ގޮތްނޭގޭ މަތިންދާ ބޯޓުތަކެއް ރާއްޖެއިން ފެނުމަކީ ކަންބޮޑުވާ ކަމެއް- އެމްޑީޕީ

ހުވަދު އަތޮޅާއި، ހައްދުންމަތީގެ ބައެއް ސަރަހައްދުތަކުން ގޮތްނޭނގޭ މަތިންދާ ބޯޓުތަކެއް ފެނުމަކީ ކަންބޮޑުވާ ކަމެއް ކަމަށް އެމްޑީޕީން ހާމަކޮށްފިއެވެ.

ގޮތްނޭނގޭ ބޯޓުފަހަރު އެހިސާބުން ފެނިފައިވަނީ ހުސްވި ހަފްތާގައެވެ. އެބޯޓު ފަހަރު ފެނިގެން ރިޕޯޓު ކޮށްފައިވަނީ އެސަރަހައްދުގެ މަސްވެރިންނެވެ. އެބޯޓު ފަަހަރާއެކު ރާއްޖޭގެ ކަނޑުގެ ސަރަހައްދުން ގޮތްނޭގޭ "ޑިވައިސް" ތަކެއްވެސް ވަނީ ފެނިފައެވެ.

އެމްޑީޕީން ބުނެފައިވަނީ ރާއްޖޭގެ ވައިގެ ސަރަހައްދުގައި މިފަދަ ބޯޓުފަހަރު ކަމާބެހޭ ފަރާތްތަކަށް ނޭނގި އުދުހުމަކީ އެޕާޓީން ވަރަށް ކަންބޮޑުވާ ކަމެއް ކަމަށެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ނާއިބު ރައީސް މުހައްމަދު ޝިފާޒު ވިދާޅުވީ އެފަދަ ކަމެއް ހިނގަމުން އަނައިރު އެކަމުގެ "ސައްހަ މައުލޫމާތު" ސަރުކާރުން ހާމަ ނުކުރުމަކީވެސް އެޕާޓީން އިންތިހާއަށް ކަންބޮޑުވާ ކަމެއް ކަމަށެވެ.

ރާއްޖޭގެ ވައިގެ ސަރަހައްދުގައި ގޮތްނޭގެ ބޯޓުފަހަރާއި، ކަނޑުން ފެނިފައިވާ ގޮތްނޭނގޭ "ޑިވައިސް" ތަކަކީ ރާއްޖޭގެ ރައްޔިތުންނަށް އޮތް ބިރެއްތޯ ނުވަތަ ނޫންތޯ ވެސް ސަރުކާރުން ސާފުކޮށްދޭން ޖެހޭނެ ކަމަށް އޭނާ ވިދާޅުވިއެވެ.

މިފަދަ ކަންކަމަކީ ރައްޔިތުން ނުހަނު ކަންބޮޑުވާ ކަމެއް ކަމަށްވެސް ވިދާޅުވިއެވެ. އެހެން ކަމުން އެ ތަކެތީގެ މައުލޫމާތު ހޯދުމަށް މަޖިލިސްތެރެއިން ކުރެވެންހުރި މަސައްކަތްތައް އެމްޑީޕީން ކުރާނެކަމަށް ވެސް ޝިފާޒު ވިދާޅުވިއެވެ.

" ގޮތް ނޭނގޭ މަތިންދާ ބޯޓުތަކުގެ މައްސަލަ އާއި އަދި ގޮތް ނޭނގޭ ޑިވައިސް ތަކުގެ މައްސަލަ އަޅުގަނޑުމެންގެ ޕާލިމެންޓަރީ މެންބަރުން ލައްވާ ބަލާނަން" ޝިފާޒު ވިދާޅުވިއެވެ.

މިިކަމާ ގުޅިގެން އެމްޑީޕީން ކަންބޮޑުވުން ފާޅުކޮށްފައިވާއިރު، އެމްއެންޑީއެފް އިން މިއަދު ބުނެފައިވަނީ، ހުވަދޫ ކަނޑުން މީގެ ހަފުތާއެއް ކުރިން ފެނުނު ޑިވައިސްތަކަކީ، ކަނޑުގެ ތަހުލީލު ކުރުމަށް ބޭނުން ކުރާ ތަކެތި ކަމަށެވެ. ނަމަވެސް ހުވަދު އަޮތޮޅު މަސްވެރިންނަށް ފެނިފައިވާ ބޯޓުތަކާ ގުޅޭގޮތުން އެމްއެންޑީއެފުން ބުނީ އެމައްސަލަ އަދިވެސް ތަހުގީގު ކުރަމުން އަންނަ ކަމަށެވެ.