އައްޑޫ އަންހެންކުއްޖާ ރަހީނު ކުރި މައްސަލައިގައި ކުޑަ ދެ ކުދިން ހައްޔަރުކޮށްފި

އައްޑޫ ސިޓީ މަރަދޫ ގައި 16 އަހަރުގެ އަންހެންކުއްޖަކު ރަހީނުކޮށް އެ ކުއްޖާއަށް ޖިންސީގޯނާ ކުރި މައްސަލައިގައި ކުޑަ ދެ ކުދިން ހައްޔަރު ކޮށްފައިވާކަަމަށް ފުލުހުން ހާމަކޮށްފިއެވެ.

ފުލުހުން ބުނީ އެ މައްސަލައިގައި މިދިޔަ އާދިއްތަ ދުވަހު ހައްޔަރު ކޮށްފައިވަނީ 16 އަހަރުގެ ފިރިހެންކުއްޖަކާ 17 އަަހަރުގެ ފިރިހެންކުއްޖެއް ކަމަށެވެ. އެ ދެކުދިންގެ ބަންދުގެ މުއްދަތަށް އެރަށު މެޖިސްޓްރޭޓު ކޯޓުން ވަނީ 10 ދުވަސް ދީފައިއެވެ.

އާއިލާއިން ރިޕޯޓުކޮށްގެން އަންހެން ކުއްޖާ ހޯދަމުން ދަނިކޮށް އެ ކުއްޖާ ތަނެއްގައި ބަންދުކޮށްފައި ހުއްޓައި ފެނިފައިވަނީ މިމަހު ދެވަނަ ދުވަހުއެވެ. އެތަނުގައި ބަހައްޓައިގެން ބަޔަކު އެކުއްޖާއަށް މަސްތުވާތަކެއްޗާ ބަނގު ރާ ބޯންދީ، ޖިންސީގޯނާ ކޮށްފައިވާކާމަށް ބެލެވޭކަމަށް ފުލުހުން ވަނީ ހާމަކޮށްފައެވެ. އެ ކުއްޖާ ފެނިފައިވަނީ ރަހީނުކުރާ 24 ގަޑީރު ފަހުންނެވެ.

މި މައްސަލައިގައި މީގެ ކުރިން ފުލުހުން ވަނީ 21 އަހަރުގެ ފިރިހެނެއް ހައްޔަރުކޮށްފައެވެ.

މިދިޔަ ހަފުތާގައި އަންހެން ކުއްޖާގެ އާއިލާއިން ބުނީ، މިއަމަލަކީ ކުރިއާލައި ރާވައިގެން ހިންގާފައިވާ އަމަލެއް ކަމަށެވެ. އެގޮތުން އެކުއްޖާ ކިޔަވާ ކުލާހުގެ ތިން އަންހެން ކުދިންގެ އަތެއްވާ ކަމަށް އާއިލާއިންވަނީ ތުހުމަތު ކޮށްފައެވެ. އަދި މީގެ ކުރިންވެސް އަންހެން ކުއްޖާއަށް "ބުލީ" (ފުރައްސާރަ) ކުރުމުގެ މައްސަލައެއް އާއިލާއިން ސްކޫލަށް ހުށަހަޅާފައިވާނެ ކަމަށެވެ. ނަމަވެސް އެކަން ސްކޫލުން ބަލާފައި ނުވާ ކަމަށްވެސް އާއިލާއިން ބުނެއެވެ.

X