ރިޟްވާން ގެއްލުނު މައްސަލައިގައި ހަތަރު މީހެއްގެ ޕާސްޕޯޓު ހިފަހައްޓައިފި

އަހުމަދު ރިޟްވާން ގެއްލުނު މައްސަލައިގައި ހަތަރު މީހެއްގެ ޕާސްޕޯޓު ހިފަހައްޓައިފި ކަމަށް މީޑިއާތަކުގައި ރިޕޯޓުކޮށްފިއެވެ.

ނަމަވެސް މިމައްސަލައާއި ގުޅިގެން އިމިގްރޭޝަނުން ވެސް އަދި ފުލުހުންނެއްވެސް ރަސްމީ އެއްވެސް މަޢުލޫމާތެއް އަދި ހާމައެއް ނުކުރެއެވެ. 

ރިޟްވާން ހޯދުމަށް ކުރަމުންގެންދާ މަސައްކަތްތަކުގެ މައުލޫމާތު އޮޅުން ފިލުވުމަށް ހޯމް މިނިސްޓަރ އުމަރުނަސީރާއި، ކޮމިޝަނަރ އޮފް ޕޮލިސް ހުސައިން ވަހީދު ގައުމީ ސަލާމަތާ ބެހޭ ކޮމެޓީއަށް މިއަދު ހާޒިރުކުރުމަށް ވަނީ ފާސްކޮށްފައިއެވެ. 

ރިޟްވާން ހޯދުމަށް ކުރަމުންދާ މަސައްކަތަށް ފަހިވާފަދަ ސައްހަ މައުލޫމާތު ފޯރުކޮށްދޭ މީހަކަށް 200,000 (ދެ ލައްކަ) ރުފިޔާގެ ފައިސާގެ އިނާމެއްދޭން އޭނާގެ އާއިލާއިން  ވަނީ ނިންމައިފައެވެ.

އުމުރު 28 އަހަރުގެ އަހުމަދު ރިޟްވާން އެންމެ ފަހުން ފެނިފައިވަނީ މި މަހުގެ ހަތް ވަނަ ދުވަހުގެ ރޭގައެވެ. އެރޭ އޭނާވަނީ ހުޅުމާލެ އަށް ދިއުމަށްޓަކައި ފެރީ ޓާމިނަލަށް ވަދެފައެވެ. އޭނާއެތަނަށް ވަދެފައިވާ މަންޒަރުވަނީ ސީސީޓީވީ ކެމެރާތަކަށް އަރައިފިއެވެ. އެރޭ އޭނާ ލައިގެންހުރީ ކަޅުކުލައިގެ ފަޓުލޫނަކާއި ގަމީހެކެވެ.ރިޟްވާނާ ބެހޭ އެއްވެސް މައުލޫމާތެއް ލިބިއްޖެނަމަ 7791120 އާއި 7773250 މި ދެނަންބަރަށް ގުޅައި މައުލޫމާތު ހިއްސާ ކުރުމަށް އާއިލާއިންވަނީ އެދިފައެވެ.