ހައްޖުވެރިން ފުރަން ފަށާނީ މާދަމާ –މިނިސްޓްރީ

މިއަހަރު ރާއްޖެއިން ހައްޖަށްދާ މީހުންގެ ތެރެއިން މޯލްޑިވްސް ހައްޖުކޯޕަރޭޝަން ލިމިޓެޑު މެދުވެރިކޮށް ހައްޖަށްދާ މިހުން މާދަމާ ފުރަން ފަށާނެ ކަމަށް އިސްލާމިކް މިނިސްޓްރީން ހާމަ ކުރައްވައިފިއެވެ.

އެމިނިސްޓްރީން މިއަދު ބުނެފައިވަނީ އެކުންފުނީގެ ފަރާތުން ހައްޖަށްދާ 488 ހައްޖާޖީން ފުރާނީ މިމަހުގެ 11 އަދި 12 ވަނަ ދުވަހު ކަމަށެވެ.

އެމިނިސްޓްރީން ބުނެފައިވަނީ އެކްރޯ ހައްޖު އެންޑް އުމްރާ ޕްރައިވެޓް ލިމިޓެޑު މެދުވެރިކޮށް ހައްޖަށްދާ 125 ހައްޖުވެރިން ވަނީ މިމަހުގެ 8 ވަނަ ދުވަހު ވަނީ ފުރާފައި ކަމަށެވެ. މިނާ ގްރޫޕުން ހައްޖަށްދާ މީހުން ފުރުމަށް ހަމަޖެހިފައިވަނީ މިމަހުގެ 14 ވަނަ ދުވަހުއެވެ. އެގުރޫޕުގެ ފަރާތުން މިއަހަރު ހައްޖަށް ގެންދާ މީހުންގެ އަދަދަކީ 125 އެވެ.

ފަތުހު ހައްޖު އެންޑް އުމްރާ ޕްރައިވެޓު ލިމިޓެޑުގެ އެޑްވާންސް ޓީމް ފިޔަވައި ބާކީތިބި 118 ހައްޖުވެރިން ފުރުމަށް ހަމަޖެހިފައިވަނީ މިމަހުގެ 15 ވަނަ ދުވަހުއެވެ. ސިސިލްފަރު ހައްޖު އެންޑް އުމްރާ ގުރޫޕް ޕްރައިވެޓް ލިމިޓެޑް އެޑްވާންސް ޓީމު ފިޔަވައި ބާކީތިބި 121 ހައްޖުވެރިން ފުރުމަށް ހަމަޖެހިފައިވަނީ މިމަހުގެ 16 ވަނަ ދުވަހު ކަމަށް އިސްލާމިކް މިނިސްޓްރީން ވަނީ ހާމަކުރައްވާފައެވެ.