އެމްޑީޕީގެ ލީޑާރޝިޕް އިންތިހާބު ކުރުމަށް ވޯޓުލުން މާދަ ކުރިއަށްދާނެ

އެމްޑީޕީގެ އެންމެ އިސް މަގާމުތަކަށްބޭފުޅުން އިންތިހާބުތަކުރުމަށް ބާއްވާ އިންތިހާބު މާދަމާ ކުރިއަށް ދާނެކަމަށް އެ ޕާޓީން ހާމަކޮށްފިއެވެ.

އެމްޑީޕީން ބުނީ އެޕާޓީގެ ޗެއަރޕާސަން، ރައީސް، ނާއިބު ރައީސް އަދި ޗެއަރޕަރސަންގެ ނައިބު (މާލީ) ގެ އިންތިޚާބް މާދަމާ ބޭއްވުމަށް ހަމަޖެހިފައިވާކަމަށެވެ.

ވޯޓުލުން އޮންނާނީ މާލޭ ސިޓީ ހޯލާއި، ރަށްރަށުގެ ހަރުގެ ތަކުގައެވެ. ވޯޓުލުން ކުރިއަށްދާނީ ހަވީރު 4.00 އިން ރޭގަނޑު 8.00 އަށްކަމަށް އެޕާޓީން ހާމަކުރެއެވެ.

އެ ޕާޓީގެ އެންމެ އިސް މަގާމްތަކަށް ކުރިމަތިލެއްވި ބޭފުޅުންގެ ތެރެއިން ޝަރުތު ހަމަވި ކެންޑިޑޭޓުންގެ ނަން އިއުލާންކުރި އިރު އިންތިހާބުގައި އެއްވެސް ވާދަވެރިކަމެއް ނެތެވެ. ކޮންމެ މަގާމަކަށް ވެސް ކުރިމަތިލެއްވީ އެންމެ ބޭފުޅެކެވެ. އެހެންނަމަވެސް އިންތިހާބުގައި ވޯޓުލުމުގެ ހައްގު ލިބިފައިވާ މީހުންގެ 10 ޕަސެންޓް ވޯޓު ކޮންމެ ކެންޑިޑޭޓަކު ވެސް ހޯދަން ޖެހެއެވެ.

އެމްޑީޕީން ހާމަކޮށްފައިވާ ގޮތުގައި އެޕާޓީގެ ރައީސް ކަމަށް ކުރިމަތި ލައްވާފައިވަނީ އެ ޕާޓީގެ ވަގުތީ ރައީސް ކަމުގައި މިހާރު ވެސް ރާއްޖޭގެ ކުރީގެ ރައީސް މުހައްމަދު ނަޝީދު އެކަންޏެވެ. ޗެއާޕާސަން ކަމަށް ކުރިމަތި ލެއްވީރައްޔިތުންގެ މަޖިލީހުގެ ތޮއްޑޫ ދާއިރާގެ ކުރީގެ މެމްބަރު އަލީ ވަހީދެވެ.  ނައިބު ރައީސް ކަމަށް ޝަރުތު ހަމަވީ ބާރަށު ދާއިރާގެ ކުރީގެ މެމްބަރު މުހައްމަދު ޝިފާޒު އެކަންޏެވެ. ޕާޓީގެ ނައިބު ރައީސްގެ މަގާމަށް ފޭދޫ ދާއިރާގެ ކުރީގެ މެމްބަރު އަލްހާން ފަހުމީ ވެސް ކުރިމަތިލެއްވި އެވެ. އެހެން ނަމަވެސް އޭނާ މަގާމަށް ޝަރުތު ހަމަނުވާ ކަމަށް އެމްޑީޕީގެ އިންތިހާބާ ބެހޭ ކޮމެޓީން ވަނީ ކަނޑައަޅައިފަ އެވެ.

ޗެއާޕާސަންގެ ނައިބު ކަމުގެ މަގާމަށް ޝަރުތު ހަމަވީ އިންތިހާބާ ބެހޭ ކޮމެޓީގެ މެމްބަރު އަލީ ނިޔާޒު އެކަނި ކަމަށް ވެސް އެމްޑީޕީން ވަނީ އިއުލާނުކޮށްފައެވެ.