ރިޟްވާން ހޯދުމަށް އެމްޑީޕީން އެހީތެރިކަން ފޯރުކޮށްދެނީ

މިނިވަން ނޫހުގެ ނޫސްވެރިއާ އަހުމަދު ރިޟްވާން ހޯދުމަށް އެމްޑީޕީން އެހީތެރިކަން ފޯރުކޮށްދޭނެ ކަމަށް އެޕާޓީން ހާމަކޮށްފިއެވެ.

އެމްޑީޕީގެ ނާއިބު ރައީސް މުހައްމަދު ޝިފާޒު މިއަދު ވިދާޅުވީ، އެމްޑީޕީގެ ފަރާތުން ރިޟުވާނުގެ އާއިލާއާ، އިއްޔެ ބައްދަލު ކޮށްފައިވާނެ ކަމަށެވެ. އެނާގެ އާއިލާއާ، ރަހުމަތްތެރިން އިސްނައިގެން ފުރަމުން އަންނަ ޕެޓިޝަންތައް ފުރުމަށް ވެސް އެމްޑީޕީން އެހީތެރިވެދޭނެ ކަމަށެވެ. ރައްޔިތުންގެ މަޖިލީހުގެ ގައުމީ ސަލާމަތާ ބެހޭ ކޮމެޓީއަށް ހުށަހެޅުމަށް އޭނާގެ އާއިލާއިން ފުރަމުން އަންނަ ޕެޓިޝަންގައި ސޮއިކުރާނެ މީހުން ހޯދުމަށް އެހީތެރިކަން ފޯރުކޮށްދޭނެ ކަމަށް ވެސް އޭނާ ވިދާޅުވިއެވެ.

ރިޟުވާނު ހޯދުމަށް ކުރާ މަސައްކަތުގައި އެމްޑީޕީގެ މަޖިލިސް މެންބަރުން ވެސް އެހީތެރިވެ ދޭނެކަން ޝިފާޒު ހާމަކުރެއްވިއެވެ.

" މިހާރުވެސް އެމްޑީޕީގެ ޕާލިމެންޓަރީ ގްރޫޕްގެ މެންބަރުން މެދުވެރިކޮށް މަޖިލީހުން ކުރެވެން ހުރި ހުރިހާ ކަމެއް ކުރަމުން މިގެންދަނީ،"

ރިޟުވާން ހޯދުމަށް ސަރުކާރުން އެކަށީގެންވާ މަސައްކަތެއް ކުރާކަމުގެ އިހުސާސް ރައްޔިތުންނަށް ނުކުރެވޭކަމަށް ވެސް ޝިފާޒު ވިދާޅުވިއެވެ. " އެމްއެންޑީއެފް އަދި ޕޮލިހުން ވެސް ބުނޭ ރިޟްވާން ހޯދުމަށް މަސަތްކަތް ކުރާ ވާހަކަ. އެހެން ނަމަވެސް ކަންބޮޑުވެގެން މަސަތްކަތް ކުރާތަނެއް ނުފެނޭ. އެއީ ހިތުގައި އުފެދޭ ސުވާލެއް."

އުމުރު 28 އަހަރުގެ އަހުމަދު ރިޟްވާން އެންމެ ފަހުން ފެނިފައިވަނީ މި މަހުގެ ހަތް ވަނަ ދުވަހުގެ ރޭގައެވެ. އެރޭ އޭނާވަނީ ހުޅުމާލެ އަށް ދިއުމަށްޓަކައި ފެރީ ޓާމިނަލަށް ވަދެފައެވެ. އޭނާއެތަނަށް ވަދެފައިވާ މަންޒަރުވަނީ ސީސީޓީވީ ކެމެރާތަކަށް އަރައިފިއެވެ. އެރޭ އޭނާ ލައިގެންހުރީ ކަޅުކުލައިގެ ފަޓުލޫނަކާއި ގަމީހެކެވެ.

ރިޟްވާނާ ބެހޭ އެއްވެސް މައުލޫމާތެއް ލިބިއްޖެނަމަ 7791120 އާއި 7773250 މި ދެނަންބަރަށް ގުޅައި މައުލޫމާތު ހިއްސާ ކުރުމަށް އާއިލާއިންވަނީ އެދިފައެވެ.