މީހުން ގެއްލުވާލަނީ މުޖުތަމައުގައި ބިރުވެރިކަން އުފެއްދުމަށް: ބަންކީ މޫން

ވީނުވީއެއްނޭގި މީހުން "ގެއްލުވާލުމަކީ" މުޖުތަމައުގައި ބިރުވެރިކަން އުފެއްދުމަށް ބޭނުންކުރާ އުކުޅެއް ކަމަށް ޔުނައިޓެޑް ނޭޝަންސްގެ ސެކްރެޓަރީ ޖެނެރަލް ބަންކީ މޫން ވިދާޅުވެއްޖެއެވެ.

 "އިންޓަނޭޝަނަލް ޑޭ އޮފް ދަ ވިކްޓިމްސް އޮފް އެންފޯސްޑް ޑިސިޕިއަރެންސް" އާއި ގުޅިގެން ނެރުއްވި ބަޔާނެއްގައި އޭނަ ވިދާޅުވެފައިވަނީ، ވީނުވީއެއް ނޭގި މީހުން ގެއްލުމުގެ ބިރުވެރިކަން ތަހައްމަލު ކުރަންޖެހެނީ އެމީހުންގެ އާއިލާއިން އެކަނި ނޫންކަމަށެވެ. އޭގެބަދަލުގައި އެކަމުގެ އަސަރު މުޅި މުޖުތަމައަށްވެސް ކުރާކަމަށެވެ. 

"ގަދަކަމުން މީހުން ގެއްލުވައިލާ މައްސަލަައަކީ މިހާރު ބައިނަލްއަގުވާމީ މައްސަލައެއް. އެ މައްސަލަ ތައް އޮތީ ހަމައެކަނި އެފަދަ ހާދިސާތައް ހިނގާ ސަރަހައްދު ތަކުގައެއް ނޫން،" ބަންކީ މޫންގެ ބަޔާނުގައި ވިދާޅުވެފައިވެއެވެ.

އެ އާދައަކީ ކުރިން އަސްކަރީ ހުދުމުހުތާރު ވެރިކަން ހިންގާ ގައުމުތަކުގައި އަށަގަނެފައިވާ ސަގާފަތެއްކަމަށް އދ ގެ ސެކެެރެޓަރީ ޖެނެރަލް ވިދާޅުވެފައިވެއެވެ. އެހެން ނަމަވެސް މިހާރު މިފަދަ ކަންކަން ގަައުމުތަކުގެ ދާހިލީ ހަމަނުޖެހުންތަކުގެ ސަބަބުންވެސް ހިނގަމުން އަންނަކަމަށް ވަނީ ވިދާޅުވެފައެވެ. ހާއްސަކޮށް ސިޔާސީގޮތުން އިދިކޮޅު ހަދާ ފަރާތްތައް ހުއްޓުވުމަށް މިފަދަ އަމަލުތައް ހިންގާކަމަށްވެސް އެނާ ވިދާޅުވެފައިވެއެވެ.

އޭނާ ވަނީ ތިންކަމަކަށް ކަންބޮޑުވުން ފާޅުކުރައްވައިފައެވެ. ފުރަތަމަކަމެއްގެ ގޮތުގައި، ވިދާޅުވެފައިވަނީ، އިންސާނީ ހައްގުތަކަށް މަސައްކަތްކުރާ މީހުންނާއި އެމީހުންގެ އާއިލާތަކާ، އެފަދަ މައްސަލަތަކުގައި ވަކާލާތުކުރާ ވަކީލުން ފަދަ މީހުންނަށް މަލާމާތް ރައްދުވާފަދަ ކަންކަން މުޖުތަމައު ތަކުގައި ހިންގަމުން އައުމެވެ.  ދެވަނަކަމަކީ، ގެއްލޭ މީހުން ހޯދުމަށް މަސައްކަތް ކުރުމުގެ ބަދަލުގައި ޓެރަރިޒަމާ ދެކޮޅަށް މަސައްކަތްކުރާ ކަމަށް ބުނެ އެފަދަ މީހުން ހޯދުމުގައި ސަރުކާރުތަކުން ފަސްޖެހުމެވެ. ތިންވަނަކަމަކީ، ވީނުވީނޭންގި މީހުން ގެއްލޭ މައްސަލަ މުޅި ދުނިޔޭގައި ހަލުވިކަމާއެކު ފެތުރެމުން ދިއުމެވެ.

"މިނިވަން" ނޫހުގެ ނޫސްވެރިއާ އަހުމަދު ރިޟްވާން ވަނީ މީގެ 23 ދުވަސް ކުރިން ވީނުވީއެއް ނޭގި ގެއްލިފައެވެ. އުމުރު 28 އަހަރުގެ ރިޟްވާން އެންމެ ފަހުން ފެނިފައިވަނީ މި މަހުގެ ހަތް ވަނަ ދުވަހުގެ ރޭގައެވެ. އެރޭ އޭނާވަނީ ހުޅުމާލެ އަށް ދިއުމަށްޓަކައި ފެރީ ޓާމިނަލަށް ވަދެފައެވެ. އޭނާ އެތަނަށް ވަދެފައިވާ މަންޒަރުވަނީ ސީސީޓީވީ ކެމެރާތަކަށް އަރައިފިއެވެ. އެރޭ އޭނާ ލައިގެންހުރީ ކަޅުކުލައިގެ ފަޓުލޫނަކާއި ގަމީހެކެވެ.ރިޟްވާނާ ބެހޭ އެއްވެސް މައުލޫމާތެއް ލިބިއްޖެނަމަ 7791120 އާއި 7773250 މި ދެނަންބަރަށް ގުޅައި މައުލޫމާތު ހިއްސާ ކުރުމަށް އާއިލާއިންވަނީ އެދިފައެވެ.