މިފްކޯގެ ހުރިހާ މުވައްޒަފުން ޕީޕީއެމަށް ސޮއިކޮށްފި
27 އޯގަސްޓް 2014 15:23
މިއަދު ނަސަންދުރަ ޕެލަސް ހޮޓަލުގައި ބޭއްވި ހަފުލާއެއްގައި މީހަކު ޕީޕީއެމާ ފޯމުތަކެއް ހަވާލުކުރަނީ: ފޮޓޯ ޓުވިޓަރ
މޯލްޑިވިސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ހުރިހާ މުވައްޒަފުން ޕީޕީއެމަށް ސޮއިކޮށްފިއެވެ.
މިއަދު މެންދުރު ނަސަންދުރަ ޕެލެސް ހޮޓަލުގައި ޕީޕީއެމުން ބޭއްވި ރަސްމިއްޔާތެއްގައި މިފްކޯ އިން ވަނީ47 މުވައްޒަފެއްގެ ފޯމު ޕީޕީއެމްއާ ހަވާލުކޮށްފައެވެ. އެ ފޯމުތައް ހަވާލު ކުުރުމާއެކު އެކުންފުނީގެ ހުރިހައި މުވައްޒަފުންނަކީ ޕީޕީއެމްގެ މެމްބަރުންކަމަށް އެ ހަފުލާގައިވަނީ އިއުލާނުކޮށްފައެވެ. "މަސް ގޮފި" ނަމުގައި ޕީޕީއެމްގެ ގޮތްޕެއް އެ ކުންފުނީގެ މުވައްޒަފުން ހުޅުވިކަން ވެސް އެ ހަފުލާގައިވަނީ އިއުލާނުކޮށްފައިއެވެ.
މީގެއިތރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) ގެ ސީއީއޯ މ. ރަނިކަ، އިބްރާހިމް އަބްދުއްރައްޒާގް ވެސް ވަނީ ޕީޕީއެމަށް ސޮއިކުރައްވައިފައެވެ.
އެ ހަފުލާގައި ޖުމްހޫރީ ޕާޓީއާއި އެމްޑީޕީގެ ބައެއް ކައުންސިލަރުން ޕީޕީއެމަށް ސޮއިކުރައްވާފައިވެއެވެ. އޭގެތެރޭގައި ށ. ކޮމަންޑޫ ކައުންސިލްގެ ނައިބުރައީސް، ކ. ދިއްފުށި ކައުންސިލްގެ މެމްބަރު އަލީ ޖިނާދު، އެ ކައުންސިލްގެ ނައިބު ރައީސް ހުސެއިން ޝަހުނީޒް ހިމެނިވަޑައިގަންނަވައެވެ.
ކައުންސިލަރުންގެ އިތުރުން، ފިލްމީ ފަންނާނުނާ، ލަވަކިއުންތެރިނާ، ބައެއް މަސްވެރިން ވެސް މިއަދު ޕީޕީއެމަށް ސޮއިކުރިއެވެ.
ނަސަންދުރައިގައި އޮތް ހަފުލާގައި ޕީޕީއެމްގެ ގިނައަދަދެއްގެ ގޮފި ހުޅުވިކަން ވެސް އިއުލާނު ކޮށްފައިވެއެވެ. އޭގެ ތެރޭގައި، ހިމެނެނީ ހުޅުމާލެ ގޮތްޕަކާައި، ފެލިދޫގެ ދެ ގޮތްޕާައި، އައްޑޫ ސިޓީ ހިތަދޫ އުތުރު ދާއިރާގެ ދެ ގޮތްޕާއި، ފުވައްމުލަކު ގޮތްޕެކެވެ.
ޕީޕީއެމްގެ އާންމު ގަވާއިދުގައި ބުނެފައިވާގޮތުން އެ ޕާޓީއަށް ދައުލަތުން ލިބޭ އާމްދަނީގެ ފަންސާސް އިންސައްތަ އާންމު ގޮފިތަކަށް ބަހަންޖެހެއެވެ.
ކިޔުންތެރިންގެ ހިޔާލު