އެސްއީޒެޑުގެ ބިލަށް ގިނަ އިސްލާޙުތަކެއް ހުށަހަޅަން ޖެހުނީ އެބިލު އިތުރަށް ފުރިހަމަކުރަން- އެމްޑީޕީ

ސްޕެޝަލް އިކޮނަމިކް ޒޯން (އެސްއީޒެޑު)ގެ ބިލަށް ގިނަ އިސްލާޙު ތަކެއް ހުޝަހަޅަންޖެހުނު އެންމެ ބޮޑު މަގުސަދަކީ އެ ބިލް ވީހާ ވެސް ފުރިހަމަކޮށް ރައްޔިތުންގެ ހައްގުތައް ހިމާޔަތްކުރަން ކަމަށް އެމްޑިޕީން ހާމަކޮށްފިއެވެ.

މިއަދު ސިޓީހޯލުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވީ، އެއިސްލާޙު ތަކަކީ އެއްވެސް ހާލެއްގައި ބިލަށް ހުރަސް އެޅުން ނޫން ކަމަށެވެ. އެހެންކަމުން ހުށަހަޅާ ގިނަ އިސްލާހުތައް ހުންނާނީ ބިލް އިތުރަށް ފުރިހަމަ ކުރުމާ ގުޅޭ ގޮތުން ކަމަށް އޭނާ ވިދާޅުވިއެވެ.

އެގޮތުން 300 އަށްވުރެ ގިނަ އިސްލާޙު އެބިލަށް އެމްޑީޕީގެ ފަރާތުން ހުޝަހަޅަން ނިންމާފައިވާ ކަމަށްވެސް ރޮޒައިނާ ވިދާޅުވިއެވެ. ރޮޒެއިނާ ވިދާޅުވީ ކޮމިޓީ މަރުހަލާގައި އިސްލާހު ހުށަހެޅުމުގެ އެއްވެސް ފުރުސަތެއް ލިބިފައިނުވާ ކަމަށާއި ސަރުކާރުން ބޭނުންވީ ވީހާ އަވަހަކަށް ސަރުކާރުން ބޭނުންވާ ގޮތަށް ބިލްގެ މަސައްކަތް ނިންމާލުމަށް ކަމަށެވެ. އެހެން ނަމަވެސް މަޖިލީހުގެ ތަޅުމުގައި ބިލާ މެދު ބަހުސްކޮށް އިސްލާހުތައް ހުށަހެޅުމުގެ މަސައްކަތް ކުރިއަށްދާއިރު މިއިސްލާހު ތަކަށް ތާއީދު ކުރުމަށް މަޖިލީހުގެ މެންބަރުންނަށް ބާރުއަޅައި ދިނުމަށް ރައްޔިތުންނަށް އޭނާ ވަނީ ގޮވާލައްވައިފައެވެ.

މިބިލަށް އެމްޑިޕީން ހުޝަހަޅާފައިވާ ބައެއް އިސްލާޙުތަކަށް ބަލާއިރު، ބިން ކުއްޔަށް ދެވޭނެ ކަމަށް ކަނޑައަޅާފައިވާ މުއްދަތު 99 އަހަރުން 66 އަހަރަށް ބަދަލުކުރުމާއި، އިންވެސްޓްމަންޓްގެ 75 ޕަސެންޓް މުވައްޒަފުންނަކީ ދިވެހިން ކަމުގައި ހިމެނެއެވެ. އަދި އިދާރީ ދާއިރާއެއްގެ އިހްތިސާސްގެ ތެރޭގައި ހިމެނޭ ސަރަހައްދެއް، އިގްތިސާދީ ހާއްސަ ސަރަޙައްދަކަށް ބަދަލުކުރާ ނަމަ އެއިދާރީ ދާއިރާގެ ކައުންސިލްގެ ލަފާ ހޯދައި ގޮތެއް ނިންމުމަށްވެސް ވަނީ ހުޝަހަޅާފައެވެ. ނަމަވެސް މިހާރު ބިލްގައި އޮތް ގޮތުންނަމަ ކައުންސިލެއް ނުވަތަ އެއިދާރީ ދާއިރާއެއްގެ ރައްޔިތުންގެ ބަހެއް ނެތި ވެސް ރައީސުލްޖުމްހޫރިއްޔާ އަށް އިގްތިސާދީ ސަރަހައްދެއް ކަނޑައެޅިދާނެއެވެ.

މީގެއިތުރުން އެސްއީޒެޑުގެ ގޮތުގައި ކަނޑައަޅާ ސަރަހައްދު ތަކުގައި ޖުވާކުޅުމާއި ކެސިނޯ ފަދަ އިސްލާމް ދީނާ ހިލާފު ކުޅިވަރުތައް ކުޅުމާއި، އިސްލާމް ދީން ފިޔަވައި އެހެން ދީންތަކުގެ މީހުން ޖަމާއަތުގެ ގޮތުގައި އަޅުކަން ކުރުމާއި އެފަދަ ތަންތަން ހެދުމަށް ފުރުސަތު ލިބިގެންދާތީ އެކަން ހުއްޓުވުމަށްވެސް އެމްޑިޕީންވަނީ އިސްލާހެއް ހުޝަހަޅާފައެވެ.

ނަމަވެސް މިބިލާ ގުޅޭގޮތުން ސަރުކާރަށް ނިސްބަތްވާ ފަރާތްތަކުން ބުނަމުން ގެންދަވަނީ، އިދިކޮޅު ފަރާތްތަކުން ދައްކާ ވާހަކަތަކަކީ ހަގީގަތާ ހިލާފު ދޮގު ވާހަތަކެއް ކަމަށެވެ. އަދި ބިލާ ދެކޮޅަށް ވާހަކަތައް ދައްކަނީ ރައްޔިތުންނަށް ބިލުގެ މަގުސަދު އޮޅުވާލުމުގެ މަގުސަދުގައި ކަމަށެވެ.