އެސްއީޒެޑު ގެ ބިލް ފާސް ކޮށްފައިވަނީ ވަރަށް ހުދުމުހުތާރު ގޮތަކަށް- ރޮޒައިނާ
28 އޯގަސްޓް 2014 17:58
ރޮޒޭނާ އާދަމް
ސްޕެޝަލް އިކޮނަމިކް ޒޯން (އެސްއީޒެޑު)ގެ ބިލް ފާސްކޮށްފައިވަނީ ވަރަށް ހުދުމުހުތާރުކޮށް ކަމަށްބުނެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
އެ ބިލާ ގުޅޭގޮތުން އިއްޔެ ނެރުއްވި ބަޔާނުގައިވަނީ ބިލު މިހާރު އޮތްގޮތުން ވަރަށް ބޮޑަށް ކޮރަޕްޝަނަށް މަގުފަހިވުމުގެ އިތުރުން އެއީ ރާއްޖޭގެ ރައްޔިތުންނަށާއި ޤައުމުގެ މިނިވަންކަމަށް ހުރި ބޮޑު ބިރެއް ކަމަށެވެ.
މީގެއިތުރުން ލޯކަން ކައުންސިލްތަކުގެ ދައުރެއް ނެތުމާއި، ރައްޔިތުންގެ މަޖިލީހަށާއި އަދި އެހެން މިނިވަން މުއައްސަސާ އަކަށްވެސް ޖަވާބުދާރީ ކުރުމުގެ ފުރުސަތެއް މިބިލުގެ ދަށުން ނުލިބޭ ކަމަށްވެސް ރޮޒޭނާގެ ބަޔާނުގައި ބުނެފައިވެއެވެ. މީގެއިތުރުން އެސްއީޒެޑްގެ ބިލު ފަރުމާ ކުރެވިފައިވަނީ ޤާނޫނު އަސާސީގެ ރޫހާއި ޚިލާފަށް، ހަމައެކަނި ރައީސުލްޖުމްހޫރިއްޔާއަށް ހުންނަ މީހަކަށް ހުރިހާ ބިންތަކާއި، މުދަލަކަށް ބަސްވިދާޅުވެވޭ ގޮތަށް ކަމަށްވެސް އެބަޔާނުގައިވަނީ ބުނެފައެވެ.
"މިބިލުން 15 ޤާނޫނެއްގެ ބާރު މިބިލުގެ މައްޗަށް ކަނޑުވާފައިވޭ. އޭގެތެރޭގައި ލާމަރުކަޒީ އުސޫލުން އިދާރީ ދާއިރާތައް ހުންގުމުގެ ޤާނޫނާއި، މާލިއްޔާތު ޤާނޫނާއި، ބިމާބެހޭ ގާނޫނާއި، ކަސްޓަމްސް ގާނޫނާއި އަދި ހުރިހާ ޓެކްސް ގާނޫނެއް ހިމެނޭ. މިބިލުގައި ދިވެހީންނަށް ވަޒީފާ ހޯދައިދިނުމަށް ބާރެއް ނާޅާ. އަދި ރައިސުލްޖުމްހޫރިއްޔާއަށް މިގައުމުގެ ބިންތައް ބޭރުގެ ފަރާތްތަކަށް ވިއްކުމުގެ ފުރުސަތު އެބަ ލިބިދޭ. އަދި މުސްތަގުބަލުގައި މިޒޯންތައް ހެދިފައިވާ ސަރަހައްދުތަކުން ފެނިދާނެ މައުދަނެއް، ނުވަތަ ތެޔޮ ނުވަތަ އެހެންވެސް ގުދުރަތީ ވަސީލަތެއްގެ މިލްކުވެރިކަން ދިވެހީންނަށް ކަށަވަރެއް ނުކޮށްދޭ. ރޮޒައިނާގެ ބަޔާނުގައި ބުނެފައިވެއެވެ.
ކިޔުންތެރިންގެ ހިޔާލު