އެސީސީގެ މެމްބަރުކަމަށް ފަސް ބޭފުޅަކު އައްޔަނުކުރައްވައިފި
9 ސެޕްޓެމްބަރ 2014 12:09
އޭސީސީގެ މެމްބަރުކަމަށް އައްޔަނުކުރެއްވި ފަސް މެމްބަރުން: ފޮޓޯ ރައީސް އޮފީސް
އެންޓިކޮރަޕްޝަން ކޮމިޝަން(އޭސީސީ)އަށް ފަސް ބޭފުޅަކު އައްޔަނުކުރައްވައިފިއެވެ.
މިއަދު އައްޔަންކުރެއްވި ފަސް ބޭފުޅުންގެ ތެރޭގައި އެ ކޮމިޝަނުގެ ކުރީގެ ދެ މެމްބަރުންވެސް ހިމެނި ވަޑައިގަންނަވައެވެ. އެއީ ކުރިން އެކޮމިޝަނުގެ ރައީސް ކަމުގެ މަގާމުގައި ހުންނެވި ހަސަން ލުތުފީއާއި، ކުރިން އެކޮމިޝަނުގެ ނައިބް ރައީސްގެ މަގާމުގައި ހުންނެވި މުއައްވިޒް ރަޝީދެވެ.
ހަސަން ލުތުފީގެ މެންބަރު ކަމުގެ މުއްދަތު އިތުރު ފަސް އަހަރަށް އިތުރު ކުރުމަށް ރައްޔިތުންގެ މަޖިލީހުން ފާސްވީ އެ ޖަލްސާއަށް ވަޑައިގެންނެވި 75 މެންބަރުންގެ އިއްތިފާގުންނެވެ. އަދި މުއައްވިޒް ރަޝީދުގެ މެންބަރު ކަމުގެ މުއްދަތު އިތުރު ފަސް އަހަރަށް އިތުރު ކުރުމަށް ފާސްކުރީ 74 މެމްބަރުން ވޯޓު ދެއްވައިގެނެނެވެ.
މި ދެ ބޭފުޅުންގެ އިތުރުން އެކޮމިޝަނަށް އަލަށް ވަނީ ތިން މެމްބަރު އައްޔަނު ކުރައްވައިފައެވެ. އެބޭފުޅުންނަކީ ނ. ހޮޅުދޫ ބޮޑުވަޅުދޮށުގޭ، އާމިނަތު މިންނާ، ގއ. ވިލިނގިލީ ވައިޖެހޭގޭ ޔަޒުމީދު މުހައްމަދާއި، ގދ. ވާދޫ ސަދަންވިލާ، ސަފްވަތު މުހައްމަދެވެ.
އެ ތިން ބޭފުޅުންގެ ނަން ވެސް މަޖިލީހުން ފާސްވެފައިވަނީ މަޖިލީހުގެ އިއްތިފާގުންނެވެ.
ކިޔުންތެރިންގެ ހިޔާލު