އެސްއީޒެޑް ބިލުން ލިބޭ ބާރުތަކުން ގައުމު ތަރައްގީކުރެވިދާނެ: ރައީސް ޔާމިން

ސްޕެޝަލް އިކޮނޮމިކް ޒޯނުގެ (އެސްއީޒެޑް) ބިލުން ރައީސުލްޖުމްހޫރިއްޔާއަށް ލިބިލައްވާ ބާރުތަކާއި މެދު ކަންބޮޑު ނުވުމަށް ރައީސް އަބްދުﷲ ޔާމިން އިލްތިމާސް ކުރައްވައިފިއެވެ.

ރައީސުލް ޖުމްހޫރިއްޔާ މިހެން ވިދާޅުވީ ޕީޕީއެމްގެ ފަންނާނުންގެ ގޮފި އިފްތިތާހު ކުރުމަށް ރޭ އާޓިފިޝަލް ބީޗުގައި ބޭއްވި ހަފުލާގައިއެވެ. 

ރައީސް ޔާމިން ވިދާޅުވީ އެސްއީޒެޑް ބިލުން ރައީސުލްޖުމްހޫރިއްޔާއަށް ލިބިލައްވާ ބާރުތަކަކީ "ރާއްޖެ ތަރައްގީކުރުމަށް އެކަނި" ދެއްވާފައިވާ ބާރުތަކެއް ކަމަށެވެ. މިބީދައިން ވާހަކަ ދައްކަވަމުން ރައީސް ޔާމިން ވިދާޅުވީ، ބްރިޖު އެޅުން ފަދަ ތަރައްގީގެ މަޝްރޫތައް ގެނައުމަށް ރައީސްގެ ބާރު ކިތަންމެ ވަރަކަށް ބޭނުންކުރިއަސް އެއީ މައްސަލައެއް ކަމަށް ރައްޔިތުންނާއި އިދިކޮޅު ފަރާތްތަކުން ނުދެކޭ ކަމަށެވެ. އެހެން ނަމަވެސް މައްސަލައަކަށްވަނީ އެސްއީޒެޑް ބިލުން ރައީސަށް ބާރުތައް ލިބުމުންކަމަށް އިދިކޮޅު ޕާޓީތަކުންނާއި ބައެއް ރައްޔިތުން ދެކޭ ކަމަށްވެސް ވިދާޅުވިއެވެ.

"އަަޅުގަނޑު ދަންނަވާނީ މިއީ ޕީޕީއެމުން ރާއްޖެ ތަރައްގީ ކުރަން ބޭނުންވާ ތަސައްވުރޭ. މި ފުރުސަތު އަޅުގަނޑުމެންނަށް ދެއްވާށޭ. އިކޮނޮމިކް ޒޯން ހަދާތީ އެކަމަށް ވެސް ފާޑު ކިޔަންޖެހޭނެ. އެހެނަސް އެކަން ކުރުަމަށް ހުރަސް އެޅުމަކީ ރައްޔިތުންނަށް ތަރައްގީ ގެނެސްދިނުމަށް ހުރަސްއެޅުންކަމަށް ގަބޫލުކުރަންޖެހޭ،" ރައީސް ވިދާޅުވި އެވެ.

އެމަނިކުފާނު ވިދާޅުވީ 2018 ވަނަ އަހަރުގެ ރިޔާސީ ދައުރަށް ކުރިމަތިލައްވާނީ ރައްޔިތުންނަށް ނަތީޖާ ދެއްކޭ ވަރުގެ މަސައްކަތްތަކެއް ކުރެއްވިއްޖެނަމަ ކަމަށެވެ.

"ވެރިކަމުގެ ކޮންމެ ދުވަހެއްގައި ވެސް މަސައްކަތް ކުރައްވަނީ ނަތީޖާ ނެރެދިނުމަށް. އަދި ސަރުކާރުން ކުރާ ކޮންމެ މަސައްކަތެއްގެ ބޭނުމަކީ ވެސް ރައްޔިތުން ބަލައި ގަންނަ ވަރުގެ ނަތީޖާއެއް ދައްކައި ދިނުން. އަޅުގަނޑު ގަބޫލު ކުރާ ގޮތަކީ މަސައްކަތްކޮށް ނަތީޖާ ނެރުން. އަޅުގަނޑަށް ކޮންމެ ދުވަހެއް ވެސް މުހިންމު ވަނީ އެހެންވެ. އަޅުގަނޑު ބޭރުގެ ގައުމުތަކަށް ގޮސް ރާއްޖެ ތަރައްގީ ކުރުމާ ގުޅޭ ގޮތުން ވެސް އަޅުގަނޑު މި އަންނަނީ ވާހަކަ ދައްކަމުން،" ރައީސް ވިދާޅުވި އެވެ .

ސަރުކާރުގެ އަމާޒަކީ ބާރުގެ ބޭނުންކޮށްގެން ރާއްޖެ ތަރައްގީ ކުރުމުގެ ބަދަލުގައި ކަންކަމަށް އިގްތިސާދީ ހެއްލެއް ގެނައުންކަމަށް ވެސް ރައީސް ވިދާޅުވިއެވެ.

އިދިކޮޅު އެމްޑީޕީން ވަނީ އެސްއީޒެޑް ބިލަށް 300 އިސްލާހު ހުށަހަޅައިފައިއެވެ. އެ ޕާޓީން ބުނަނީ އެ އިސްލާހުތަކުގެ ބޭނުމަކީ ބިލަށް ހުރަސްއެޅުން ނޫންނަކަމަށެެވެ. އެހެން ނަމަވެސް ބިލުގެ ސަބަބުން "ރައްޔިތުންގެ ހައްގުތައް ނުގެއްލޭނެކަން" ކަށަވަރުކުރުންކަމަށެވެ. އެމްޑީޕީން ހުށަހަޅާފައިވާ އިސްލާހުތަކުގެ ތެރޭގައި ބިން ކުއްޔަށް ދެވޭނެ ކަމަށް ކަނޑައަޅާފައިވާ މުއްދަތު 99 އަހަރުން 66 އަހަރަށް ބަދަލުކުރަން ހިމެނެއެވެ. އިންވެސްޓްމަންޓްގެ 75 ޕަސެންޓް މުވައްޒަފުންނަކީ ދިވެހިން ކަމުގައި ހެދުން ވެސް ހިމެނެއެވެ. އަދި ވިޔަފާރީގެ ސަރަހައްދުތަކުގައި އިސްލާމް ދީނާ ހިލާފު ކުޅިވަރުތައް ކުޅުން ހުއްޓުވުމަށް އެމްޑީޕީން ހުށަހަޅާފައިވެއެވެ.