އެސްއީޒެޑްގެ ބިލަށް ތިން ޕާޓީއަކުން އިސްލާހު ހުށަހަޅައިފި

ސްޕެޝަލް އިކޮނޮމިކް ޒޯން (އެސްއީޒެޑް)ގެ ބިލަށް ތިން ޕާޓީންއަކުން އިސްލާހު ހުށަހަޅައިފިއެވެ.

އެ ބިލަށް އިސްލާހު ހުށަހަޅާފައިވާ ޕަޓީތަަކަކީ، އިދިކޮޅު އެމްޑީޕީ، ޖުމްހޫރީ ޕާޓީ އަދި ސަރުކާރު ހިންގާ ޕީޕީއެމްއެވެ.

އެންމެ ގިނަ އިސްލާހު ހުށަހަޅާފައިވަނީ އެމްޑީޕީންނެވެ. އެއީ 180 އިސްލާހެވެ. އެ ޕާޓީން މަޖިލީހުގެ ތަޅުމަށް 300 އިސްލާހު ފޮނުވިއެވެ. އެހެން ނަމަވެސް މަޖިލީހުން ހުރިހައި އިސްލާހެއް ބަލައެއްނުގަނެއެވެ. އެމްޑީޕީން ހުށަހަޅާފައިވާ އިސްލާހުތަކުގެ ތެރޭގައި ބިން ކުއްޔަށް ދެވޭނެ ކަމަށް ކަނޑައަޅާފައިވާ މުއްދަތު 99 އަހަރުން 66 އަހަރަށް ބަދަލުކުރަން ހިމެނެއެވެ. އިންވެސްޓްމަންޓްގެ 75 ޕަސެންޓް މުވައްޒަފުންނަކީ ދިވެހިން ކަމުގައި ހެދުން ވެސް ހިމެނެއެވެ. އަދި ވިޔަފާރީގެ ސަރަހައްދުތަކުގައި އިސްލާމް ދީނާ ހިލާފު ކުޅިވަރުތައް ކުޅުން ހުއްޓުވުމަށް އެމްޑީޕީން ހުށަހަޅާފައިވެއެވެ.

ޕީޕީއެމްއަށް ނިސްބަތްވާ މަޖިލިސް މެމްބަރުން ހުށަހަޅުއްވާފައިވަނީ 10 އިސްލާހެވެ. ޖުމްހޫރީ ޕާޓީން ވެސް ހުށަހަޅައިފައިވަނީ ވެސް 10 އިސްލާހެވެ.

އެސްއީޒެޑުގެ ބިލަށް ހުރަސް ނޭޅުމަށް ރައީސުލް ޖުމްހޫރިއްޔާ އަބްދުﷲ ޔާމިން ވަނީ ރޭ ގޮވައިލައްވާފައެވެ. އެމަނިކުފާނު ވިދާޅުވެފައިވަނީ އެ ބިލުން ރައީސުލްޖުމްހޫރިއްޔާއަށް ލިބިލައްވާ ބާރުތަކަކީ "ރާއްޖެ ތަރައްގީ ކުރުމަށް" ލިބައިދޭ ބާރުތަކެއްކަމަށެވެ. އަދި ތަރައްގީ ގެނެވޭނީ އެކަން ފުރުސަތު ލިބިގެންކަމަށެވެ.

އިދިކޮޅު އެމްޑީޕީގެ ޕާލިމެންޓަރީ ގުރޫޕުން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި ބުނެފައިވަނީ އެ ޕާޓީން ބިލަށް ހުރަސް އަޅަން ބޭނުންނުވާކަމަށެވެ. އެހެން ނަމަވެސް ބިލުގެ ސަބަބުން ރާއްޖޭގެ ރައްޔިތުންގެ "އެއްވެސް ހައްގަކަށް" އުނިކަމެއް އަންނަން ބޭނުންނުވާކަމަށެވެ. އެ ޕާޓީން ހުށަހަޅައިފާ އިސްލާހުތަކުގެ ބޭނުމަކީވެސް އެއީކަމަށް ބުނެފައިވެއެވެ.