ރައީސްގެ އަނބި ކަނބަލުން ފޭދޫ ސްކޫލަށް 20 ލެޕްޓޮޕް ހަދިޔާ ކުރައްވައިފި

އައްޑޫސިޓީ ފޭދޫ ސްކޫލްގެ 20 ޓީޗަރަކަށް، 20 ލެޕްޓޮޕް، ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހީމް، ހަދިޔާ ކުރައްވައިފި ކަމަށް ރައީސް އޮފީހުން ހާމަ ކުރައްވައިފިއެވެ.

ރޭ ފޭދޫ ބަނދަރު ސަރަޙައްދުގައި ބޭއްވި ރަސްމިއްޔާތުގައި، ފޭދޫ ސްކޫލް ޓީޗަރުންގެ ފަރާތުން ލެޕްޓޮޕްތަކާ ހަވާލުވެ ވަޑައިގަތީ، އެ ސްކޫލްގެ ޕްރިންސިޕަލް އަލީ މުސްޠަފާ ކަމަށް ރައީސް އޮފީހުންވަނީ ހާމަ ކުރައްވާފައެވެ.

ފޭދޫ ސްކޫލުގެ ޕްރިންސިޕަލް އަލީ މުސްޠަފާ ވިދާޅުވީ ލެޕްޓޮޕްތައް ހަވާލު ކުރައްވާފައިވަނީ ރަމްޒީގޮތުން ކަމަށެވެ. ނަމަވެސް ވަރަށް އަވަހަށް ލެޕްޓޮޕްތައް ސްކޫލާ ހަވާލު ކުރައްވާނެ ކަމަށް އަންގަވާފައިވާ ކަމަށް ވިދާޅުވިއެވެ.

އަލީ މުސްޠަފާ ވިދާޅުވީ ފޭދޫ ސްކޫލުގައި ކޮމްޕިޔުޓަރ ތަކެއް ނުހުންނާނެ ކަމަށެވެ. އެހެން ކަމުން ޓީޗަރުންނަށް ލެޕްޓޮޕް ހޯދުމުގެ މަސައްކަތް ކުރައްވަމުން ގެންދަވާތާ ދުވަސްކޮޅެއް ވެފައިވާ ކަމަށެވެ. ރައީސްގެ އަނބި ކަނބަލުން ދެއްވާ 20 ލެޕްޓޮޕް ބޭނުން ކުރާނެ އުސޫލެއް އަދި ކަނޑައެޅިފައި ނުވާ ކަމަށް ޕްރިންސިޕަލް ވިދާޅުވިއެވެ. ނަމަވެސް ލެޕްޓޮޕްތައް ހުންނާނީ ސްކޫލުގެ ބެލުމުގެ ދަށުގައި ކަމަށް ވިދާޅުވިއެވެ. "ކޮންމެ ޓީޗަރަކަށްވެސް ލެޕްޓޮޕްތައް ބޭނުން ކުރެވޭނެ. ކަނޑައެެޅޭ އުސޫލެއްގެ މަތިން ބޮރޯވެސް ކުރެވޭނެ،" އަލީ މުސްޠަފާ ވިދާޅުވިއެވެ.

އޭނާ ވިދާޅުވީ އެސްކޫލުގައި 62 ޓީޗަރުން މަސައްކަތް ކުރައްވާ ކަމަށެވެ. އުންމީދު ކުރައްވަނީ ހުރިހާ ޓީޗަރުންނަށްވެސް ލެޕްޓޮޕް ހަމަކުރުން ކަމަށް އޭނާ ވިދާޅުވިއެވެ. ރައީސްގެ އަނބި ކަނބަލުން ހަދިޔާ ކުރެއްވި ލެޕްޓޮޕްތަކަކީ އެކަމަނާ އަމިއްލަ ފުޅަށް ދެއްވި އެއްޗެއް ކަމެއް ސަރުކާރުގެ ބަޖެޓުން ދެއްވި އެއްޗެއް ކަމެއް އެނގިފައެއް ނުވެއެވެ.