ތިން އަތޮޅެއްގައި އޮއިވާލި ކަނދުފަތި ހަރުކޮށްފި
8 ސެޕްޓެމްބަރ 2014 15:45
ރާއްޖޭގެ މަސްކަނޑުތަކުގައި އަޅައިފައިވާ އޮއިވާލި ކަނދުފަތީގެ ތެރެއިން ކަނޑައިގެން ގޮސްފައިވާ 3 ކަނދުފައްޗެއް އަލުން ހަރުކޮށްފިއެވެ.
މިނިސްޓްރީއޮފް ފިޝަރީޒް އެންޑް އެގްރިކަލްޗަރ އިން ހާމަކުރައްވައިފައިވާ ގޮތުގައި މިކަނދުފަތި ހަރުކޮށްފައިވަނީ ވ. އަތޮޅާއި، މ. އަތޮޅާއި، ހދ. އަތޮޅުގައި ކަމަށެވެ.
ވ. އަތޮޅުން ކަނޑައިގެން ގޮސްފައިވާ ކަނދުފަތި ހަރުކޮށްފައިވަނީ އެއަތޮޅު ކެޔޮދޫގެ އިރު އުތުރުން 17 މޭލު ބޭރު ގައެވެ. މ. އަތޮޅުން ކަނޑައިގެންދިޔަ ކަނދުފަތި ހަރުކޮށްފައިވަނީ އެއަތޮޅު މުލަކުގެ އިރު ދެކުނުން 13 މޭލު ބޭރުގައެވެ.ހދ. އަތޮޅުން ކަނޑައިގެންދިޔަ ކަނދުފަތި ހަރުކޮށްފައިވަނީ އެއަތޮޅު ކުޅުދުއްފުށީގެ އިރު ދެކުނުން 15.5 މޭލު ބޭރު ގައެވެ. މިކަނދުފަތިތައް ހަރުކޮށް ނިމުމުން މިވަގުތަށް ކަނޑައިގެން ގޮސްފައިވާ ކަނދުފަތިތައް ހަރުކޮށް ނިމުނީއެވެ.
ފިޝަރީޒް މިނިސްޓްރީން ހާމަކުރައްވާފައިވާ ގޮތުގައި އޮއިވާލި ކަނދުފައްޗަކީ ދިވެހިންގެ ދޮށީގެ މަސްވެރިކަމުގައި ވަރަށް މުހިއްމު ދައުރެއް އަދާކުރާ ވަޞީލަތެއް ކަމަށެވެ. އެހެން ކަމުން ކަނދުފަތި ތަކުގެ ކައިރިން ކުރާ އޮއިވާލި މަސްވެރިކަމަށް ގެއްލުން ލިބޭފަދަ އެއްވެސް ޢަމަލެއް ކޮށްގެން ނުވާނެ ކަމަށް އެމިނިސްޓްރީން ވަނީ އެދިފައެވެ.
ކިޔުންތެރިންގެ ހިޔާލު