ރިޟުވާނު ގެއްލުނު މައްސަލައިގައި ހޯމް މިނިސްޓަރާއި ކޮމިޝަނަރ އޮފް ޕޮލިސް މަޖިލީހަށް ހާޒިރުކުރަނީ

ގެއްލިގެން ހޯދަމުންދާ، މިނިވަންނޫހުގެ، ނޫސްވެރިޔާ އަހުމަދު ރިޟްވާން ހޯދުމަށް ކުރަމުންގެންދާ މަސައްކަތްތަކުގެ މައުލޫމާތު އޮޅުން ފިލުވުމަށް ހޯމް މިނިސްޓަރ އުމަރުނަސީރާއި، ކޮމިޝަނަރ އޮފް ޕޮލިސް ހުސައިން ވަހީދު ގައުމީ ސަލާމަތާ ބެހޭ ކޮމެޓީއަށް ހާޒިރުކުރުމަށް މިއަދު ފާސްކޮށްފިއެވެ.

އެ ކޮމެޓީން ނިންމައިފައިވަނީ، އެ ދެ ބޭފުޅުން ހާޒިރުކުރާ ބައްދަލުވުން ސިއްރު ކުރުމަށެވެ.

މި ހުށަހެޅުއްވުމަކީ ކުރީގެ ކޮމިޝަނަރ އޮފް ޕޮލިސް، ކިބިނދޫ ދާއިރާގެ މެމްބަރު އަބްދުﷲ ރިޔާޒެވެ. އެ ހުށަހެޅުއްވުމަށް ތާއީދު ކުރެއްވީ ގެމަނަފުށީ ދާއިރާގެ މެމްބަރު ޖަމީލް އުސްމާނެވެ. ހުށަހެޅުމަށް ތާއީދުކޮށް ކޮމެޓީގެ ހުރިހާ މެމްބަރުން ވެސް ވޯޓު ދެއްވިއެވެ.

ރިޟްވާނުގެ އާއިލާއާއި، ރަހުމަތްތެރިން އިއްޔެ ވަނީ މަޖިލީސް ދޮށަށް އެއްވެ ޝުއޫރު ފާޅުކޮށްފައިއެވެ. އިއްޔެ މަޖިލީހުގެ ރައީސް އަބްދުﷲ މަސީހަށް ރިޟުވާނުގެ އާއިލާގެ ފަރާތުން ސިޓީއެއް ވެސް ހުށަހަޅައިފައިވެއެވެ. އެ ސިޓީގައި އާއިލާގެ ފަރާތުން އެދިފައިވަނީ ރިޟުވާނު ހޯދުމުގެ މައްސަލައިގައި ފުލުހުންގެ ދައުރު އަދާކުރާ މިންވަރު ސާފުކޮށްދިނުމަށް ކޮމިޝަނަރ އޮފް ޕޮލިސް މަޖިލީހަށް ހާޒިރުކުރުމަށެވެ. އަދި އެކަމުގައި މަޖިލީހުން ވެެވެން އޮތް ހުރިހައި އެހީތެރިކަމެއް ފޯރުކޮށްދިނުމަށެވެ.

ރިޟްވާން ހޯދުމަށް ކުރަމުންދާ މަސައްކަތަށް ފަހިވާފަދަ ސައްހަ މައުލޫމާތު ފޯރުކޮށްދޭ މީހަކަށް 200,00 (ދެ ލައްކަރުފިޔާ) ގެ ފައިސާގެ އިނާމެއްދޭން އޭނާގެ އާއިލާއިން މިއަދު ވަނީ ނިންމައިފައެވެ.

އުމުރު 28 އަހަރުގެ އަހުމަދު ރިޟްވާން އެންމެ ފަހުން ފެނިފައިވަނީ މި މަހުގެ ހަތް ވަނަ ދުވަހުގެ ރޭގައެވެ. އެރޭ އޭނާވަނީ ހުޅުމާލެ އަށް ދިއުމަށްޓަކައި ފެރީ ޓާމިނަލަށް ވަދެފައެވެ. އޭނާއެތަނަށް ވަދެފައިވާ މަންޒަރުވަނީ ސީސީޓީވީ ކެމެރާތަކަށް އަރައިފިއެވެ. އެރޭ އޭނާ ލައިގެންހުރީ ކަޅުކުލައިގެ ފަޓުލޫނަކާއި ގަމީހެކެވެ.ރިޟްވާނާ ބެހޭ އެއްވެސް މައުލޫމާތެއް ލިބިއްޖެނަމަ 7791120 އާއި 7773250 މި ދެނަންބަރަށް ގުޅައި މައުލޫމާތު ހިއްސާ ކުރުމަށް އާއިލާއިންވަނީ އެދިފައެވެ.