އަޅުގަނޑުމެންގެ މުވައްޒަފުންގެ މަސައްކަތަށް ހުރަސްއަޅާ ފަރާތްތަކަށް ޚިދުމަތް ނުދޭނަން -މޯލްޑިވް ގޭސް

ގޭސް ހިފައިގެން ގޭގެއަށް ދިޔުމުން "މާބޮޑަށް ލަސްވީ" ކަމަށް ބުނެ ގޭސް ހިފައިގެންދާ މީހާ ބައެއް ގޭގެއިން ބަންދު ކުރާ ކަމަށް މޯލްޑިވް ގޭސް ޕްރައިވެޓް ލިމިޓެޑުން ބުނެފިއެވެ.

އެކުންފުނީގެ މެނޭޖިން ޑިރެކްޓަރ ޢަބްދުﷲ މައުމޫން ވިދާޅުވީ މިހާރު ނިންމާފައިވަނީ އެގޮތަށް އަމަލުކުރާ މީހުންނަށް ޚިދުމަތް ނުދިނުމަށެވެ. "ގޭސް ހިފައިގެން ދިޔައިމައި މާބޮޑަށް ލަސްވެއްޖެ ކަމަށްބުނެ ބައެއް މީހުން އެބަދޭ އެމީހާ ގޭތެރަށްލައި ތަޅުލައިފައި ތަޅުދަނޑި ހިފައިގެން ބޭރަށް. އެގޮތަށް އަމަލުކުރާ ގޭގެއަށް ވަގުތުން ނޯޓިސް ދިނުމަށްފަހު އެގެއަށް ޚިދުމަތް ނުދޭން އަންގާފައި އޮންނާނީ،" މައުމޫން ވިދާޅުވިއެވެ. އެގޮތަށް އަމަލު ކުރުމުން އެތައް ގޭގެއަށް ފޮނުވަންޖެހޭ ގޭސް ލިބުން ލަސްވާ ކަމަށްވެސް އޭނާ ވިދާޅުވިއެވެ. އެހެން ކަމުން މިފަދަ އަމަލު ނުކުރުމަށް އޭނާ އެދިވަޑައިގެންނެވިއެވެ.

މައުމޫން ވިދާޅުވީ މިފަދަ ކަންކަމަކީ މިހާރުވެސް ހިނގަމުންދާ ކަންކަން ކަމަށެވެ. ނަމަވެސް ކޮންމެވެސް ވަރަކަށް މިމައްސަލަ މިހާރު މަދުކަމަށެވެ.

އޭނާ ވިދާޅުވީ ގޭސް ލަސްވެގެން މީހުންގެ ޝަކުވާ ވަރަށް ގިނައިން އަންނަ ކަމަށެވެ. އެހެން ކަމުން އެކުންފުނިން ގެންދަނީ އެކަން ހައްލު ކުރުމަށް ވަރަށް ބޮޑަށް މަސައްކަތް ކުރައްވަމުން ކަމަށްވެސް ވިދާޅުވިއެވެ. ގޭސް ލަސްވާންވެސް ސަބުތަކެއް އެބަހުރި ކަމަށް އޭނާ ވިދާޅުވިއެވެ. އޭގެ ތެރޭގައި ޓްރެފިކް މައްސަލަ އޭނާވަނީ ފާހަގަ ކުރައްވާފައެވެ. އަނެއް މައްސަލައަކީ އުސް އިމާރާތްތަކުގެ އެޕާޓްމަންޓްތަކަށް ގޭސް އަރުވާއިރު ލިފްޓް ބޭނުން ކުރަން ބައެއް ގޭގެއިން ހުއްދަ ނުދިނުމެވެ. "ނުވަބުރިއަށް ދިހަބުރިއަށް އެގާރަ ބުރިއަށް ހުންނަ ގޭގެއަށް އަރަން މިޖެހެނީ ބާވީސްކިލޯ ތޭވީސް ކިލޯގެ ގޭސްފުޅި ކޮނޑަށް ލައިގެން. އެއީ ވަރަށްގިނަ ވަގުތު. އަރާފައި އެފުޅި ހަވާލުކުރަން ޖެހޭނީ،" ގޭސް ލަސްވާ ބައެއް ސަބަބުތަކާ ބެހޭ ގޮތުން މައުމޫން ވިދާޅުވިއެވެ.

އޭނާ ވިދާޅުވީ ގޭސް ހިފައިގެންދާއިރު ބައެއް ގޭގެ މީހުން ފައިސާ ނަގައިފައިވެސް ނުބަހައްޓާ ކަމަށެވެ. ފައިސާ ނެތިގެން އޭޓީއެމްއަށްގޮސް ފައިސާނަގައިގެން އައިސް ލާރި އަދާ ކުރާ ކަމަށް އޭނާ ވިދާޅުވިއެވެ. އެހުރިހާ ވަގުތެއް ވަންދެން އެމީހާ ހުންނަން ޖެހުމަކީވެސް ލަސްވާން ދިމާ މައްސަލައެއް ކަމަށް ވިދާޅުވިއެވެ. " އަޅުގަނޑުމެންގެ ފަރާތުން ކަންކަން ރަނގަޅު ކުރަންޖެހޭ ފަދައިން އާންމުންވެސް ކަންކަން ރަނގަޅުކޮށް ސްޕީޑް އަވަސް ކުރަން އެބަޖެހޭ،" އޭނާ ވިދާޅުވިއެވެ. މައުމޫން ވިދާޅުވީ ބައެއް ގޭގެއަށް ގޭސް ގެންދާއިރު ގޭސްފުޅި ބޭރަށް ނެރެފައި އެފުޅީގައި ފައިސާވެސް ބަހައްޓާފައި ހުންނަ ކަމަށެވެ. "މިއީ ބައެއް ގޭގެއިން ގޭސް ގެންނަން ދެން ތައްޔާރަށް ތިބޭ މިންވަރު. އަޅުގަނޑުމެން މިޖެހެނީ ގޭސްފުޅި ބަހައްޓާފައި ހުސްފުޅި ހިފައިގެން އަންނަން. އެހާވެސް ބޮޑަށް ބައެއް މީހުން ތިބޭ އެކަމަށް ތައްޔާރުވެފައި. އަޅުގަނޑުގެ އެދުމަކީ އެންމެންވެސް ގޭސް ގެންނަވާއިރަށް ތައްޔާރުވެގެން ތިބުން. އޭރުން އަވަސްވާނީ،" މައުމޫން ވިދާޅުވިއެވެ.

އެންމެ ގެއަކުން ލަސްކުރިއަސް އެތައް ގެއަކަށް އެލަސްވުން ދިމާވާ ކަމަށް އޭނާ ވިދާޅުވިއެވެ. މިފަދަ ކަންކަމަކީ އާންމު ޚިދުމަތަކަށް ވުމުން އެންމެންވެސް ޚިދުމަތް އަވަސް ކުރުމަށް މޯލްޑިވް ގޭހާ ގުޅިގެން މަސައްކަތް ކުރުމަށް މައުމޫން އެދިވަޑައިގެންނެވިއެވެ.