އެސްޓީއޯއިން އަތޮޅުތަކުގައި ގިނައަދަދެއްގެ ވަޒީފާގެ ފުރުސަތު ހުޅުވައިލަނީ

މީހުން ދިރިއުޅޭ ކޮންމެ ރަށެއްގައި އާސަންދަ ލިބޭ ބޭސްފިހާރައެއް ހުޅުވުމުގެ މަޝްރޫ ނިމޭއިރު އަތޮޅުތަކުގައި 700 އަށް ވުރެ ގިނަ ވަޒީފާގެ ފުރުސަތު ހުޅުވައިލެވޭނެކަމަށް އެސްޓީއޯގެ މެނޭޖިން ޑިރެކްޓަރ އާދަމް އާޒިމް ވިދާޅުވެއްޖެ އެވެ.

މިކަން އިއުލާނު ކުރެއްވީ އެސްޓީއޯ ހެޑް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައިއެވެ.

އެކުންފުނީގެ މެނޭޖިން ޑިރެކްޓަރ އާދަމް އާޒިމް ވިދާޅުވީ އަންނަ އަހަރު ނިމުމުގެ ކުރިން ރާއްޖޭގެ ހުރިހައި ރަށެއްގައި އާސަންދަ ލިބޭ ގޮތަށް އެސްޓީއޯގެ ބޭސްފިހާރަތައް ހުޅުވުމަކީ އެ ކުންފުނީގެ އަމާޒެއްކަމަށެވެ.

" އަންނަ އަހަރުގެ ޑިސެމްބަރު މަހުގެ ނިޔަލަށް ފާމަސީތަކުގެ މަސައްކަތް ނިންމައިލެވޭތޯ މަސައްކަތް ކުރަނީ،" އާޒިމް ވިދާޅުވިއެވެ.

އާޒިމް ވިދާޅުވީ މީހުން ދިރިއުޅޭ ކޮންމެ ރަށެއްގައި ބޭސްހާރައެއް އެޅުމުގެ މަގުސަދަކީ މާލެ ނައިސް ހުރިހައި ބޭހެއް އެރަށަކުން ލިބޭނެ މަގުފަހި ކޮށްދިނުން ކަމަށެވެ. ރަށުގައި ބޭސްފިހާރަ ހުޅުވުމުގެ ސަބަބުން ވަޒީފާގެ ފުރުސަތު އިތުރަށް ފަހިވެގެން ދާނެ ކަމަށްވެސް ވިދާޅުވިއެވެ.

" އެސްޓީއޯގެ އަމާޒަކީ ރަށްރަށުގައި ގިނަ ވަޒީފާ ތަކެއް ހުޅުވާލުން އެގޮތުން މިހާރު މިވަނީ 58 ވަޒީފާ އުފެއްދިފައި. 2015 އަހަރު ނިމޭއިރު 700 އަށްވުރެ ގިނަ ވަޒީ އުފެއްދޭނެ ކަމަށް އަޅުގަނޑުމެން މިލަފާ ކުރަނީ،" އާޒިމް ވިދާޅުވިއެވެ.

ހުސްވި ޖުލައިމަހު ސާފު ފައިދާގެ ގިތުގައި އެސްޓީއޯއަށް 38 މިލިޔަން ރުފިޔާ ލިބިފައިވާކަންވެސް އެކުންފުނީގެ މެނޭޖިން ޑިރެކްޓަރ ހާމަކުރެއްވިއެވެ. މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އޭނާ ވިދާޅުވީ އެސްޓީއޯގެ މަގުސަދަކީ ކޮންމެ މަހަކު 45 މިލިޔަން ރުފިޔާ އާއި 40 މިލިޔަން ރުފިޔާގެ ސާފު ފައިދާ ހޯދުންކަމަށެވެ. އޭނާ ވިދާޅުވީ އެސްޓީއޯގެ ހިދުމަތްތަކާ އެކުންފުނިން ވިއްކާ ތަކެއްޗަކީ ރައްޔިތުން ބަލައިގަނެފައިވާ ތަކެތިކަަމަށެވެ. އެގޮތުން އެ ކުންފުނިން އަލަށް ތައާރަފްކުރި "ނޫފަހި" ބްރޭންޑުގެ ތަކެތިވެސް ހަލުވިކަމާއިއެކު ވިކެމުން އަންނަކަމަށް ވެސް އޭނާ ވިދާޅުވިއެވެ.

އެސްޓީއޯ މެދުވެރިކޮށް ރަށް ރަށަށް އިމާރާތްކުރާ ތަކެތި ފޯރު ކޮށްދިނުމަށް ވެސް މަސައްކަތް ކުރަމުން އަންނަކަމަށް އެސްޓީއޯގެ މެނޭޖިން ޑިރެކްޓަރ ވިދާޅުވިއެވެ. އެގޮތުން ސަރުކާރުން ހިންގާ މަޝްރޫއުތަކަށް އިމާރާކުރާ ތަކެތި ވިއްކުމަށް ސަރުކާރާއި ސަރުކާރު ހިއްސާވާ ކުންފުނިތަށް ގުޅިގެން މަޝްރޫއެއް ފަށާފައިވާކަން އޭނާ ހާމަކުރެއްވިއެވެ.

މީގެ އިތުރުން ރަށްރަށުން ފަސޭހައިން ކައްކާ ގޭސް ލިބޭނެ އިންތިޒާމު ހަމަޖެއްސުމަށް ވެސް ނިންމައިފައިވާކަމަށް އާޒިމް ވިދާޅުވިއެވެ.