މާލޭގެ ފަސް ދިމާއެއްގައި ތިރީސް ގޭންގު ހަރަކާތްތެރިވޭ: ޢުމަރު

މާލޭގެ ފަސް ދިމާއެއްގައި 30 ގޭންގް ހަރަކާތްތެރި ވަމުންދާ ކަމަށް ހޯމްމިނިސްޓަރ ޢުމަރު ނަސީރު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މަދަނީ ބައެއްގެ ގޮތުގައި ފުލުހުން ޚިދުމަތްދޭން ފެށިތާ 10 އަހަރު ފުރުން ފާހަގަ ކުރުމުގެ މުނާސަބަތުގައި އިސްކަންދަރު ބިލްޑިންގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ޢުމަރު ވިދާޅުވީ މާލޭގައި ހަރަކާތްތެރިވާ 30 ގޭންގުގެ ތެރޭގައި ނުރައްކާތެރި 13 ގޭންގެއް ހިމެނޭ ކަމަށެވެ. އެގޭންގުތައް ހިންގުމަށް ފަންސާހަކަށް ލީޑަރުން ހަރަކާތްތެރިވާ ކަމަށްވެސް ވިދާޅުވިއެވެ. އެ ގޭންގު ތަކުގެ މެންބަރުންގެ ގޮތުގައި 500 އެއްހާ މީހުން ހަރަކާތްތެރިވާ ކަމަށްވެސް ހޯމްމިނިސްޓަރ ވިދާޅުވިއެވެ.

ޢުމަރު ވިދާޅުވީ ގޭންގު ތަކުން ކުރާ ކުށްތައް ގުޅިފައިވަނީ މަސްތުވާ ތަކެއްޗާ ކަމަށެވެ. މަސްތުވާ ތަކެތި ބޭނުންކުރާ ދިހަހާސް މީހުން ރާއްޖޭގައި މިހާރު އުޅޭ ކަމަށްވެސް އެމަނިކުފާނު ވިދާޅުވިއެވެ. އޭގެ ތެރެއިން 5000 މީހުންނަކީ ވަޒީފާ އަދާ ނުކުރާ މީހުން ކަމަށްވެސް ވިދާޅުވިއެވެ. އެހެން ކަމުން ފައިސާ ހޯދުމަށް އެމީހުން ނިކުންނަނީ މަގުމައްޗަށް ކަމަށްވެސް ޢުމަރު ވިދާޅުވިއެވެ. "ފޭރިގެންނާއި އެހެނިހެންވެސް ކުށް ކޮށްގެން މިމީހުން ލާރި ހޯދާ،" ޢުމަރު ވިދާޅުވިއެވެ.

މިފަދަ މީހުންގެ މައްސަލަތައް ކޯޓަށް ހުށަހެޅުމުން ފަނޑިޔާރުންނަށާއި ހެކިބަސްދޭ މީހުންނަށް ބިރުދައްކައިގެން މައްސަލަތައް ހިފަހައްޓަމުން ގެންދާ ކަމަށްވެސް އެމަނިކުފާނު ވިދާޅުވިއެވެ.

މިކަންކަމާ ފުލުހުން ކުރިމަތިލާން ޖެހޭ ކަމަށްވެސް މިނިސްޓަރ ވިދާޅުވިއެވެ. މީހުން މެރުމާއި، ވަޅި ހެރުން ފަދަ މައްސަލަތަކަކީ ފުލުހުންނަށް ދިމާވެފައިވާ ވަރަށް ބޮޑު ގޮންޖެހުމެއް ކަމަށްވެސް އެމަނިކުފާނު ވިދާޅުވިއެވެ. އެހެން ނަމަވެސް އެފަދަ ކަންކަމާ ދެކޮޅަށް ތެދުވުން ނޫން ގޮތެއް ފުލުހުންނަށް ނެތް ކަމަށް މިނިސްޓަރ ވިދާޅުވިއެވެ.