ރިޟްވާން ގެއްލުނު މައްސަލައިގައި މަޖިލީހަށް ޕެޓިޝަނެއް ހުށަހަޅައިފި

ރިޟްވާންގެއްލުނު މައްސަލައިގައި އެކަށީގެންވާ މައުލޫމާތު ފޯޜުކޮށްދިނުމަށް މަސައްކަތް ކޮށްދިނުމަށް އެދި މިއަދު ހެނދުނު ރައްޔިތުންގެ މަޖިލީހަށް ޕެޓިޝަނެއް ހުށަހަޅައިފިއެވެ.

އެޕެޓިޝަނުގައި ފަސް ހާހަށްވުރެ ގިނަމީހުން ސޮއިކޮށްފައިވެއެވެ. ރިޟްވާން ގެއްލުނު ރޭގައި ހުޅުމާލޭގައި ހިނގާފައިވާ ކަންކަން ސާފުކޮށްދިނުމަށް މަޖިލީހުގެ ތެރެއިން މަސައްކަތްކޮށްދިނުމަށް އެދިފައިވެއެވެ. އަދި ރިޟްވާނަށް ދީފައިވާ މަރުގެ އިންޒާރުތަކައި ގުޅޭގޮތުން ފުލުހުން އަމަލުކޮށްފައިވާގޮތުގެ މައުލޫމާތު ރިޟްވާނުގެ އާއިލާއަށް ހިއްސާކޮށްދިނުމަށް އެދިފައިވެއެވެ.

މަޖިލީހުގެ މިނިވަން މުއައްސަސާތަކާ ބެހޭ ކޮމެޓީގައިހުރި ރިޟްވާނުގެ މައްސަލަތައް ގައުމީ ސަލާމަތާބެހޭ  ކޮމެޓީއަށް ބަދަލު ކުރުމަށް ރޭ  ވަނީ ނިންމައިފައިއެވެ. މިހެން އަމަލު ކުރުމުގެ ސަބަބުން މަޖިލީހުގައި ކުރާ މަސައްކަތްތަކުގެ ތަފްސީލު އާންމުނަށް ނޭގޭނެކަމަށް ބުނެ އެމްޑީޕީން ވަނީ ކަންބޮޑުވުން ފާޅުކޮށްފައެވެ.  އެ މައްސަލައިގައި ހިއުމަން ރައިޓްސްކޮމިޝަނާ، ޕޮލިސް އިންޓަގްރިޓީ ކޮމިޝަން މަޖިލީހަށް ހާޒިރުނުކުރަން ވަނީ ފާސްކޮށްފައެވެ.

އުމުރު28 އަހަރުގެ އަހުމަދު ރިޟްވާން އެންމެ ފަހުން ފެނިފައިވަނީ މި މަހުގެ ހަތް ވަނަ ދުވަހުގެ ރޭގައެވެ. އެރޭ އޭނާވަނީހުޅުމާލެ އަށް ދިއުމަށްޓަކައި ފެރީޓާމިނަލަށް ވަދެފައެވެ. އޭނާއެތަނަށް ވަދެފައިވާ މަންޒަރުވަނީ ސީސީޓީވީ ކެމެރާތަކަށް އަރައިފިއެވެ. އެރޭއޭނާ ލައިގެންހުރީ ކަޅުކުލައިގެފަޓުލޫނަކާއި ގަމީހެކެވެ.ރިޟްވާނާ ބެހޭ އެއްވެސް މައުލޫމާތެއް ލިބިއްޖެނަމަ 7791120 އާއި 7773250 މި ދެނަންބަރަށްގުޅައި މައުލޫމާތު ހިއްސާ ކުރުމަށްއާއިލާއިންވަނީ އެދިފައެވެ.