ރައީސް ޔާމިންގެ ދައުވަތަކަށް ޗައިނާ ރައީސްގެ ދެ ކަނބަލުން ރާއްޖެ ވަޑައިގަންނަވަނީ

ޗައިނާގެ ރައީސް ޝީ ޖިންޕިންގއާއި އަނބިކަނބަލުން މެޑަމް ޕެންގ ‏‏ލިއުއާން، އަދި ޗައިނާގެ އެންމެ މަތީ ފެންވަރުގެ ވަފުދެއް މި ފެށޭ ހަފްތާގައި ރާއްޖެ ވަޑައިގަތުމަށް ‏‏ވަނީ ހަމަޖެހިފައިވާކަމަށް ރައީސުލްޖުމްހޫރިއްޔާގެ އޮފީހުން ހާމަކޮށްފިއެވެ.

ޗައިނާ ރައީސްގެ ދެ ކަނބަލުން ރާއްޖެ ވަޑައިގަތުމަށް ހަމަޖެހިފައިވަނީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ދަޢުވަތަކަށް ކަމަށް އެ އޮފީހުން ހާމަކުރެއެވެ.

މިދަތުރުފުޅު ވެގެން ދާނީ ޗައިނާގެ ރައީސަކު ދިވެހި ރާއްޖެއަށް ފުރަމާނަ ‏‏ދަތުރުފުޅެއް ކުރައްވާ ފުރަތަމަ ފަހަރަށް ވެސް އެ އޮފީހުން ހާމަކުރެއެވެ.

ޗައިނާގެ ރައީސް ޝީ ޖިންޕިންގ ރާއްޖޭގައި ހޭދަ ކުރައްވާ ދުވަސްތަކުގައި ‏‏ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާ އެކު ރަސްމީ ގޮތުން ބައްދަލުކުރެއްވުމަށް ‏‏ވަނީ ހަމަޖެހިފައެވެ. އަދި ދެ ޤައުމުގެ އެންމެ މަތީ ފެންވަރުގެ ވަފްދުތަކުގެ މެދުގައި ރަސްމީ ‏‏ވާހަކަތައް ބޭއްވުމަށް ވަނީ ހަމަޖެހިފައިވާކަމަށް ވެސް ރައީސް އޮފީހުން ބުނެއެވެ. އޭގެ އިތުރުން ޗައިނާ ސަރުކާރުގެ އެހީގައި، ރާއްޖޭގައި ‏‏ހިންގޭ ތަރައްޤީގެ ދެ މަޝްރޫޢްއެއް އިފްތިތާޙް ކުރެއްވުން ވެސް މިދަތުރުފުޅުގެ ތެރޭގައި ‏‏ހިމެނިފައިވާކަމަށް ރައީސް އޮފީހުން ހާމަކުރެއެވެ. އަދި ދެޤައުމުގެ ދެމެދުގައި ތަފާތު ދާއިރާތަކުން ގިނަ އެއްބަސްވުންތަކެއްގައި ‏‏ސޮއިކުރުން ހިމެނޭކަމަށް އެ އޮފީހުގެ ވެބްސައިޓުގައި ބުނެފައިވެއެވެ.

ޗައިނާގެ ރައީސްގެ ފުރަމާނަ ދަތުރުފުޅުގައި ރައީސުލްޖުމްހޫރިއްޔާގެ އިތުރުން ‏‏ދިވެހިރާއްޖޭގެ ކުރީގެ ރައީސުލްޖުމްހޫރިއްޔާ، ރައީސް އަލްއުސްތާޛް މައުމޫން ޢަބްދުލްޤައްޔޫމާއި، ‏‏ރައްޔިތުންގެ މަޖިލީހުގެ ރައީސް އޮނަރަބްލް ޢަބްދުﷲ މަސީޙް މުޙައްމަދާ ބައްދަލުކުރެއްވުމަށް ވަނީ ‏‏ހަމަޖެހިފައެވެ.‏

ޗައިނާގެ ރައީސް ދިވެހިރާއްޖެއަށް ފުރަމާނަ ދަތުރުފުޅެއް ކުރެއްވުމަށް ‏‏ރައީސުލްޖުމްހޫރިއްޔާ ދަޢުވަތު ދެއްވާފައި ވަނީ، ހުސްވި މަހު ޗާއިނާގެ ރައީސްގެ ދަޢުވަތަކަށް ‏‏ރައީސުލްޖުމްހޫރިއްޔާ ޗައިނާގެ ނަންޖިންގއަށް ކުރެއްވި ރަސްމީ ދަތުރުފުޅުގައި ދެޤައުމުގެ ދެމެދުގައި ‏‏ބޭއްވުނު ރަސްމީ ވާހަކަތަކުގެ ތެރޭގައިކަމަށް ރައީސް އޮފީހުން ހާމަކުރެއެވެ.