މޫސުމަށް އަންނަ ނޭދެވޭ ބަދަލުތައް ހައްލު ކުރުމަށް ކުދި ގައުމުތަކުން ކުރާ މަސައްކަތަށް ހުރަސް އަޅައިގެން ނުވާނެ: ރައީސް މައުމޫން
3 ސެޕްޓެމްބަރ 2014 12:53
ރައީސް މައުމޫނާއި، މިނިސްޓަރ ތާރިގު، އިންޓަނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިންގ ސްޓޭޓްސްގައި ބައިވެރިވެ ވަޑައިގަންނަވަނީ- ފޮޓޯ ރައީސް އޮފީސް
މޫސުމަށް އަންނަ ބަދަލުތަކުގެ ސަބަބުން ކުރިމަތިވާ މައްސަލަތައް ހައްލުކުރުމަށް ކުދި ޖަޒީރާ ޤައުމުތަކުން އިސްނަގައިގެން ކުރަމުންދާ މަސައްކަތްތަކަށް ހުރަސް ނޭޅުމަށް ރާއްޖޭގެ ކުރީގެ ރައީސް އަލްއުސްތާޒު މައުމޫން ޢަބްދުލް ޤައްޔޫމް ދުނިޔޭގެ ބޮޑެތި ޤައުމުތަކަށް ހޯމަދުވަހު ގޮވާލައްވައިފިއެވެ.
މި ހިނގާ ސެޕްޓެމްބަރމަހުގެ 1 އިން 4 އަށް ކުރިއަށް ގެންދާ ތިންވަނަ އިންޓަނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިންގ ސްޓޭޓްސްގައި ވާހަކަފުޅު ދައްކަވަމުން މައުމޫން ވިދާޅުވީ ކުދި ޖަޒީރާ ގައުމުތަކުން ކުރަމުންދާ މަސައްކަތްތަކަށް ހުރަސް އެޅުމުގެ ބަދަލުގައި ބޮޑެތި ގައުމުތަކުން އެމަސައްކަތަށް ފުރުޞަތު ދިނުމަށެވެ.
ރައީސް މައުމޫން ވިދާޅުވީ މޫސުމަށް އަންނަ ބަދަލުތަކުގެ ސަބަބުން ތިމާވެއްޓަށް ކުރާ ނޭދެވޭ އަސަރާ ދެކޮޅަށް ދެމެހެއްޓިނިވި ގޮތެއްގައި މަސައްކަތް ކުރުމަށް ދިމާވާ އެންމެ ބޮޑު ގޮންޖެހުމަކީ، ބައިނަލްއަޤްވާމީ މައިދާނުގައި އެމަސައްކަތަށް އެކަށީގެންވާ އެއްބާރުލުމެއް ނުލިބުން ކަމަށެވެ. މީގެ ކުރިން ބޭއްވި މީގެ ދެ ޖަލްސާގައި ތިމާވެއްޓާ ގުޅޭ މުހިންމު ޤަރާރުތައް ފާސްކޮށްފައި ހުރި ނަމަވެސް، އެޤަރާރުތަކަށް އަދިވެސް ޢަމަލީ ސިފައެއް ގެނެވިފައިނުވާ ކަމަށް މައުމޫން ވިދާޅުވިއެވެ.
ތިމާވެއްޓަށް ގެއްލުންހުރި ގޭސްތައް ޖައްވަށް ބޭރުވުމުގެ ނިސްބަތަށް ބަދަލެއް އައިސްފައިނުވާ މައްސަލަވެސް އެމަނިކުފާނު ވަނީ ސަމާލު ކަމަށް ގެންނަވާފައެވެ. އޭގެ ސަބަބުން ކުދި ޤައުމުތަކުގެ ނާޒުކު ތިމާވެށްޓަށް ކުރިމަތިވަމުންދާ ނުރައްކާތައް ދުވަހުން ދުވަހަށް އިތުރުވަމުންދާ ކަމުގައި އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ ތަރައްޤީގެ މަގުގައި ކުދި ޤައުމުތަކަށް ގިނަގުނަ ގޮންޖެހުންތަކާ ކުރިމަތިލާން ޖެހިފައިވާ ކަމަށެވެ. އެހެން ކަމުން އެއްޤައުމަކުން އަނެއް ޤައުމަކަށް އެއްބާރުލުން ދިނުމުގެ ރޫޙު، ހުރިހާ ޤައުމުތަކެއްގެ މެދުގައި އާލާކުރަންޖެހޭ ކަމަށްވެސް ވިދާޅުވިއެވެ. އަދި މިއީ ހަމައެކަނި، ތަރައްޤީވެފައިވާ ޤައުމުތަކުން، ތަރައްޤީވަމުން އަންނަ ޤައުމުތަކަށް ދޭ އެހީތެރިކަން ނޫންކަމަށްވެސް ވިދާޅުވިއެވެ. އެ ކަމަކީ އެހެން ޤައުމުތަކަށް ބަރޯސާ ނުވެ، އެ ޤައުމަކަށް ދިމާވެފައިވާ މައްސަލަތައް އެ ޤައުމަކުން އަމިއްލައަށް ޙައްލުކޮށް، އެ ޤައުމަކުން ދާންބޭނުންވާ މަންޒިލަށް ވާޞިލްވުމަށް ފަހި ކޮށްދެވޭ ފުރުޞަތަކަށް ހަދަންޖެހޭ ކަމުގައި އެމަނިކުފާނު ވިދާޅުވިއެވެ.
ސަމޮއާގައި ކުރިއަށްދާ މި ބައްދަލުވުމުގައި ރައީސް މައުމޫނު ބައިވެރިވެ ވަޑައިގަންނަވަނީ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމްގެ ޚާއްޞަ މަންދޫބެއްގެ ގޮތުން ކަމަށް ރައީސް އޮފީހުންވަނީ ހާމަކުރައްވާފައެވެ. މިބައްދަލު ވުމުގައި ތިމާވެށްޓާ ބެހޭ ވަޒީރު ތާރިގް އިބްރާހީމްވެސް ބައިވެރިވެ ވަޑައިގަންނަވައެވެ.
ކިޔުންތެރިންގެ ހިޔާލު