އެމްޖޭއޭގެ ރައީސްކަމުން ޒާހިރު އިސްތިއުފާ ދެއްވައިފި

މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)ގެ ރައީސް ކަމުން އަހުމަދު ޒާހިރު އިސްތިއުފާ ދެއްވައިފިއެވެ.

އިސްތިއުފާ ދެއްވުމަށް ޒާހިރު މިއަދު ފޮނުއްވި ސިޓީގައި އޭނާ ވިދާޅުވެފައިވަނީ މަގާމުން އިސްތިއުފާ ދެއްވީ އެ ޖަމިއްޔާގެ ހިންގާ ކޮމެޓީ އިންތިހާބު ކުރަން ތިން ފަހަރެއްގެ މަތީން މަސައްކަތްކޮށް އެކަން ކާމިޔާބު ނުވުމުންކަމަށެވެ. އިސްތިއުފާ ދެއްވިނަމަވެސް އެ ޖަމިއްޔާގެ މުއައްސަިސެއްގެ ހައިސިއްޔަތުން ޖަމިއްޔާއަށް އެހީތެރިކަން ފޯރުކޮށްދެމުން ގެންދާނެކަމަށް އޭނާވަނީ ވިދާޅުވެފައެވެ.

އެ ޖަމިއްޔާގެ ހިންގާ ކޮމެޓީގެ އިންތިހާބު ބޭއްވުމަށް ރޭ ބޭއްވި ބައްދަލުވުން ވަނީ ކުރިއަށް ނުގެންދެވިގެން ހުއްޓައިލައިފައެވެ. ބައްދަލުވުން ހުއްޓައިލަން ޖެހުނީ އެ ބައްދަލުވުމުގެ ބައިވެރިންގެ މެދުގައި ހިޔާލުތަފާތުވުންތައް އުފެދުމުންނެވެ. ބައިވެރިން ބުނެފައިވަނީ ޖަމިއްޔާގެ މެމްބަރުންނަށް އާއްމުކޮށް އެންގުމެއް ނެތި އިންތިހާބު ބާއްވަން މަސައްކަތްކުރާކަމަށެވެ. އިންތިހާބު ބާއްވަން އިއުލާންކުރީ އެމްޖޭއޭގެ ބޯޑުގެ ބައެއް މެމްބަރުންނަށް ވެސް އެންގުމަކާ ނުލައި ކަމަށްބުނެ ރޭގެ ބައްދަލުވުމުގައި އަޑު އުފުލާފައިވެއެވެ.

މީގެ ކުރިން ވެސް ދެ ފަހަރެއްގެ މަތިން އެ ޖަމިއްޔާގެ ހިންގާ ކޮމެޓީގެ އިންތިހާބު ބޭއްވުމަށް މަސައްކަތްކޮށް އެކަން ވަނީ ނާކާމިޔާބު ވެފައިވެއެވެ.