ހުވަދޫ ކަނޑުން ގޮތްނޭގޭ އުދުހޭ އެއްޗެއް ފެނުނު: އެމްއެންޑީއެފް
28 އޯގަސްޓް 2014 9:24
ހުވަދު އަތޮޅު ދައްކުވައިދޭ ޗާޓެއް
ހުވަދޫ ކަނޑުން ގޮތްނޭގެ އުދުހޭ އެއްޗެއް ހޯމަދުވަހު ފެނިފައިވާކަމަށް މޯލްޑިވިސް ނެޝަނަލް ޑިފެންސް ފޯސް (އެމްއެންޑީއެފް) އިން ހާމަކޮށްފިއެވެ.
ސިފައިން ނެރެފައިވާ ބަޔާނެއްގައި ބުނެފައިވަނީ އެ މައްސަލަ މިހާރު އެކުވެރި ގައުމުތަކާއި ގުޅިގެން ތަހުގީގު ކުރަމުން އަންނަކަމަށެވެ. ނަމަވެސް އޭގެ އިތުރު މައުލޫމާތެއް އެ ބަޔާނުގައި ހާމަކޮށްފައެއް ނުވެއެވެ.
ބަޔާނުގައި ބުނެފައިވަނީ ދެދުވަހުގެ މަތިން ކަނޑުގެ ތަހުލީލުތަކަށް ބޭނުންކުރާ ޒާތުގެ ދެ ބޮއި ވެސް ހުވަދޫ ކަނޑުން މަސްވެރިންނަށް ފެނިގެންފައިވާކަމަށެވެ. އެތަކެތި ސިފައިންނާ ސިފައިންނާއި ހަވާލުކޮށްފައިވާކަމަށް ވެސް ބަޔާނުގައި ބުނެފައިވެއެވެ. އެބޮއިތަކާއި ބެހޭ މަޢުލޫމާތު ކަމާއިބެހޭ ބައިނަލްއަޤްވާމީ އިދާރާތަކާ ގުޅިގެން ހޯދުމުގެ މަސައްކަތްވެސް ކުރަމުން އަންނަކަމަށް ސިފައިން ބުނެއެވެ.
އެމްއެންޑީއެފުން މިހެން ބުނެފައިވާއިރު، ޖަރުމަނު ވިލާތުގެ "އާރުވީ ސޮންނޭ" ބޯޓު މިމަހު 7 ވަނަ ދުވަހު ވަނީ ރާއްޖެއަށް އައިސްފައެވެ. އެ ބޯޓުން ރާއްޖޭގެ ކަނޑުގެ ދިރާސާތަކެއް ކުރަމުން ގެންދާނެކަމަށް ސަރުކާރުން ވަނީ ހާމަކޮށްފައެވެ. ނަމަވެސް އެބޯޓުން އެންމެ ފުރަތަމަ ބަލާނީ ތ. އަތޮޅާއި ލ. އަތޮޅާއި ދިމާ ބޭރު ކަނޑުގެ ސަރަހައްދުކަމަށް ސަރުކާރުން ހާމަކޮށްފައިވެއެެވެ.
"އާރުވީ ސޮންނޭ" އިން ރާއްޖޭގެ އެތެރެވަރިއާއި ބޭރު ކަނޑުގެ ސަރަހައްދު ބަލާ ހަރަކާތްތެރިވާން ފަށައިފައިވާތީ އެކަމަށް ސަމާލުވުމަށް މިމަހު 10 ވަނަ ދުވަހު ސިފައިންވެސް އިލްތިމާސް ކޮށްފައިވެއެވެ.
ކިޔުންތެރިންގެ ހިޔާލު