ފައިސަލް ފައުންޑޭޝަންގެ މެޑިކަލް ކޭމްޕުން 155 މީހުން ޚިދުމަތް ހޯދައިފި

މާލެއަތޮޅު ކާށިދުއާއި، ގާފަރުގައި ފައިސަލް ފައުންޑޭޝަނުން ބޭއްވި މެޑިކަލް ކޭމްޕުން 155 މީހުން ހިދުމަތް ހޯދައިފައި ވާކަމަށް އެ ފައުންޑޭޝަނުން ބުނެފިއެވެ.

މި ކޭމްޕްއަކީ ފައިސަލް ފައުންޑޭޝަންނާއި އޭޑީކޭ ހޮސްޕިޓަލާއި މެޑިކާ ގުޅިގެން ބޭއްވި ކޭމްޕެކެވެ. މިކޭމްޕް ބާއްވާފައިވަނީ ނިމިގެން ދިޔަ ހަފްތާ ބަންދުގައެވެ.

މިކޭމްޕްގައި މެޑިކާގެ، ކުޑަކުދިންގެ ހާއްސަ ޑޮކްޓަރ އެ ދެރަށުން 90 ކުދިން ވަނީ ބައްލަވާފައެވެ. އަދި އޭޑީކޭގެ ގައިނޮކޮލޮޖިސްޓް ޑޮކްޓަރ އައިޝަތު ނުސްރާ ވަނީ 55 މީހުން ބައްލަވާފައި ކަމަށްވެސް ފައިސަލް ފައުންޑޭޝަނުން ހާމަކޮށްފައިވެއެވެ. މީގެ އިތުރުން މެޑިކާގެ ރޭޑިއޮލޮޖިސްޓުގެ އެހީތެރިކަމާއެކު މާބަނޑު އަންހެނުން ސްކޭންކުރުން ފަދަ ޚިދުމަތްތައް މިކޭމްޕުގައިވަނީ ދީފައެވެ. މިފަދަ އިތުރު ކޭމްޕްތައް ބާއްވާނެ ކަމަށްވެސް އެފައުންޑޭޝަނުން ވަނީ ހާމަ ކުރައްވާފައެވެ.

ފައިސަލް ފައުންޑޭޝަންނަކީ ކާށިދޫ ދާއިރާގެ މެންބަރ ފައިސަލް ނަސީމްގެ ފައުންޑޭސަންނަކެވެ.