ފުޅާ ދާއިރާއެއްގައި މަސްތުވާތަކެތީގެ ވިޔަފާރުކުރާ ވިއުަގައެއް އަތުލައިގެންފި

ފުޅާ ދާއިރާއެއްގައި މަސްތުވާތަކެތީގެ ވިޔަފާރި ކުރަމުން އަންނަ މަސްތުވާތީގެ ވިއުގައެއް (ނެޓުވޯކެއް) ހިންގަމުން އަންނަ ތިން މީހަކު ހައްޔަރުކޮށްފައިވާކަމަށް މޯލްޑިވިސް ޕޮލިސް ސާވިސް އިން ހާމަކޮށްފިއެވެ.

ފުލުހުން ބުނީ މިދިޔަ ހޯމަ ދުވަހުގެ ހަވީރު ހައްޔަރުކޮށްފައިވަނީ 31 އަހަރުގެ ފިރިހެނަކާ، 20 އަހަރުގެ ފިރިހެނަކާ، 22 އަހަރުގެ ފިރިހެނެއް ކަމަށެވެ.

އެމީހުން އަތުލައިގަނެފައިވަނީ ގ. ޕާކަރު ހައުސް އަށް ކޯޓު އަމުރެއްގެ ދަށުން ވަދެކަމަށް ފުލުހުން ހާމަކުރެއެވެ. ފުލުހުން ބުނީ އެގެއިގެތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި ބެލްޓް ސައިޒްގެ 3 ޕެކެޓާއި، 52 ރަބަރު ޕެކެޓު ފެނިފައިވާ ކަމަށެވެ. އެތަކެތީގެ އިތުރުން މަސްތުވާތަކެތި ބަންދުކުރުމަށް ބޭނުންކުރާ ސާމާނުވެސް ފެނިފައިވާކަމަށް ފުލުހުން ހާމަކުރެއެވެ.

މި މައްސަލައިގައި އިތުރު ދެ ގެެއެއް ވެސް ބަލައި ފާސްކޮށްފައިވެއެވެ. އެއީ ގ. ބްލޫވެސްޓާއި، ހުޅުމާލެ ފްލެޓް 111-ޖީ-02 ކަމަށް ފުލުހުން ހާމަކުރެއެވެ.

ބްލޫވެސްޓަކީ އެ މައްސަލައިގައި ހައްޔަރު ކުރި 20 އަހަރު ފިރިހެންމީހާ ދިރިއުޅޭ ގެކަމަށް ފުލުހުން ހާމަކުރެއެވެ. އެގޭތެރެއިން މަސްތުވާތަކެތި ކަމަށް ޝައްކުކުރެވޭ 58 ރަބަރު ޕެކެޓު ފެނިފައިވެއެވެ. އަދި މަސްތުވާތަކެތި ބަންދުކުރާ ސާމާނު ވެސް ފެނިފައިވާކަމަށް ފުލުހުން ބުނެއެވެ.

ހުޅުމާލެ ފްލެޓް 111-ޖީ-02 އަކީ އެ މައްސަލައިގައި ހައްޔަރުކުރި 22 އަހަރުގެ މީހާ ދިރުއުޅޭ ތަނެވެ. އެފްލެޓް ބަލައިފާސްކުރިކުރުމުން އެތަނުން ތެރެއިން 150000 (އެއްލައްކަ ފަންސާސް ހާސް) ރުފިޔާއަށްވުރެ ގިނަ ފައިސާ ފެނިފައިވާކަމަށް ފުލުހުން ބުނެއެވެ.