އެސްއީޒެޑް ގާނޫނުގެ މަގުސަދަކީ އަތޮޅުތައް ތަރައްގީކުރުން: ރައީސް ޔާމިން

ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނުގެ މަގުސަދަކީ އަތޮޅުތައް ތަރައްގީ ކުރުން ކަމަށް ރައީސުލްޖުމްހޫރިއްޔާ އަބްދުﷲ ޔާމިން ވިދާޅުވެއްޖެއެވެ.

ރައީސް މިހެން ވިދާޅުވީ ޕީޕީއެމްގެ މެމްބަރުން އިތުރުކުރުމަށް ނަސަންދުރަ ޕެލެސް ހޮޓަލުގައި އިއްޔެ ބޭއްވި ހަފުލާއެއްގައި ވާހަކަ ދައްކަވަމުންނެވެ.

ރައީސް ޔާމިން ވިދާޅުވީ ހަމައެކަނި ސަރުކާރު އޮފީސްތަކުން އަތޮޅުތަކުގެ ރައްޔިތުންނަށް ވަޒީފާގެ ފުރުސަތު ދީގެން ރާއްޖެ ތަރައްގީ ނުވާނެކަމަށެވެ. އެސްއީޒެޑް ބިލުން ރައީސުލްޖުމްހޫރިއްޔާއަށް ބާރު ތަކެއް ލިބޭ ކަމަށް ދަށްކާ ވާހަކަތައް ގަބޫލު ނުކުރުމަށް ވެސް އެމަނިކުފާނު އެދިލެއްވިއެވެ. އެމަނިކުފާނުވިދާޅުވީ ރާއްޖެ ތަރައްގީކުރަން ފުރުސަތު ލިބެންޖެހޭނެ ކަމަށެވެ.

"އަޅުގަނޑު މިކުރާމެއް ކުރަން ފުރުސަތު ލިބެން ޖެހޭ، އެހެންނޫނީ ތަރައްގީއެއް ނާންނާނެ. އަޅުގަނޑު ހަމަ މަގުން ނުދާނަމަ މަޖިލިސް މެންބަރުން އަޅުގަނޑު ޖަވާބުދާރީ ކުރުވޭނެ. (ރިޔާސީ ދައުރުގެ) ފަސް އަހަރުން ހަތަރު އަހަރު ބަކީ މިއޮތީ. ހަތަރު އަހަރުތެރޭގައި ހުވަފެންތައް ހަގީގަތަކަށް ހަދަން ބޭނުން. ފުރުސަތު ދެއްވާ. ހަގީގަތުގައި ވެސް ބޭނުމަކީ އަތޮޅުތައް ތަރައްގީ ކުރުން. އަތޮޅުތެރޭގައި ހަމައެކަނި ސަރުކާރު އޮފީސްތަކުން ވަޒީފާ ދިނުމުން ތަރައްގީ އެއް ނުކުރެވޭނެ." ރައީސް ޔާމިން ވިދާޅުވިއެވެ.

އެސްއީޒެޑް ބިލުގެ ސަބަބުން ރާއްޖޭގައި އިސްލާމް ދީނާއި ހިލާފު ކަންތަތަކަށް މަގުފަހި ވާނެކަމަށް އިދިކޮޅު ފަރާތްތަކުން ދައްކާ ވާހަތަކަށް ވެސް ރައީސް ޔާމިން ރައްދުދެއްވިއެވެ. އެމަނިކުފާ ވިދާޅުވީ ޕީޕީއެމް އަކީ އިސްލާމް ދީން ދަމަހައްޓާނެ ޕާޓީއެއްކަމަށެވެ. އެޕާޓީއަކީ ގައުމުގެ ހަމަޖެހުން ގާއިމް ކުރުމަށް ވެސް މަސަތްކަތް ކުރާ ޕާޓިއެއް ކަމަށް ވިދާޅުވިއެވެ.

"ރައީސުލްޖުމްހޫރިއްޔާއަށް ބާރުތަކެއް އޮތުމުން ކަންބޮޑުވާކަށް ނުޖެހޭ. މިއީ ރައީސްއެއް ދިވެހި ރައްޔިތުންނަށް ގެއްލުވާ ކަމެއް ނުކުރާނެ. މި ރައީސްއަށް އެކަން ކުރަން ޕީޕީއެމުން ވެސް ފުރުސަތެއް ނުދޭނެ،"

މި ހަފުލާގައި ޕީޕީއެމްގެ ރައީސް މައުމޫން އަބްދުލް ގައްޔޫމުވެސް ބައިވެރިވެ ވަޑައިގެންނެވިއެވެ.

ރައީސް މައުމޫނު ވެސް ވިދާޅުވީ ޕީޕީއެމުން މަސައްކަތް ކުރަނީ ރާއްޖެ އަށް ސުލްހަ ގެނައުމަށް ކަމަށެވެ. އެސްއީޒެޑް ބިލުގެ މަސައްކަތްތައް ނިމުމުގެ ސަބަބުން އިއްޔެއަކީ ޕީޕީއެމް އަށް ވަރަށް ބޮޑު އުފާތަކެއް ލިބިގެން ދިޔަ ދުވަހެއްކަމަށް ވިދާޅުވިއެވެ.

"މިއަދަކީ ރާއްޖެއަށް ފޮނި އުންމީދުތަކެއް ހާސިލް ކުރެވިގެންދާނެ ދުވަހެއް. އެއީ އިކޮނަމިކް ޒޯންގެ ބިލު ފާސް ވެގެން ދިއުން،" ރައީސް މައުމޫނު ވިދާޅުވިއެވެ.

ޕީޕީއެމް، އެމްޑީއޭ، އަދާލަތާއި ޖުމްހޫރީ ޕާޓީގެ މަޖިލިސް މެމްބަރުން ވޯޓު ދެއްވައިގެން އެސްއީޒެޑް ބިލު ފާސްކޮށްފައިވަނީ ރޭ 11:05 ހައިއިރުއެވެ. އެބިލާއި އެއްކޮޅަށް 60 މެމްބަރުން ވޯޓު ދެއްވިއެވެ. ބިލާއި ދެކޮޅަށް ވޯޓު ދެއްވީ 15 މެމްބަރުންނެވެ. އިދިކޮޅާށް ވޯޓުދިނީ އެމްޑީޕީ މެމްބަރުންނެވެ.