އަޅުގަނޑުމެން މިތިބީ ސަރުކާރުގެ "އަތުގައި ހިފައިގެން" ކުރިއަށްދާން ތައްޔާރަށް-ޖޭޕީ
30 އޯގަސްޓް 2014 21:41
ދިއްދޫދާއިރާގެ ކުރީގެ މެންބަރު އަދި މިހާރު ޖޭޕީގެ އެސްޖީ އަޙުމަދު ސަމީރު ރައްޔިތުންގެ މަޖިލީހުގެ ޖަލްސާއެއްގައި
ޖުމްހޫރީ ޕާޓީ (ޖޭޕީ) އޮތީ ސަރުކާރުގެ "އަތުގައި ހިފައިގެން" ކުރިއަށްދާން ތައްޔާރަށް ކަމަށް އެޕާޓީން ބުނެފިއެވެ.
ވީޓީވީގެ "ފަސްމަންޒު" ޕްރޮގްރާމުގައި ވާހަކަ ދައްކަވަމުން އެޕާޓީގެ ސެކްރެޓަރީ ޖެނެރަލް އަޙުމަދު ސަމީރު މިރޭ ވިދާޅުވީ ޖޭޕީ އަބަދުވެސް އޮންނާނީ ރައްޔިތުންގެ ފައިދާއަށް ކުރަން ޖެހުނު ކޮންމެ ކަމެއް ކުރުމަށް ތައްޔާރަށް ކަމަށެވެ.
އޭނާ ވިދާޅުވީ އަންނަ ހަފްތާގައި ޖޭޕީއާ މަޝްވަރާ ކުރައްވާނެ ކަމަށް ޕީޕީއެމްގެ ރައީސް މައުމޫން އަބްދުލް ގައްޔޫމް ވިދާޅުވެފައިވާ ކަމަށެވެ. އެކަން ރަނގަޅު ގޮތުގައި ކުރިއަށް ގެންގޮސްފިނަމަ އެކަން ވާނީ ރައްޔިތުންނަށް ލިބޭނެ ވަރަށް ބޮޑު ކާމިޔާބަކަށް ކަމަށްވެސް އޭނާ ވިދާޅުވިއެވެ.
ޖޭޕީއަކީ މިސަރުކާރު ގެނައުމަށް އެންމެ ބޮޑަށް މަސައްކަތްކުރި އެއްޕާޓީއެވެ. ނަމަވެސް ދިމާވި މައްސަލަތަކަށްފަހު ދެވަނަ ފަހަރަށް ޖޭޕީއާއި، ސަރުކާރު "އެއްޕްލެޓް ފޯމަކަށް" އެރުމަކީ ރައްޔިތުންގެ ކުރިއެރުމަށް ލިބޭނެ ވަރަށް ރަނގަޅު ބާރަކަށްވާނެ ކަމަށެވެ. އޭނާ ވިދާޅުވީ ޖޭޕީން އޮތީ ރާއްޖެއަށް ބޭނުންވާ އިގްތިސާދީ ތަރައްގީއާއި އެހެނިހެން ކަންކަމުގައިވެސް ސަރުކާރަށް އެއްބާރުލުން ދެއްވުމަށް ތައްޔާރަށް ކަމަށެވެ. ނަމަވެސް އެކަމުގެ ރަނގަޅު ބަދަލު ފެންނާނި "ތެދުވެރިކަމާއި އިޚްލާސްތެރި ކަމާއެކު މަސައްކަތް ތަކެއް ކުރެވިގެން" ކަމަށްވެސް އޭނާ ވިދާޅުވިއެވެ.
"އަޅުގަނޑުމެން މިތިބީ އިޚްލާސްތެރި ކަމާއި، ތެދުވެރި ކަމާއެކު ސަރުކާރަށް އެއްބާރުލުން ދޭން ތައްޔާރަށް" ސަމީރު ވިދާޅުވިއެވެ.
ކިޔުންތެރިންގެ ހިޔާލު