މޫދަށް އެޅިފައިވާ ތެޔޮ ސާފުކޮށް ނިމިއްޖެ: ސްޓެލްކޯ
27 އޯގަސްޓް 2014 14:10
މާލޭ ބޮޑުތަކުރުފާނު މަގުގައި އޮންނަ މޫދަށް އެރޭ ޓްރެކް: ފޮޓޯ - ގޫގުލް ޕުލަސް
ތެޔޮ ހޮޅިއެއް ފަޅައިގެން ދިއުމުގެ ސަބަބުން މާލޭގައި މޫދަށް އެރޭ ޓްރެކް ސަރަހައްދަށް އެޅިފައިވާ ތެޔޮ ސާފުކޮށް ނިމިފައިވާކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ހާމަކޮށްފިއެވެ.
ތެޔޮ ހޮޅި ފަޅައިގެން ދިއުމުގެ ހާދިސާ ހިނގާފައިވަނީ، މިދިޔަ އާދިއްޔަ ދުވަހުއެވެ.
ސްޓެލްކޯގެ ސީނިއަރ އިންޖިނިއަރ އިބްރާހިމް ރައުފް މިއަދު ވިދާޅުވީ، ތެޔޮ ސާފުކޮށް މޫދަށް އިތުރަށް ތެޔޮ ލީކުވެ ނުދިނުމަށް ޕްރޮޓެކްޝަން ޝީޓު އެ ސަރަހައްދުގައި ސްޓެލްކޯގެ ފަރާތުން ޖަހާފައިވާކަމަށެވެ.
"ތޮޔޮ ސާފުކުރާ ވަސީލަތްތަކުގެ އެހީގައި މޫދުގައި ހުރި ތެޔޮ މިހާރުވާނީ ސާފުކޮށް ނިމިފައި. އަދި އިތުރަށް ތެޔޮ ލީކުވިޔަ ނުދިނުމަށް އެ ސަރަހައްދުގައި ވަނީ ޕްރޮޓެކްޝަން ޝީޓު ޖަހާފައި،" ރައުފް ވިދާޅުވިއެވެ.
މޫދަށް ތެޔޮ ލީކުވެފައިވަނީ، ބޮޑުތަކުރު ފާނު މަގުގައި ހުންނަ "އީޒީ ފިލް" ޕެޓްރޯލް ސްޓޭޝަނުގެ ކުރިމަތީގައި ހުންނަ ސްޓެލްކޯގެ އިންޖީނުތަކަށް ތެޔޮ ބަރުކުރާ ޕަމްޕު ސްޓޭޝަނުގެ ހޮޅިއެއް ފަޅައިގެން ދިއުމުގެ ސަބަބުންނެވެ. ފަޅައިގެން ގޮސްފައިވާ ހޮޅި މިހާރު ވަނީ މަރާމާތުކޮށްފައެވެ.
ކިޔުންތެރިންގެ ހިޔާލު