ރިޟްވާން އަދިވެސް އެނބުރި އަންނާނެކަމަށް އުންމީދުކުރަން: އާއިލާ

މިނިވަން ނޫހުގެ ނޫސްވެރިއާ ރިޟްވާން އަބްދުﷲ، އަލުން އެނބުރި އަންނާނެކަމަށް އަދިވެސް އުންމީދުކުރާ ކަމަށް އޭނާގެ އާއިލާއިން ބުނެފިއެވެ.

ޔޫޓިއުބް މެދުވެރިކޮށް އޭނާގެ އާއިލާއިން އާންމުކޮށްފައިވާ ވީޑިއޯއެއްގައި އޭނާގެ މަންމަ ބުނެފައިވަނީ ރިޟްވާން އެންމެ ފަހުން އެގެއިން ނުކުމެގެން ދިޔައީ ރޭގަނޑު ކައިގެން ކަމަށެވެ. އޭގެފަހުން ރިޟްވާން ގެއްލުމުން އޭނާއަށް ވަރަށް ބޮޑު ޝޮކެއް ލިބިފައިވާކަމަށެވެ. 

"ގެއަށް އައިސް އެންމެފަހުން ކައިގެން އޭނާ ދިޔައީ. އޭގެ ފަހުން އަޅުގަނޑުމެން މިތިބީ ހަމަ ޝޮކެއް ޖެހިފަ. ކުރާނެކަމެއް ނޭގިފަ މިތިބީ. ވަރަށް ރަނގަޅު ކުއްޖެއް އެެއީ،" ރިޟްވާނުގެ މަންމަ ރޮމުން އެ ވީޑިއޯގައި ބުނެފައިވެއެވެ. 

އޭނާގެ އާއިލާގެ އެހެން މެމްބަރުން ބުނެފައިވަނީ އޭނާއަކީ ހައްގުތަކަށް އަބަދުވެސް ވަކާލާތުކުރާ މީހެއް ކަމަށެވެ. އޭނާގެ އެންމެ ހާއްސަ ކަމަކީ އޭނާގެ ފަރާތުން އެހެން މީހަކަށް ގެއްލުމެއް ވާން ނޭދޭކަން ކަމަށެވެ. 

އޭނާގެ އާއިލާއިން ބުނެފައިވާގޮތުގައި އޭނާއަކީ އެއްވެސް މިންވަރަކަށް މާރާމާރީ ހިންގައި ގޯސްގޮތަކަށް އުޅޭ މީހެއް ނޫންކަމަށެވެ.

އޭނާ ގޭތެރޭގައި އުޅޭނަމަ އާއިލާ މީހުން ހެއްވައިލުމަށް އަބަދުވެސް ކޮންމެވެސް އެއްޗެއް ކިޔާނެކަމަށް ވެސް އާއިލާއިން ނެރެފައިވާ ވީޑިއޯގައި ބުނެފައިވެއެވެ. 

މިކަންކަމުގެ އިތުރުން ރިޟްވާނަކީ ދިވެހި ބަހަށް ލޯބި ކުރާ މީހެއް ކަމަށް އޭނާގެ އާއިލާއިން ބުނެއެވެ. އޭނާ އަބަދުވެސް ޅެން ހެދުން ފަދަ ކަންކަމުގައި ޝާމިލުވެ އުޅޭކަމަށް އެމީހުން ބުނެއެވެ. 

"އޭނާ އަބަދުވެސް އެމީހުން ބުނާ ކޮންމެވެސް އެއްޗަކުން ލަވައެއް ހަދައިލައިގެން ކިޔާ،" އެނާގެ އާއިލާ މީހެއް ވީޑިއޯގައި ރޮމުން ބުނެފައިވެއެވެ. 

އޭނާ އަކީ ވަރަށް ޖޫސްޕެޓީ ބޯހިއްވާ މީހެއް އާއިލާއިން ބުނެއެވެ. އަދި އާއިލާ މީހުން ކައިރީގައި އަބަދުވެސް ޖޫސްޕެޓީ ބޯން ދާން ކިޔާ ކަމަށް އެމީހުން ބުނެއެވެ. 

"އެންމެ ފުރަތަމަ އަޅުގަނޑު ދާނީ އޭނާ ގޮވައިގެން ޖޫސްޕެޓީއެއް ބޯން އޭނާ އަލުން އެނބުރިއައުމުން. ވަރަށް ދުވަސް ވެއްޖެ ޖޫސްޕެޓީއަކަށް ނުދެވި ހުންނަތާ،" ރިޟްވާން ހޯދުމަށް އެދި އޭނާގެ އާއިލާ މީހަކު އެ ވީޑިއޯގައި ދީފައިވާ މެސެޖެއްގައި ބުނެފައިވެއެވެ.

"މާދަމާ ގެއްލޭނީ އަޅުގަނޑުމެންގެ ތެރެއިން ކާކުކަމެއް ނޭގޭ އެގޮތަށް ގެއްލޭނީ،" އޭނާގެ އާއިލާ މީހަކު ބުނެފައިވެއެވެ. 

އެ ވީޑިއޯގައި ރިޟްވާނުގެ އާއިލާގެ ތުއްތު ކުއްޖަކު"ބޯޅައާ ޑްރަމްއާ ކުޅެން އާދެބާ" މިހެން ބުނެފައެވެ. 

 "މިހާތަނަށްވެސް އަޅުގަނޑުމެން މިތިބީ ޕޮޒިޓިވްކޮށް." ކަމަށާއި  "ޑާޓާ ޖައްސަލާފަ ވައިބާ ބަލާލަ ބަލަ މެސެޖުކޮޅެއް ހުންނާނެ،" ކަމަށް ރިޟްވާންގެ އާއިލާ މެމްބަރުން ބުނެފައިވެއެވެ. 

"އަހޫ (ރިޝްވާން) ހީނުކުރާ މިންވަރަށް އެންމެންވެސް އަހޫ ދެކެ ލޯބިވެޔޭ. އެކަން އިނގޭނޭ ދެން އަލުން އެނބުރި އައީމަ،" އާއިލާގެ މެމްބަރަކު އޭނާ އެނބުރި އައުމަށް އެދި ބުނެފައިވެއެވެ.

ރިޟްވާން އެންމެ ފަހުން ފެނިފައިވަނީ މި މަހުގެ ހަތް ވަނަ ދުވަހުގެ ރޭގައެވެ. އެރޭ އޭނާވަނީ ހުޅުމާލެ އަށް ދިއުމަށްޓަކައި ފެރީ ޓާމިނަލަށް ވަދެފައެވެ. އޭނާއެތަނަށް ވަދެފައިވާ މަންޒަރުވަނީ ސީސީޓީވީ ކެމެރާތަކަށް އަރައިފިއެވެ. އެރޭ އޭނާ ލައިގެންހުރީ ކަޅުކުލައިގެ ފަޓުލޫނަކާއި ގަމީހެކެވެ.

ރިޟްވާނާ ބެހޭ އެއްވެސް މައުލޫމާތެއް ލިބިއްޖެނަމަ 7791120 އާއި 7773250 މި ދެނަންބަރަށް ގުޅައި މައުލޫމާތު ހިއްސާ ކުރުމަށް އާއިލާއިންވަނީ އެދިފައެވެ.

ވީޑިއޯގެލިންކް:

 https://www.youtube.com/watch?v=yqNNxzdWAwQ&feature=youtu.be