ. އަދި އެފަދަ އެކައުންޓުތައް ފޭސްބުކުން އަންނަނީ 24 ގަޑީރަށް އެއްވެސް އެއްޗެއް ޕޯސްޓު ނުކުރެވޭގޮތަށް ބޭން ކުރަމުންނެވެ. އަދި އެފަދަ އެއްޗެއް އަލުން ޕޯސްޓުކޮށްފިނަމަ އެކައުންޓު ދާއިމީ ގޮތަކަށް ބޭން ކޮށްލާނެކަމުގެ އިންޒާރުވެސް ވަނީ ދީފައިއެވެ. މިގޮތުން މިއަދު ބައެއް ދިވެހިންގެ ފޭސްބުކް އެކައުންޓުތަކުން ވެސް އެ ދިދަ ނަގައި، ފޭސްބުކުން ދާއިމީކޮށް ބޭން ކުރަންޖެހިދާނެކަމުގެ އިންޒާރުވަނީ ދީފައެވެ. 

"ދުވަސް" ނޫހަށް މައުލޫމާތު ދެމުން ނަން ހާމަކުރަން ބޭނުންނުވާ ދިވެއްސަކު މިއަދު ބުނީ އޭނާ ޝަހާދަތުގެ ދެކަލިމައާއި ރަސޫލާގެ މުޙައްމަދު ޞައްލަﷲ ޢަލައިހި ވަސައްލަމްގެ ސިއްކަފުޅު ޖަހާފައިވާ ދިދަ ފޭސްބުކަށް ޕޯސްޓުކޮށްފައިވަނިކޮށް އެނާގެ އެކައުންޓު ވަގުތީގޮތުން ބޭން ކޮށްފައިވަނީ އެއްވެސް އިންޒާރެއްވެސް ދިނުމެއްނެތިކަމަށެވެ. އެއީ ދަށުދަރަޖައިގެ އަމަލެއްކަމަށް ދެކޭކަމަށްވެސް އޭނާ ބުންޏެވެ. އެނާގެ ބައެއް އެކުވެރިންގެ އެކައުންޓުތައް ވެސް ފޭސްބުކުން ބޭން ކުރަމުން އަންނަކަމަށް ބުންޏެވެ. 

ދިވެހި ރާއްޖޭގައި އިސްލާމީ ޝަރީއަތް ތަންފީޒުކުރުމަށް ގޮވައިލާ މީގެ ހަފުތާއެއް ކުރިން މާލޭގައި ބޭއްވި ހިނގައިލުމެއްގައި ވެސް އިސްލާމީ ހިލާފަތުގެ ދިދަ ބޭނުންނުކުރުމަށް ފުލުހުން ވަނީ އިލްތިމާސް ކޮށްފައެވެ. 

އެހެން ނަމަވެސް އެ ހިނގާލުމުގެ ބައިވެރިން ބުނީ އެދިދައަކީ ޢައްބާސީ ޚިލާފަތުގެ ދުވަސްވަރު ފުރަތަމަ ބޭނުން ކުރަން ފެށި ދިދައެއްކަމަށެވެ. އަދި އެދިދައަކީ ވަކި ޖަމާއަތެއްގެ އެއްޗެއް ނޫންކަމަށެވެ.

"އެހީ ހުރިހާ މުސްލިމުންގެ ދިދައެއް. ﷲ މެނުވީ ކަލަކު ނުވާ ކަމާއި މުޙައްމަދު ޞައްލަﷲ ޢަލައިހި ވަސައްލަމް އަކީ އެކަލާނގެ ރަސޫލާކަން ބަޔާންކޮށްފައި ދިދައިގައިވަނީ،" ހިނގާލުމުގެ ބައިވެރިއަކު ބުންޏެވެ. 

އިރާގާއި ސީރިއާގައި ވަކި ދައުލަތެއް އުފެއްދުމަށް ހަނގުރާމަ ކުރަމުން އަންނަ އިސްލާމިކް ސްޓޭޓް (އައިއެސް) އިން ވެސް އަންނަނީ އެމީހުންގެ ދިދައެއްގެ ގޮތުގައި އިސްލާމީ ހިލާފަތު ދިދަ ބޭނުންކުރަމުންނެވެ. ދިވެހި ރާއްޖޭގެ ހާރިޖީ ވަޒީރު ދުންޔާ މައުމޫން ވަނީ އައިއެސްގެ ހަރަކާތްތައް ދިވެހި ރާއްޖެއިން ކުށްވެރިކާކަމަށް ވިދާޅުވެ ބަޔާނެއް ނެރުއްވައިފައެެވެ. އެހެންނަމަވެސް އިސްލާމީ ހިލާފަތުގެ ދިދަ ރާއްޖޭގައި ބޭނުންކުރުން އަދި މަނާކޮށްފައެއް ނުވެއެވެ. 

މި މައްސަލައިގައި ފޭސްބުކްގެ ފެރެސް އޮފީހުގެ ބަހެއް އަދި ނުލިބެއެވެ. އީމެއިލް މެދުވެރިކޮށް އެ އޮފީހާއި ސުވާލުކުރުމުން މިއަދު ބުނީ އަވަސް މުއްދަތެއްގެ ތެރޭގައި ދިވެހިންނާމެދު ފިޔަވަޅު އަޅައިފައިވަނީ ކީއްވެކަން ސާފުކޮށްދޭނެކަމަށެވެ.