ބަޔާޅީސް އުޅަނދެއް މިއަދު ނައްތާލައިފިއި

އެއްގަމު ދަތުރުފަތުރުގެ ޤާނޫނުގެ ދަށުން 42 އުޅަނދެއް މިއަދު ނައްތާލައިފިއެވެ. މާލޭ ސިޓީކައުންސިލާއި ފުލުހުން ގުޅިގެން މިއަދު ނައްތާލައިފައިވަހީ 36 ސައިކަލާއި، 4 ފުރޮޅުލީ 6 ވެހިކަލެކެވެ.

މިއަދު ނައްތާލި އުޅަނދުތަކުގެ ތެރޭގައި ކާރާއި، ޕިކަޕްވެސް ހިމެނެއެވެ. މިތަކެތި ނައްތާލާފައިވަނީ އެއްނަންނަރު ކުނިކޮށީގައި މިއަދު ހެނދުނުއެވެ. މިތަކެތި ނައްތާލާފައިވަނީ ޓޯވ ކުރާ އުޅަނދު ނައްތާލުމަށް އެކުލަވާލާފައިވާ ކޮމިޓީއާއި ނޫސްވެރިންގެ ހާޒިރުގައެވެ.

އެ ކޮމިޓީގައި ހިމެނެނީ މާލޭ ސިޓީ ކައުންސިލާ ފުލުހުންގެ އިތުރުން ޓްރާންސްޕޯޓް އޮތޯރިޓީ އާއި މީޑިއާ ކައުންސިލްއެވެ.

މި އުޅަނދުތައް ނައްތާލުމަށްފަހު ނޫސްވެރިންނަށް މަޢުލޫމާތު ދެއްވަމުން ކޮމިޓީގެ ޗެއާމަން މާލޭ ސީޓީކައުނސިލްގެ ޑިރެކްޓަރ ޖެނެރަލް ޢަބްދުލް ހަމީދު ވިދާޅުވީ މިއަދު ނައްތާލެވުނު އުޅަނދުތަކަކީ އެއްގަމު ދަތުރު ފަތުރުގެ ޤާނޫނާއި އެޤާނޫނުގެ ދަށުން ހެދިފައިވާ ޤަވާއިދުތަކުގެ ތެރެއިން ފުރިހަމަ ކުރަންޖެހޭ ހުރިހާ އިޖުރާތުތަކެއް ފުރިހަމަކުރުމަށް ފަހު ނައްތާލި އުޅަނދުތަކެއްކަމަށެވެ.

ކުރިއަށް އޮތްތަނުގައިވެސް މާލޭގެ މަގުތަކުގައި ހުރި ގިނަދުވަސްވީ އުޅަނދުތައް ނެގުމުގެ މަސައްކަތްތާއި އުޅަނދުތައް ނައްތާލުމުގެ މަސައްކަތް ކުރިއަށް ގެންދިޔުމަށް ކޮމިޓީން ނިންމާފައިވާކަމަށް އޭނާ ވިދާޅުވިއެވެ.