ގޭސް ހުސްވެދާނެތީ ކަންބޮޑު ނުވުމަށް މޯލްޑިވް ގޭހުން އިލްތިމާސް ކޮށްފި

ބައެއް ކަސްޓަމަރުންނަށް ގޭސް ލިބުން ދަތިވަނީ ގޭސް ހުއްވެދާނެ ކަމުގެ ބިރުހީވެ، އެފަދަ ކަސްޓަމަރުން އެއްފަހަރާ ގިނަ އަދަދެއްގެ ގޭސް ސިލިންޑަރުތައް ގަންނަން ފެށުމުން ކަމަށް މޯލްޑިވް ގޭހުން ހާމަކޮށްފިއެވެ.

މޯލްޑިވް ގޭހުގެ ހެޑް އޮފް ސޭލްސް މުހައްމަދު ޝިފާއު ވިދާޅުވީ، ފާއިތުވީ ހަފުތާއެއްހައި ދުވަހުގެ ތެރޭގައި ރާއްޖެއަށް ވިއްސާރަވެ ގޭސް ހުސްވެދާނެ ކަމަށް ބައެއް ނޫސްތަކުގައި ލިޔުމުން ރައްޔިތުންގެ ކަންބޮޑުވެފައިވާ ކަމަށެވެ. އެހެން ކަމުން ގޭސް ހުސްވެދާނެ ކަމުގެ ބިރުވެރިކަން ރައްޔިތުންގެ ހިތްތަކުގައި އޮތުމުގެ ސަބަބުން ބައެއް މީހުން އެއްފަހަރާ ގިނަ އަދަދެއްގެ ގޭސް ސިލިންޑަރުތަކެއް ގަންނަމުން އަންނަ ކަމަށެވެ. މިހެންކަމުން ހުރިހާ ކަސްޓަމަރުންނަށް ގޭސް ފޯރުވައި ދިނުމުގައި ދަތިތަކެއް މެދުވެރިވެފައިވާ ކަމަށް އޭނާ ވިދާޅުވިއެވެ.

"މީގެ ދެތިން ދުވަހެއް ކުރިން ނޫސްތަކުގައި ގޭސް ހުސްވާ ކަހަލަ ވާހަކައެއް ލިއުމުން ރައްޔިތުން ޕެނިކުވެގެން (ކަންބޮޑުވެގެން) އެއްފަހަރާ ބައިވަރު ގޭސް ފުޅިތަކެއް ގަންނަން ފެށި. މީގެ ކުރިންވެސް ކަންކަން އެގޮތަށް ވެފައި އެބަހުރި. ހަނގުރާމައެއް ފަށައިފާނެހެން ހީވަންޏާ ބައެއް މީހުން ގެއަށް ކާޑުގެ ބާވަތްތައް ގިނައަދަދަކަށް ވައްދާނެ. އެގޮތަށް ގޭސް ހުސްވެދާނެހެން ހީވަންޏާ އެއްފަހަރާ ގިނަ ގޭސް ސިލިންޑަރުތައް ގަންނަން ބޭނުންވާނެ،" ޝިފާއު ވިދާޅުވިއެވެ.

ޝިފާއު ވިދާޅުވީ އާންމު ގޮތެއްގައި މޯލްޑިވިސް ގޭހުން ދުވާލެއްގެ މައްޗަށް 700 ވަރަކަށް ސިލިންޑަރު މާލޭގައި ރޯލު ކުރާކަމަށެވެ. އެހެން ނަމަވެސް އިއްޔެވެސް 1000 އަށްވުރެ ގިނަ ސިލިންޑަރު ރޯލުކޮށްފައިވާ ކަަމަށް އޭނާ ވިދާޅުވިއެވެ. މިހެންކަމުން މިއަދު ވެސް 1200 ސިލިންޑަރު މާލެ ގެންނާނެ ކަމަށް އޭނާ ވިދާޅުވިއެވެ. ރާއްޖެއިން ބޭރުން އަންނަ ގޭސް ބޯޓު މާދަމާ މާލެ ވަންނާނެ ކަމަށް ވިދާޅުވިއެވެ.

"ބައެއް ބޭފުޅުން އެބަ ގޭސް ނަންގަވާ 40 ފުޅިންވެސް. ކުރިން ދުވަހެއްގައި ވެސް ދުރުގައި ޕިކަޕު ބޭއްވުމަށްފަހު އަޅުގަނޑުމެން އަތުން ގޭސް ގަންނަން ފަހަރަކު މީހަކު ފޮނުވަމުން ދިޔައީ. އެކަން އަޅުގަނޑުމެންނަށް އެނގުނީ މާފަހުން. ހޮޓާ ރެސްޓޯރަންޓު އަދި ބައެއް ބޭފުޅުން ސިލިންޑަރުތައް އެއްކޮށްގެން އަޅުގަނޑުމެން އަތުން ގޭސް ގަންނަމުން ދިޔުމުގެ ސަބަބުން މި ތާށިކަން މި ދިމާވީ. އެހެން ނަމަވެސް މާދަމާ ބޯޓު އައުމުން އެއްވެސް ތާށިކަމެއް ނެތި ގޭސް ސަޕުލައި ކޮށްދެމުން ގެންދާނަން،" ޝިފާއު ވިދާޅުވިއެވެ.

ފާއިތުވީ ހަފުތާއެއްހާ ދުވަހުގެ ތެރޭގައި ރާއްޖޭއަށް ހުޅަނގު މޫސުމުގެ ވިއްސާ ކުރުމާ ގުޅިގެން ބައެއް ރަށްރަށް ވަނީ ގޭސް ލިބުން ދަތިވެފައެވެ. އަދި ގޭހުގެ ޑިމާންޑު ބޮޑުވުމުގެ ސަބަބުން ބައެއް ގޭބިސީތަކަށް ގޭސް ނުލިބެއެވެ.