ދިވެހި ދައުލަތް އަންނަނީ ފެއިލްވަމުން: އަލީ ވަހީދު
11 ސެޕްޓެމްބަރ 2014 11:50
އެމްޑީޕީގެ ޗެއަރޕާސަން އަލީ ވަހީދު
މިހާރު ފެންނަމުން އަންނަ މަންޒަރަކީ ދިވެހި ދައުލަތް ފެއިލްވަމުން އަންނަ މަންޒަރު ކަމަށް އެމްޑީޕީގެ ޗެއަރ ޕާސަން އަލީ ވަހީދު ވިދާޅު ވެއްޖެއެވެ.
އެމްޑީޕީ އޮފީހުގައި މިއަދު ބޭއްވި ޕްރެސް ކޮންފަރެންސެއްގައި ވާހަކަ ދައްކަވަމުން އަލީ ވަހީދު ވިދާޅުވީ، ސަރުކާރު ޒިންމާދާރު ކުރުމަށް އަނެއްކާވެސް އަލުން އެ ޕާޓީން ނުކުތުމަށް ތައްޔާރުވަމުން އަންނަކަމަށެވެ. އެގޮތުން މަގުމަތީގެ ހަރަކާތްތައްވެސް އަލުން ފެށުމަށް އެ ޕާޓީން ވިސްނަމުން އަންނަނަކަމަށެވެ.
"މިހާރު މިފެންނަނީ ދައުލަތް ފެއިލްވަމުން އަންނަ މަންޒަރު. މިގައުމު އަނެއްކާވެސް 30 އަހަރު ފަހަތަށް ވެއްޓޭ މައްންޒަރު މިފެންނަނީ. އިދިކޮޅު ޕާޓީއެއްގެ ހައިސިއްޔަތުން އަޅުގަނޑުމެން ކުރަންޖެހޭ ކޮންމެ ކަމެއް ކުރާނަން. މަގުމައްޗަށް ނުކުންނަށް ޖެހިއްޖެނަމަ އެކަން ކުރުމަށްވެސް ޕާޓީން އަންނަނީ ވިސްނަމުން. މިގޮތުން ޕާޓީގެ ގުނަންތައް އަލުން އެކްޓިވޭޓުކޮށް ކުރެވެން ހުރި މަސައްކަތްތައް އަޅުގަނޑުމެން މި އަންނަނީ ކުރަމުން،" އަލީ ވަހީދު ވިދާޅުވިއެވެ.
ރައްޔިތުން މަޖިލީހުގެ މެމްބަރުންނަށް ސެކިއުރިޓީ ފޯރުނުކޮށްދޭ މައްސަލައިގައި ވެސް އަލީ ވަހީދު ވަނީ ކަންބޮޑުވުން ފާޅުކުރައްވައިފައެވެ. އޭނާ ވިދާޅުވީ އެއީ ގާނޫނުއަސާސީން ލާޒިމުކޮށް ފައިވާ ކަމެއް ކަމަށެވެ. އެހެންނަމަވެސް އެކަން ކުރުމަށް ރައީސް އަބްދުﷲ ޔާމީންގެ ސަރުކާރުން ފަސްޖެހިފައިވާކަމީ ސަރުކާރުގެ ޒިންމާދާރުކަން ކުޑަކަން ރަމްޒުކޮށްދޭ ކަމެއް ކަމަށެވެ. މަޖިލީހުގައި އޮތީ ސަރުކާރު ކޯލިޝަނުގެ މެޖޯރިޓީ ނަމަވެސް ރައްޔިތުންނަށް ފޯރުކޮށްދެން ޖެހޭ ހިދުމަތްތައް ސަރުކާރުން ފޯރުކޮށްދިނުމުގައި ސަރުކާރުން ފަސްޖެހޭނަމަ އެކަމަށްވެސް އެމްޑީޕީން ތެދުވެ ސަރުކާރާ ދެކޮޅަށް ވަކާލާތު ކުރައްވާނެކަމަށް ވެސް އޭނާ ވިދާޅުވިއެވެ.
މިނިވަން ނޫހުގެ ނޫސްވެރިއާ އަހުމަދު ރިޟްވާން ގެއްލިފައިވާ މައްސަލައަކީ އެމްޑީޕީން ކަންބޮޑުވާ މައްސަލައެއް ކަން އޭނާ ފާހަގަކުރެއްވިއެވެ. އެހެން ނަމަވެސް އެ މައްސަލަވެސް ސިޔާސީ ނުކުރުމަށް އެމްޑީޕީން ނިންމާފައިވާކަމަށް އެނާ ވިދާޅުވިއެވެ.
"ރިޟްވާންގެ އާއިލާއިން ވެސް ވަނީ އެދިފައި އެ މައްސަލަ ސިޔާސީ ނުކުރުމަށް. އަޅުގަނޑުމެން އެ މައްސަލަ ސިޔާސީ ނުކުރާނަން. ސިޔާސީ ނުކުރިއަސް އަޅުގަނޑުމެން ކަންބޮޑުވޭ އެ މައްސަލައިގައި. އަޅުގަނޑުމެން ކަންބޮޑުވަނީ އެއީ ދިވެހިރައްޔިތެއްކަމުން. އިންސާނެއްކަމުން. އެއްވެސް މީހަކު ވީނުވީޢެއް ނޭގި ގެއްލުމަކީ އަޅުގަނޑުމެން ކަންބޮޑުވާނެކަމެއް،"
އަލީ ވަހީދު ވިދާޅުވީ، ރިޟްވާން ގެއްލުނުތާ މަސް ދުވަސްވެފައިވާއިރު، އޭނާ ހޯދުމުގެ މަސައްކަތުގައި ސަރުކާރުގެ "ފަހަތު ފަޔަށް" ވަރަށްބޮޑަށް ބުރަވެފައިވާ ކަމަށް އެމްޑީޕީން ދެކޭ ކަމަށެވެ.
ކިޔުންތެރިންގެ ހިޔާލު