އެސްއީޒެޑު ގެ ބިލް ތަސްދީގު ކުރައްވައިފި

މިހިނގާ އޮގަސްޓް މަހުގެ 27 ވަނަދުވަހުރައްޔިތުންގެ ‏‏މަޖިލީހުން ފާސްކުރައްވާފައިވާ "ސްޕެޝަލް އިކޮނޮމިކް ޒޯނުގެ ‏‏ބިލު" (އެސްއީޒެޑު) ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް މިއަދު ‏‏ތަޞްދީޤް ކުރައްވައިފިއެވެ.

މިބިލް ރައީސް ތަޞްދީޤް ކުރެއްވުމުން ދިވެހި ސަރުކާރުގެ ގެޒެޓުގައި މިހާރުވަނީ މި ޤާނޫނު ޝާއިޢު ކުރައްވައިފައެވެ.

‏ސްޕެޝަލް އިކޮނޮމިކް ޒޯނުގެ ޤާނޫނަކީ، "ދިވެހިރާއްޖޭގައި މިނިވަން ވިޔަފާރި ‏‏ސަރަޙައްދުތައް ކަނޑައެޅުމާއި، އުފެއްދުމާއި، ހިންގުމާއި، އެ ޒޯނުތަކުގައި އިންވެސްޓްކުރުމާއި، އެ ‏‏ޒޯނުތައް ތަރައްޤީކުރާ ޑިވެލޮޕަރުންނާއި އެ ޒޯނުތަކުގައި އިންވެސްޓްކުރާ އިންވެސްޓަރުންނަށް ދެވޭ ‏‏ޢިނާޔަތްތަކާއި، ކަމާގުޅޭ އުސޫލުތައް ބަޔާންކުރުމުގެ ޤާނޫނެވެ."

‏‏މި ޤާނޫނުގެ ‏‎7‎‏ ވަނަ މާއްދާގެ (ހ) ގައިވާ ގޮތުން، މި ޤާނޫނުގެ ފުރަތަމަ ދެ ‏‏ބާބާއި، 82 ވަނަ މާއްދާގައިވާ ޢާންމު ރަދީފަށް ޢަމަލުކުރަން ފަށާނީ، މި ޤާނޫނު ދިވެހި ‏‏ސަރުކާރުގެ ގެޒެޓުގައި ޝާއިޢުކުރާ ދުވަހުގެ މެންދަމު (މިރޭ) 12 ޖެހުމުން ކަމަށް ރައީސް އޮފީހުން ހާމަކުރައްވާފައިވެއެވެ. ނެވެ.

އެ މާއްދާގެ (ށ) ‏‏ގައިވާ ގޮތުން، މި ޤާނޫނުގެ ދެންހުރި ބައިތަކަށް ޢަމަލުކުރަން ފަށާނީ، މި ޤާނޫނު ‏‏ރައީސުލްޖުމްހޫރިއްޔާ ތަޞްދީޤުކުރާ ވަގުތު، ރައީސުލްޖުމްހޫރިއްޔާ ކަނޑައަޅައި، އިޢުލާންކުރާ ‏‏ތާރީޚެއްގައި ކަމަށްވެސް ރައީސް އޮފީހުންވަނީ ހާމަކުރައްވާފައެވެ.

ޤާނޫނުގެ ފުރަތަމަ ދެ ބާބާއި، 82 ވަނަ މާއްދާގައިވާ ޢާންމު ‏‏ރަދީފު ފިޔަވައި ދެން ހުރި މާއްދާތަކަށްވެސް ޢަމަލުކުރަން ފަށާނެ ތާރީޚަކީ، 2 ސެޕްޓެމްބަރު ‏‏2014 ކަމަށް ކަނޑައަޅުއްވައި، ރައީސުލްޖުމްހޫރިއްޔާ ވަނީ މިއަދު ޤަރާރެއް ނެރުއްވާފައި ކަމަށްވެސް ރައީސް އޮފީހުން ވަނީ ހާމަކުރައްވާފައެވެ.