އެއްއީޒެޑް ކޮމެޓީތައް އާދިއްތަ ދުވަހު އެކުލަވައިލާނަން: ރައީސް ޔާމިން

ރައްޔިތުންގެ މަޖިލީހުން ސްޕެޝަލް އިކޮނޮމިކް ޒޯން (އެސްއީޒެޑް) ގެ ބިލު ފާސްކުރުމާ ގުޅިގެން އެކަން ޕީޕީއެމުން ވަނީ މާލޭ އަލިމަސް ކާނިވާ ސަރަހައްދުގައި ކުލަގަދަކޮށް ފާހަގަކޮށްފައެެވެ.

އެހަފުލާގައި ރާއްޖޭގެ މަޝްހޫރު ބޭންޑުތަކުން މިއުޒިކު ކުޅެފައިވެއެވެ. ބިލު ފާސްކުރިކަމުގެ އުފަލުގައި ހަވާވެސް އެރުވިއެވެ. އަދި ރައީސް ޔާމިންގެ އަތްފުޅަށް ވަނީ ބިލުގެ ކޮޕީއެއް އަރުވައިފައެވެ. އެމަނިކުފާނާއި ބިލު ހަވާލުކޮށްދެއްވީ ޕީޕީއެމްގެ ޕާލިމެންޓަރީ ގުރޫޕުގެ ލީޑަރު އަހުމަދު ނިހާން ހުސެން މަނިކާ، މަޖިލީހުގެ ރައީސް އަބްދުﷲ މަސީހެވެ.

ރައީސުލް ޖުމްހޫރިއްޔާ އަބްދުﷲ ޔާމިން ވިދާޅުވީ ބިލު ވަރަށް އަވަހަށް ތަސްދީގު ކުރައްވާނެކަމަށެވެ. ބަންޑާރަ ނައިބުގެ ލަފާފުޅު ލިބިވަޑައިގެންފިނަމަ މިއަދުވެސް ބިލު ތަސްދީގު ކުރެއްވުމަށް ތައްޔާރަށް ހުންނެވިކަމަށް ރައީސް ވިދާޅުވިއެވެ.

އެސްއީޒެޑް ބިލުގެ ދަށުން އެކުލަވާލަން ޖެހޭ ކޮމިޓީތައް އަންނަ އާދިއްތަ ދުވަހު އެކުލަވާލައްވާނެކަމަށް ރައީސް ވިދާޅުވިއެވެ.

“މިހާރު އެއްވެސް ހުރަހެއް ނެތް ވަރަށް އަވަހަށް އަޅުގަނޑު މި ގާނޫނަކަށް ވީމަ މީގެ ދަށުން އަޅުގަނޑު އެކުލަވާލާނަން މަޝްވަރާ ދޭ ކޮމެޓީ. އެކައްޗަކީ ސިޔާސަތު ކަނޑައަޅާ ކޮމެޓީ އަނެއް ކަމަކަށް މިއޮތީ ފަންނީ ކޮމެޓީ. މި ދެ ކޮމެޓީ އެކުލަވާލާފަ ދެން އެހިސާބުން އިސްވެ އަޅުގަނޑުމެން ޕްރޮޕޯސަލް އަންނަންދެން މަޑެއް ނުކުރާނަން،" ރައީސް ވިދާޅުވިއެވެ.

ސަރުކާރުގެ އިސް ބޭފުޅުންނާ، ޕީޕީއެމްއަށް ނިސްބަތްވާ މަޖިލިސް މެމްބަރުން ވަނީ ބިލަށް ތާއީދުކުރައްވައި ވާހަކަ ދައްވައިފައެވެ.