ހުވަދޫ ސްކޫލުގެ ކުލާސް ރޫމްތަކެއް ނިންމުމުގެ މަަސައްކަތް ބަޔަކާ ހަވާލު ކޮށްފި

ހުވަދުއަތޮޅު ދެކުނުބުރީ ފަރެސްމާތޮޑާގައި ސަރުކާރުން ހިންގަމުންގެންދާ ހުވަދޫ ސްކޫލުގައި ކުރިން ހަދަމުންދިޔަ 4 ކުލާސް ރޫމުގެ މަސައްކަތް ނިންނުމަށް ބަޔަކާ ހަވާލުކޮށްފިއެވެ.

ފަރެސް މާތޮޑާ ކައުންސިލްގެ ރައީސް ޢަބްދުﷲ ސަޢީދު ވިދާޅުވީ އެ ކުލާސްރޫމްތައް ނިންމުމުގެ މަސައްކަތް ހަވާލު ކޮށްފައިވަނީ ޑީއެމްއެން ހާޑުވެއާ އާ ކަމަށެވެ. މިމަސައްކަތުގެ އެއްބަސްވުމުގައި ސޮއި ކޮށްފައިވަނީ މިއަދު މެންދުރު ކަމަށްވެސް އޭނާ ވިދާޅުވިއެވެ.

ފަރެސް މާތޮޑާ ކައުންސިލްގެ އިދާރާގައި ބޭއްވި ރަސްމިއްޔާތެއްގައި ޑީއެމްއެން ހާޑުވެއާގެ ފަރާތުން މިއެއްބަސްވުމުގައި ސޮއިކުރެއްވީ އެކުންފުނީގެ ޗެއާމަން މުހައްމަދު ނިޔާޒެވެ. ފަރެސް މާތޮޑާ ކައުންސިލުގެ ފަރާތުން ސޮއި ކުރެއްވީ ރައީސް ޢަބްދުﷲ ސަޢީދެވެ.

އެ ކުލާސް ރޫމްތައް ނިންމުގެ މަސައްކަތަށް ޚަރަދު ކުރައްވަނީ އެޑިޔުކޭޝަން މިނިސްޓްރީންނެވެ. އެމަސައްކަތް ޑީއެމްއެން ހާޑުވެއާ އާ ހަވާލުކޮށްފައިވަނީ 999792.00 ރުފިޔާއަށެވެ.

ޢަބްދުﷲ ސައީދު ވިދާޅުވީ 4 ކުލާސްރޫމް ހިމެނޭ ހޯލު މިހާރުވަނީ ރާނައި ނިމިފައި ކަމަށެވެ. މިއެއްބަސްވުމުގެ ދަށުން ދެން ކުރަންޖެހެނީ ހިޔާކުރުމާއި، ސިމެންތި ޖެހުމާއި "އެހެނިހެން ފިނިޝިންގެ މަސައްކަތް" ތަކެވެ.

މި 4 ކުލާސްރޫމުގެ އިތުރަށް އެސްކޫލަށް މުޅިން އަލަށް ނަމާދުގެއެއް ބިނާ ކުރުމަށްވެސްވަނީ ޑީއެމްއެން ހާޑުވެއާ އާ އެކު ކައުންސިލުން މިއަދު ސޮއި ކުރައްވާ ފައެވެ.

20 ފޫޓު 20 ފޫޓުގެ ނަމާދުގޭގެ މަސައްކަތް ނިންމުމަށް ޑީއެމްއެން ހާޑުވެއާ އާ ހަވާލުކޮށްފައިވަނީ 424530.00 ރުފިޔާއަށެވެ. ނަމާދުގެ އިމާރާތް ކުރުމުގެ މަސައްކަތަކީ އިސްލާމިކް މިނިސްޓްރީއާއި، އެޑިޔުކޭޝަން މިނިސްޓްރީ ގުޅިގެން ހިންގާ މަޝްރޫއެއް ކަމަށް ފަރެސް މާތޮޑާ ކައުންސިލުންވަނީ ހާމަކުރައްވާފައެވެ.

މި އެއްބަސްވުމުގައިވެސް ސޮއި ކުރެއްވީ ޢަބްދުﷲ ސަޢީދާއި، މުހައްމަދު ނިޔާޒެވެ.މިދެތަނުގެ މަސައްކަތް ނިންމަން އެއްބަސްވެފައިވާ ތާރީޚެއް ދެފަރާތުން ވެފައިވާ އެއްބަސްވުމުގެ ލިޔުމުގައި ހާމަކުރައްވާފައެއް ނުވެއެވެ. މި ކުލާސްރޫމް ތަކަކީ ހުވަދޫ ސްކޫލަށް ދިމާވެފައިވާ ޖާގައިގެ ދަތިކަން ހައްލު ކުރުމަށް އިތުރުކުރާ ރޫމްތަކެކެވެ.