ފެރީ ޓާމިނަލްތަކުގެ ކެމެރާތައް ފުލުހުންގެ ވިއުގައާ ގުޅައިލުމަށް މަޝްވަރާކޮށްފި

މާލެ، ހުޅުމާލެ، ވިލިގިލީގެ ފެރީ ޓާމިނަލް ތަކުގެ ކެމެރާތައް ފުލުހުންގެ ސީސީޓީވީ ވިޔުގައާ ގުޅައިލުމަށް އެމްޓީސީސީއާ މަޝްވަރާކޮށްފައިވާކަމަށް ފުލުހުން ހާމަކޮށްފިއެވެ.

ފުލުހުން ބުނީ އާދިއްތަ ދުވަހު ބޭއްވި ބައްދަލުވުމުގައި، ފެރީ ޓާމިނަލުތަކުގައި އިތުރު ކެމެރާތައް ހަރުކުރުމާ ބެހޭގޮތުން ވެސް މަޝްވަރާ ކޮށްފައިވާ ކަމަށެވެ. އައު ކެމެރާ ހަރުކުރުމުގައި ފުލުހުންގެ އެހީތެރިކަން ފޯރުވައިދިނުމަށް ހުށަހަޅައިފައިވާ ކަމަށްވެސް ފުލުހުން ހާމަކުރެއެވެ. 

އެ ބައްދަލުވުމުގައި އެމްޓީސީސީގެ ޖެނެރަލް މެނޭޖަރ އިސްމާޢިލް އަދުޙަމްއާ، ފުލުހުންގެ އޮޕަރޭޝަންސް ކޮމާންޑްގެ ހެޑް  ޗީފް ސްޕްރިންޓެންޑެންޓް އޮފް ޕޮލިސް އިސްމާޢިލް ނަވީން ބައިވެރިވެ ވަޑައިގެންނެވިކަމަށް ފުލުހުންގެ ވެބްސައިޓުގައި ބުނެފައިވެއެވެ.