ރިޟްވާނުގެ އާއިލާއި ރަހުމަތްތެރިން މަޖިލިސް ދޮށަށް އެއްވެ ޝުއޫރު ފާޅުކޮށްފި

ވީނުވީއެއް ނޭގި މިމަހު 8 ވަނަ ދުވަހުން ފެށިގެން ގެއްލުނު މިނިވަން ނޫހުގެ ނޫސްވެރިއާ އަބްދުﷲ ރިޟްވާންގެ އާއިލާއާއި، އޭނާގެ ރަހުމަތްތެރިން ރައްޔިތުންގެ މަޖިލިސް ދޮށަށް އެއްވެ ޝުއޫރު ފާޅުކޮށްފައެވެ.

މަޖިލިސް ދޮށަށް އެއްވި މީހުން ގޮވައިލައިފައިވަނީ ރިޟުވާން ހޯދުމުގައި ފުލުހުން ޖަވާބު ދާރީ ކުރުވަން މަޖިލީހަށް ޖެހޭނެކަމަށެވެ. އަދި އޭނާ ގެއްލުނުތާ 17 ދުވަސް ހިންގާފައިވާއިރު، އެކަމުގެ ބިރުވެރިކަމާއި ނުތަނަވަސްކަން އޭނާގެ އާއިލާ، ރަހުމަތްތެރިންނާއި، އާންމު ރައްޔިތުންގެ މެދުގައި އުފެދިފައިވާކަމަށެވެ. 

މިއަދު ރިޟްވާނުގެ އާއިލާއިން ވަނީ އެނާ ހޯދުމުގައި މަޖިލީހުން އެހީތެރިކަން ފޯރުކޮށް ދިނުމަށް އެދި މަޖިލީހުގެ ރައީސް އަބްދުﷲ މަސީހަށް ސިޓީއެއް ވެސް ހުށަހަޅައިފައެވެ. 

ރިޟްވާނާއި ގުޅޭ ސައްހަ މައުލޫމާތު ފޯރުކޮށްދޭ ފަރާތަކަށް 50000 ރުފިޔާގެ ފައިސާގެ އިނާމެއްވެސް އޭނާގެ އާއިލާއިން ވަނީ ހުށަހަޅާއިފައެވެ. 

ރިޟްވާން ހޯދުމަށް ކުރަމުންދާ މަސައްކަތަށް ރައްޓެހި ރަހުމަތްތެރީންނާއި އެހެން މީހުންގެ ފަރާތުން ވަރަށް ބޮޑު އެއްބާރުލުމެއް ލިބެމުންދާ ކަމަށް އާއިލާއިން ބުނެއެވެ.

"ރިޟްވާން ހޯދުމުގެ މަސައްކަތަކީ އަޅުގަނޑުމެންގެ އާއިލާއަށް ކޮށްދޭ ކަމެއްގެ ބަދަލުގައި މިފަދަ ކަމެއް އެހެން އާއިލާއަކަށް ދިމާވިޔަ ނުދިނުމުގެ އަޒުމުގައި މިކަން ކޮށްދިނުމަކީ އަޅުގަނޑުމެންގެ އެދުމެއް،" އާއިލާއިން ވާހަކަ ދެއްކި މޫސާ ރިޟްވާން ބުންޏެވެ.

އޭނާ ބުނީ އަހުމަދު ރިޟްވާނާ ބެހޭ ގޮތުން ކިތަންމެ ކުޑަ މައުލޫމާތެއް ދިނަސް އެއީ ވަރަށް ބޮޑު ކަމެއް ކަމަށް އާއިލާއިން ބަލައިގަންނާނެ ކަމަށެވެ.

އުމުރު 28 އަހަރުގެ އަހުމަދު ރިޟްވާން އެންމެ ފަހުން ފެނިފައިވަނީ މި މަހުގެ ހަތް ވަނަ ދުވަހުގެ ރޭގައެވެ. އެރޭ އޭނާވަނީ ހުޅުމާލެ އަށް ދިއުމަށްޓަކައި ފެރީ ޓާމިނަލަށް ވަދެފައެވެ. އޭނާއެތަނަށް ވަދެފައިވާ މަންޒަރުވަނީ ސީސީޓީވީ ކެމެރާތަކަށް އަރައިފިއެވެ. އެރޭ އޭނާ ލައިގެންހުރީ ކަޅުކުލައިގެ ފަޓުލޫނަކާއި ގަމީހެކެވެ.

ރިޟްވާނާ ބެހޭ އެއްވެސް މައުލޫމާތެއް ލިބިއްޖެނަމަ 7791120 އާއި 7773250 މި ދެނަންބަރަށް ގުޅައި މައުލޫމާތު ހިއްސާ ކުރުމަށް އާއިލާއިންވަނީ އެދިފައެވެ.