ރިޟްވާނު ގެއްލުމުގެ މައްސަލަ މަޖިލީހުގެ ރައީސްގެ ސަމާލުކަމަށް ގެނެސްފި

މިނިވަން ނިއުސްގެ ނޫސްވެރިޔާ އަހްމަދު ރިޟްވާން ގެއްލުމާ ގުޅިގެން ނޫސްވެރިންގެ ހުރި ކަންބޮޑުވުންތައް ރައްޔިތުންގެ މަޖިލީހުގެ ރައީސް އަބްދުﷲ މަސީހާ ނޫސްވެރިން ހިއްސާކޮށްފިއެވެ.

ރިޟްވާން ގެއްލުމާ ގުޅޭ ގޮތުން އެކުލަވާލާފައިވާ ނޫސްވެރިންގެ ކޮމިޓީން މަޖިލީހުގެ ރައީސާއެކު ރައްޔިތުންގެ މަޖިލީހުގައި މިއަދު ބޭއްވި ބައްދަލުވުމުގައި، ނޫސްވެރިންނަށް ކުރިމަތިވާ ގޮންޖެހުންތަކާއި ނުރައްކާތައް ނޫސްވެރިންގެ ފަރާތުން މަޖިލީހުގެ ރައީސަށް ވަރަށް ރަނގަޅަށްވަނީ އޮޅުުން ފިލުވައިދީ އެކަންކަން މަޖިލީހުގެ ސަމާލު ކަމަށް ގެންނަވާފައެވެ.

ގާނޫނުއަސާސީން ކަށަވަރުކޮށްދީ ފައިވާ މި ހައްގުތައް އެއްވެސް ބިރުވެރިކަމެއް، ބިރު ދެއްކުމެއް ނެތި ގާއިމުވެފައި ބޭއްވުމަށް މަޖިލީހުން ކުރެވެން ހުރި ހުރިހާ ކަމެއް ކޮށްދިނުމަށް ނޫސްވެރިން ވަނީ މަޖިލީހުގެ ރައީސްގެ އަރިހުން އެދިފައެވެ. މީގެ އިތުރުން، މިހާތަނަށް ނޫސްވެރިންނަށާއި ނޫސް މަޖައްލާތަކަށް އަދި ނޫސްވެރިންގެ ތަކެއްޗަށް ގެއްލުން ދީފައިވާ މައްސަލަތަކުގައި، އިންސާފު ލިބުން ލަސްވަމުންދާތީ، އެކަން ވެސް މަޖިލީހުގެ ރައީސްގެ ސަމާލުކަމަށް ގެނައެވެ.

މިބައްދަލުވުމުގައި މަޖިލީހުގެ ރައީސް ވިދާޅުވީ ނޫސްވެރިޔަކު ގެއްލުމަކީ އިންތިހާއަށް ކަންބޮޑުވެ ވަޑައިގަންނަވާ ކަމެއް ކަމަށެވެ. އަދި ނޫސްވެރިންގެ ޒިންމާ ފުރިހަމަ ގޮތުގައި ކުރިއަށް ގެންދިއުމަށް މަޖިލީހުގެ ތެރެއިން ކުރެއްވެން ހުރި ހުރިހާ ކަމެއް ކޮށްދެއްވާނެ ކަމަށް ވިދާޅުވިއެވެ. އަދި ރިޟްވާން ގެއްލުނު މައްސަލާގައި ސަރުކާރުގެ ޖަވާބުދާރީ ކުރުވުމަށް މަޖިލީހުން މަސައްކަތް ކުރައްވާނެ ކަމުގެ ޔަގީންކަން އެ މަނިކުފާނު ދެއްވި އެވެ.

މީގެ އިތުރަށް ޝަރީއަތްތައް އަވަސް ކުރުމަށްޓަކައި، ޖިނާއީ އިޖުރާއަތުގެ ބިލާއި، ހެއްކާ ބެހޭ ބިލް އަވަހަށް ނިންމުމަށް މަސައްކަތް ކޮށްދެއްވާނެ ކަމަށްވެސް ވިދާޅުވިއެވެ.

"މަޖިލީހުގެ ރައީސް އަޅުގަނޑުމެންނަށް ވަރަށް ބޮޑު ޔަގީންކަމެއް ދެއްވި، ރިޟްވާންގެ މައްސަލަ އަދި ނޫސްވެރިކަން ރައްކާތެރިކޮށް ހިމާޔަތްކޮށްފައި ބޭއްވުމަށް މަޖިލީހުން ކުރެވެން ހުރި ހުރިހާ ކަމެއް ކޮށްދެއްވާނެ ކަމަށް،" ބައްދަލުވުމުގައި ބައިވެރިވި، މިނިވަން ނިއުސްގެ ޑެޕިއުޓީ އެޑިޓަރ ޒަހީނާ ރަޝީދު ވިދާޅުވިއެވެ."އަދި ނޫސްވެރިންނަށް ބިރުދެއްކުންތައް ކުރިމަތިވިޔަސް، ނޫސްވެރިންގެ ވާޖިބު އަދާކުރުން ހުއްޓާނުލަށް ވިދާޅުވި. އެކަމުން އަޅުގަނޑުމެންނަށް ވަރަށް ބޮޑު ހިތްވަރެއް ލިބިގެންދިޔައީ." އޭނާ ވިދާޅުވިއެވެ.

ރިޟްވާން ގެއްލުމާ ގުޅޭ ގޮތުން އެކުލަވާލާފައިވާ ނޫސްވެރިންގެ ކޮމިޓީން ވަނީ ޕްރޮސިކިއުޓަރޖެނެރަލް މުހްތާޒު މުހްސިނާއި، ޕޮލިސް ކޮމިޝަނަރ ޙުސައިން ވަހީދުގެ އިތުރަށް މަޖިލީހުގެ މެޖޯރިޓީ ޕާޓީ، ޕީޕީއެމްގެ ޕާލިމެންޓަރީ ގްރޫޕްގެ ލީޑަރ އަހްމަދު ނިހާނާއި، މައިނޯރިޓީ ޕާޓީ، އެމްޑީޕީގެ ޕާލިމެންޓަރީ ގްރޫޕްގެ ލީޑަރ އިބްރާހިމް މުހައްމަދު ސާލިހާ ވެސް ބައްދަލުކޮށްފައެވެ. އަދި އިތުރު ބޭފުޅުންނާ ބައްދަލު ކުރެއްވުމުގެ މަސައްކަތް އެކޮމިޓީން ގެންދަނީ ކުރަމުންނެވެ.