ފުލުހަކަށް ހަމަލާދިން މީހަކު ދިހަހާސް ރުފިޔާއިން ޖުރިމަނާ ކޮށްފި

ގޮޅީގައި ތިބި ކުށްވެރިންތަކެއް ނެރެން އުޅުމުގެ ތެރޭގައި ފުލުހަކަށް ހަމަލާދިން ގައިދީއަކު 10000 ރުފިޔާއިން ޖުރިމަނާކޮށް 6 މަހަށް ޖަލަށް ލުމަށް ކުރިމިނަލް ކޯޓުން ހުކުމް ކޮށްފިއެވެ.

ކްރިމިނަލް ކޯޓުން މި ޙުކުމް ކޮށްފައިވަނީ އައްޑޫ ސިޓީ، ހިތަދޫ، އައްޑޫގެ،24 އަހަރުގެ ޙުސައިން އަޒުރަފު ގެ މައްޗަށެވެ.

ދަޢުލަތުން ޙުސައިން އަޒުރަފުގެ މައްޗަށް ކޮށްފައިވަނީ ފުލުހުންގެ ދަޢުރު އަދާކުރަން ހުރި ފުލުހަކަށް ހަމަލާދިނުމުގެ ކުށުގެ ދަޢުވާއެވެ. ކްރިމިނަލް ކޯޓުން ކޮށްފައިވާ ހުކުމުގައި ބުނެފައިވަނީ ހުސައިން އަޒުރަފު، ފުލުހުންގެ ބެލުމުގެ ދަށުގައި ގޮޅީގައި ހުއްޓައި، ފުލުހުން އެ ގޮޅީގައިި ތިބި އިތުރު ދެ މީހުން ގޮޅިން ނެރުމަށް ކުރި މަސައްކަތަށް ހުރަސް އަޅައި އެ ދެ މީހުން ގޮޅިން ނުނެރެވޭނެއޭ ބުނެ ފުލުހުންގެ ދައުރު އަދާކުރުމަށް ހުރަސް އަޅައިފައިވާ ކަމަށެވެ. އަދި އަޑު ގަދަކޮށް، ތަނުގެ ޢާންމު މަސްލަހަތު ނަގާލައި، ފުލުހުންނާ ދިމާލަށް ހަޑިހުތުރު ބަހުން މުޢާމަލާތުކޮށް، ބިރުދައްކައި، އިންޒާރުދީ ފުލުސް މީހާއަށް ހަމަލާދިން ކަމަށް ހެކީންގެ ހެކިބަހުން ސާބިތުވާ ކަމަށްވެސް ހުކުމުގައި ބުނެފައިވެއެވެ. ދައުލަތުން ދައުވާކޮށްފައިވަނީ ޙުސައިން އަޒުރު ފުލުސް މީހާ ގާގައި ޖަހައި، ޔުނީފޯމްގެ ވާތްފަރާތު ގަލަސްކޮޅާއި ވާތްފަރަތު ޓޯކީ ޖަހާ ފޮތިކޮޅު ނައްޓާލައިފައި ވާތީއެވެ.

ޙުސައިން އަޒުރަފުގެ މައްޗަށް މި ބާވަތުގެ ކުށެއް ސަބިތުވި 3 ވަނަ ފަހަރު ކަމަށްވާތީ، މި ކުށުގެ ޢުޤޫބާތެއްގެ ގޮތުން ފުލުހުންގެ ޤާނޫނުގެ ގެ ދަށުން ޙުސައިން އަޒުރަފު 6 މަސްދުވަހުގެ މުއްދަތަށް ޖަލަށްލުމަށާއި 10000 ރުފިޔާއިން ޖޫރިމަނާކޮށް، މި ފައިސާ 2014 ސެޕްޓެމްބަރ 03 ވަނަ ދުވަހުން ފެށިގެން 1 މަސްދުވަހުގެ ތެރޭގައި ކްރިމިނަލް ކޯޓަށް ދެއްކުމަށް ޙުސައިން އަޒުރަފަށް އަންގާ ކަމަށްވެސް ކްރިމިނަލް ކޯޓުގެ ޙުކުމުގައި ވެއެވެ.