ރިޟްވާނު ގެއްލުނު މައްސަލައިގައި 80 އަށްވުރެ ގިނަމީހުންގެ ބަޔާން ނަގައިފި

މ. ޝައިނިންގ ސްޓަރ އަޙްމަދު ރިޟްވާން ޢަބްދުﷲ، 28 ގެއްލިފައިވާ މައްސަލައިގައި މިހާތަނަށް 198 މީހުންނާ ސުވާލުކޮށް 80 އަށްވުރެ ގިނަމީހުންގެ ތަޙުޤީޤު ބަޔާން ނަގާފައިވާ ކަމަށް މޯލްޑިވްސް ޕޮލިސް ސްރވިސްއިން ހާމަކޮށްފިއެވެ.

މީގެއިތުރުންވެސް މިނިވަން ނޫހުގައި މަސައްކަތް ކުރަމުންގެންދިޔަ ރިޟްވާން އުޅުނު އެޕާޓްމަންޓުގެ ވަށައިގެންވާ ފްލެޓްތަކާއި އެޕާޓްމަންޓުތަކުގައި އުޅޭ ގިނަ ބައެއްގެ ފަރާތުން މަޢުލޫމާތު ހޯދައި މިހާރު އެއްކުރެވިފައިވަކަމަށް ފުލުހުންގެ މީޑިޔާއިން ހާމަކުރައްވައެވެ. އަދި ރިޟްވާން ހޯދުމަށާއި މައްސަލަ ތަޙުޤީޤުކުރުމުގެ މަސައްކަތުގައި މާލެ އާއި ހުޅުމާލޭގެ އެކި ސަރަޙައްދުތައް ހިމެނޭ ގޮތުން 30 އަށްވުރެ ގިނަ ތަނަކުން 293 ގަޑިއިރުގެ ވީޑިއޯ ފުޓޭޖް ހޯދައި އެތަކެތި ދިރާސާކުރުމުގެ މަސައްކަތްވެސް ކުރަމުން އަންނަ ކަމަށް ފުލުހުން ބުނެއެވެ.

މިމައްސަލާގައި ގުޅިގެން ފުލުހުން ކުރަމުންދާ ތަޙުޤީޤަށް ލިބޭ މަޢުލޫމާތަށް ބިނާކޮށް މިމައްސަލައާއި ގުޅުންހުރިކަމަށް ތުހުމަތުކުރެވޭ އެހެން މައްސަލަތަތައްވެސް ބަލަމުން ގެންދާކަމަށްފުލުހުންގެ މީޑިޔާއިންވަނީ ހާމަކުރައްވައިފައެވެ. އެގޮތުން ރިޟްވާނ ގެއްލުނުކަމަށް ބެލެވޭ، 2014 އޯގަސްޓް 7 ވަނަދުވަހުގެރޭ ހުޅުމާލޭގައި ހިނގިކަމަށް ބުނާ ޙާދިސާއާއި ގުޅޭ 3 ކާރެއް ބަލައި ފާސްކޮށް އެއިން ސާމްޕަލްނަގައި ފޮރެންސިކް ތަޙުލީލު ކުރުމުގެ މަސައްކަތް ވެސް މިހާރު ފަށާފައިވާ ކަމަށްވެސް ފުލުހުން މައުލޫމާތު ދެއްވައެވެ. އަދި އެރޭގެ ޙާދިސާގައި ބޭނުންކުރިކަމަށް ބެލެވޭ ކާރެއް ފުލުހުންގެ ބެލުމުގެދަށަށް ގެނެސް މިމައްސަލައާއި ހުރި ގުޅުން ދިރާސާ ކުރުމުގެ މަސައްކަތް ހަލުވިކަމާއެކު ކުރިއަށްދާ ކަމަށްވެސް ފުލުހުންގެ މީޑިޔާއިން ހާމަކުރައްވައެވެ.

ރިޟްވާނަށް ވީނުވީއެއް ނޭނގި ގެއްލުނުފަހުން މިއަދަވް ވަނީ 22 ދުވަސް ފާއިތުވެފައިއެވެ. އޭނާ ހޯދުމުގެ މަސައްކަތް އާއިލާއިންނާއި ހެޔޮއެދޭ ފަރާތްތަކުން އަންނަނީ ކުރަމުންނެވެ. ނަމަވެސް މިހާތަނަށް އޭނާއާއިގުޅޭ އެއްވެސް މައުލޫމާތެއް ނުލިބޭކަމަށް އާއިލާއިން ބުނެއެވެ.

އުމުރު 28 އަހަރުގެ އަހުމަދު ރިޟްވާން އެންމެ ފަހުން ފެނިފައިވަނީ މި މަހުގެ ހަތް ވަނަ ދުވަހުގެ ރޭގައެވެ. އެރޭ އޭނާވަނީ ހުޅުމާލެ އަށް ދިއުމަށްޓަކައި ފެރީ ޓާމިނަލަށް ވަދެފައެވެ. އޭނާއެތަނަށް ވަދެފައިވާ މަންޒަރުވަނީ ސީސީޓީވީ ކެމެރާތަކަށް އަރައިފިއެވެ. އެރޭ އޭނާ ލައިގެންހުރީ ކަޅުކުލައިގެ ފަޓުލޫނަކާއި ގަމީހެކެވެ.ރިޟްވާނާ ބެހޭ އެއްވެސް މައުލޫމާތެއް ލިބިއްޖެނަމަ 7791120 އާއި 7773250 މި ދެނަންބަރަށް ގުޅައި މައުލޫމާތު ހިއްސާ ކުރުމަށް އާއިލާއިންވަނީ އެދިފައެވެ.