ހުޅުމާލޭގައި ހިނގި އެކްސިޑެންޓެއްގައި ކުޑަކުއްޖަކު ޒަހަމްވެއްޖެ
28 އޯގަސްޓް 2014 11:11
ދެ ސައިކަލުޖެހި އެކްސިޑެންޓްވެފައި: މިއަދު ހެނދުނު ހުލުމާލޭގައި ހިނގި އެކްސިޑެންޓެއްގައި ކުޑަކުއްޖަކަށް ވަނީ އަނިޔާވެފައި -- ޕޮލިސް ފައިލް ފޮޓޯ
ހުޅުމާލޭގައި މިއަދު ހިނގި އެކްސިޑެންޓެއްގައި ކުޑަކުއްޖަކު ޒަހަމްވެފައިވާކަމަށް ފުލުހުން ހާމަކޮށްފިއެވެ.
އެކްސިޑެންޓު ހިނގީ ހުޅުމާލެ، ނިރޮޅުމަގު ގައި މިއަދު ހެނދުނު 07:05 ހައިރުކަމަށް ފުލުހުންގެ ވެބްސައިޓުގައި ބުނެފައިވެއެވެ.
ފުލުހުން ބުނީ، މި އެކްސިޑެންޓުގައި އަނިޔާވެފައިވަނީ 15 އަހަރުގެ ފިރިހެން ކުއްޖަކަށް ކަމަށެވެ. އެކުއްޖާގެ ބޮލަށް ސީރިއަސް އަނިޔާތަކެއް ލިބުމުގެ ސަބަބުން ހުޅުމާލޭ ހޮސްޕިޓަލުގައި ފަރުވާދިނުމަށްފަހު އައިޖީޢެމް ހޮސްޕިޓަލަށް ބަދަލުކޮށްފައިވާކަމަށް ފުލުހުން ބުނެއެވެ.
އެކްސިޑެންޓު ހިނގި ވަގުތު ކުޑަކުއްޖާ އިނީ ސައިކަލެއްގެ ފަހަތުގައިއެވެ. އެކްސިޑެންޓު ހިނގީ ކުޑަ ކުއްޖާ އިން ސައިކަލު މަގުގެ އެއްކައިރީ މަޑުކޮށްފައި އިނުމަށްފަހު ދުއްވާލިވަގުތު، ބާރު ސްޕީޑްގައި ދުއްވާފައިދިޔަ ސައިކަލެއްގައި ޖެހިގެން ކަމަށް ފުލުހުން ބުނެއެވެ.
ބާރު ސްޕީޑްގައި ދުއްވާފައިދިޔަ ސައިކަލު އެކްސިޑެންޓް ވުމުންވެސް މަޑުނުކޮށް ފިލާފައިވާކަމަށް ފުލުހުން ބުނެއެވެ. ފިލި މީހާއާއި، އޭނާ ދުއްވި ސައިކަލު ހޯދުމުގެ މަސައްކަތް ފުލުހުން ކުރަމުން އަންނަކަމަށް ފުލުހުންގެ ވެބްސައިޓުގައި ބުނެފައިވެއެވެ.
ކިޔުންތެރިންގެ ހިޔާލު