ޞާދިގު ޑެޕިއުޓީ ކޮމިޝަނަރގެ މަގާމަށް އައްޔަނުކުރައްވައިފި

އެސިސްޓަންޓް ކޮމިޝަނަރ އޮފް ޕޮލިހުގެ މަގާމުގައި ހުންނެވި، މުޙައްމަދު ޞާދިޤު ޑެޕިއުޓީ ކޮމިޝަނަރ އޮފް ޕޮލިސްގެ މަޤާމަށް ޢައްޔަން ކުރެއްވައިފިއެވެ.

ޞާދިގު ކުރިން ހުންނެވީ، މޯލްޑިވްސް ޕޮލިސް ސަރވިސްގެ ޕްރޮފެޝަނަލް ސްޓޭންޑަރޑް ކޮމާންޑުގެ ހެޑުގެ ގޮތުގައިއެވެ. ފުލުހުން ބުނީ ރައީސުލްޖުމްހޫރިއްޔާގެ ނިންމެވުމާއި ގުޅިގެން އޭނާއަށް މިއަދު މަޤާމުގެ ފަތްކޮޅު އަރުވައިފައިވާކަމަށެވެ. މިއަދު ހަވީރު ޝަހީދު ޙުސައިން އާދަމް ބިލްޑިންގުގައި އޮތް މެނޭޖްމަންޓް ބޯޑުގެ ޚާއްޞަ ބައްދަލުވުމުގައި ލިޔުމާއި މަޤާމުގެ ރޭންކު ޙަވާލު ކޮށްދެއްވީ ކޮމިޝަނަރ އޮފް ޕޮލިސް ޙުސައިން ވަޙީދުކަމަށް ފުލުހުންގެ ވެބްސައިޓުގައި ބުނެފައިވެއެވެ.

ފުލުހުން ބުނީ ޞާދިގަކީ ފުލުހުންގެ ޚިދުމަތުގައި މެދު ނުކެނޑި 29 އަހަރާއި 6 މަހާއި 8 ދުވަސް ހޭދަކުރައްވައިފާކަމަށެވެ. އޭނާ އަކީ ފުލުހުންގެ މެޑަލް، ސުނާމީ ކާރިސާގެ މެޑަލް، އިޚްލާޞްތެރި ޚިދުމަތުގެ މެޑަލް، ސައްތައިގެ މެޑަލް، އަޚްލާޤީ މެޑެލް، އިޚްލާޞްތެރި ޚިދުމަތުގެ މެޑެލް، 3 ނޮވެމްބަރުގެ މެޑެލް، ފުލުހުންގެ ޚިދުމަތުގެ މެޑެލް ، ދިގުމުއްދަތުގެ ޚިދުމަތުގެ މެޑަލް، މަތިވެރި ޚިދުމަތުގެ މެޑެލާއި، ރައީސުލްޖުމުހޫރިއްޔާގެ މެޑެލް ލިބިވަޑައިގެންފައިވާ އޮފިސަރެއްކަމަށެވެ. ޞާދިޤަކީ ޚާއްޞަ ޚިދުމަތުގެ ކުލައާއި، ކާމިޔާބުގެ ކުލައާއި، އަޚްލާޤީ ކުލަ 1، 2، ސިފަިއންގެ ޚިދުމަތުގެ ކުލަ، އިޚްލާޞްތެރި ޚިދުމަތުގެ ކުލަ، ދިގު މުއްދަތުގައި ޚިދުމަތް ކުރުމުގެ ކުލަ، 3 ނޮވެމްބަރުގެ ކުލައާއި ރައީސުލްޖުމުހޫރިއްޔާގެ ކުލަ ޙާޞިލް ކުރައްވާފައިވާ ފުލުސް ބޭކަލެއް ކަމަށް ފުލުހުން ހާމަކުރެއެވެ.