އިސްލާމިކް ސްޓޭޓުގެ އަމަލުތައް ރާއްޖެއިން ކުށްވެރިކޮށްފި
28 އޯގަސްޓް 2014 15:04
އިސްލާމިކް ސްޓޭޓުގެ ހަނގުރާމަވެރިން
އިސްލާމި ސްޓޭޓް (އައިއެސް) ގެ އަމަލުތައް ދިވެހިރާއްޖެއިން ކުށްވެރިކުރާކަމަށް މިނިސްޓަރ އޮފް ފޮރިންއެފެއާޒް ދުންޔާ މައުމޫނު ވިދާޅުވެއްޖެއެވެ.
އިނގިރޭސި ބަހުން ދުންޔާ މިއަދު ނެރުއްވާފައިވާ ބަޔާނެއްގައި ވިދާޅުވެފައިވަނީ ކުށެއް ނެތް ރައްޔިތުންގެ މައްޗަށް އައިއެސް އިން ހިންގަމުން އަންނަނީ ލާއިންސާނީ އަމަލުތަކެއް ކަމަށެވެ. އިސްލާމު ދީނުގެ ނަމުގައި އެ ޖަމާއަތުން އިންސާނީ ހައްގުތަކާ ހިލާފުވެ މީހުންގެ މެދުގައި ބިރުވެރިކަން އުފައްދަމުން އަންނަކަމަށެވެ. އައިއެސްގެ އަމަލުތައް ހުރިގޮތް އިސްލާމު ދީނުގައި ސުލްހަ މަސަލަސްކަމަށް ކަނޑައަޅާފައިވާ އުސޫލުތަކާއި ހިލާފުކަމަށްވެސް އެ ކަމަނާގެ ބަޔާނުގައި ވިދާޅުވެފައިވެއެވެ.
"އައިއެސްގެ އަމަލުތައް ހުރި ގޮތުން ދުނިޔެއިން އިސްލާމު ދީނާމެދު ދެކޭގޮތް ވަނީ ގޯސްވެފައި. އިސްލާމް ދީނަކީ ސުލްހައާއި އެއްބައިވަންތަކަމުގެ ދީނެއް،" ބަޔާނުގައި ދުންޔާ ވިދާޅުވެފައިވެއެވެ.
ބަޔާން ނިންމައިލައްވަމުން ވިދާޅުވެފައިވަނީ އިސްލާމީ އުމްމަތަށް ސުލްހަވެރިކަމާއި ކުރިއެރުން ލިބުން އެދިލައްވާކަމަށެވެ. އިންސާނީ ކަރާމަތަށް އިހުތިރާމް ކުރުމަށް ގޮވައިލައްވާފައިވެއެވެ. އިސްލާމު ދީނުގެ އަސްލުތަކާއި އެއްގޮތަށް އަމަލުކުރުމަށްވެސް ދުންޔާ ވަނީ އެދިލައްވައިފައެވެ. އަދި އިރާގާއި އެސަރަހައްދުގެ ސުލްހަ މަސަލަސްކަން ގާއިމް ވުމަށް އެދިލައްވާކަމަށް ވެސް ވިދާޅުވެފައިވެއެވެ.
ކިޔުންތެރިންގެ ހިޔާލު